1 Peterus 3 - Eipomek

El akanye ap, el kil ap, sik talima dukdongobuka una ati, nyabuk yupu

¹ Anggun ninye don kilapu ara, ayupu kekeplulume. ‘Ninye deiyok nang atonun nang ati, nimalye arye sik amutamak unamlulume,’ nyapmasin touk, anggun kilapu babye, anggun akanye yapu amutamak umunce, sik yupu kekebuka, kanye deipdanuka neika dukdongobuka unamlulume. Wininamluma deiyok ara, anggun akanye yapu diba tenena kum nang aulamtingtoura, anggun teleb umunye ning eibikirye, adeice arye moubuka kel kibikirye, diba tenepnamake. Anggunce anggun akanye yapu ati, “An ton diba teneplyame,” kum nyaldanamlum bukni, sik bidamnang aryuk diba tenepnamake.

² Ara, malye una pia kum arye diksukumuk ulye ning ap, ‘Allah eluk ara, pia mambule’ tenen, el yupu kekebuka dobolbalulum ning ap, sikce aning eibikceura, moubuka kel kibikirye diba tenepnamake.

³ ‘Urasin pia teleb kilapu,’ tenepnamsiyak ning ara, nong bol deice winin ning ap, kweirya ning ap, tonok kume. Ati, potong kouna ap, kweirya ning dona ap, pia urasin teleb ongon baju ongona ap, winimunye deice arye, ‘Urasin teleb kilapu tenenamsiyak,’ tenena kume.

⁴ Aning ara, kum bukni, anggun kanye talima noutam, teleb-teleb ubuka ulamunye deice arye, dipkoprop teleb kilapu unamlulume. Anggun nimalye arye tunim abuka una ap, yupu weik arye nyana kum, kanye dukdongobuka nimalye arye una ap ara, talima noutam usulul ning anya arye, nong bol deice usilye ning, wisi dakirye suruklamsil ato kume. Aning ara, talima noutam pia usilibuk, Allah el kanye ara, ‘Aning ara, pia mambule,’ tenelirye, kanye deilisulule.

⁵ Aning ara, talya ati kum nyapsine. Deiyok ara, minop talak diksukumuk ulamik kilapu arye, Allah deice kanye deibuka ulamikce, sik talima noutam teleb ulamika deice aryuk, urasin teleb kilapu ubuka delilalamika ati, sik ulamik touk, anggun wini talak ululum kilapu babye, atouk unamlulume. Sik minop talak diksukum ulamik kilapu ara, sik nin yapu amutamak pia nimalye arye ulamik.

⁶ Sik winilamik touk, Sara babye, el akanye Abraham ati, “Anda na deiyoknye,” nyabuka, el amutamak ulamukce, el yupu kekebuka nimalye arye ulamuk. Aning ati ara, anggun wini talak ululum kilapu babye, anggunce aning-aning nirya ati, ilil kum diksukumuk ulamtumtoura, Sara el kil mapu atouk unamlulume.

⁷ Aning atouk, anggun akanye yapu babye, anggun kilapu ap, talima tonok dukdongobuka neika unamlulum talak nirya ara, anggun kilapu sik pataplye ning moubuka tenebuka, melinamlume. Tonda, ‘Nun kilapu ara, mikip mitik ning,’ tenepmunce, Allah arye bola koplobuka, kam pia una deiyok ning talye aresilya ara, ‘Nun ap, nun kilapu ap, neika dolonamabe,’ tenenamlume. Winibuka unamluluma deiyok ara, anyapmasin touk dipkoprop ulamunyopura, anggun Allah ati morolulum talak nirya ara, aning-aning nirya arye kum sekdongopsutue.

“Teleb ubuka umunye bukni, ikin ning delisinyake,” nyabuk yupu

⁸ Anyapmasin yupu sirya dakna ning ati nyapnusine. Anggun nirya ara, tonok kanye bobuka, talima dukdongobuka, teleb-telebuk ubuka neika unamlulume. Anggun weitcapu silip tonok kanye tenebuka, kanye delilanyakce, neika ulamak touk, anggunce yuk nang patalye ning ati, bico tenebuka melinamlume. Anggunce, yuk nang anggun ikin usilye ning ati, ‘Se aning ara, mambule,’ tenebuka bico tenelanamlulume. Tonda yuk nang sik amu tam umunce, nimalye arye neika unamlulume.

⁹ Yuk nang arye anggunti, malye upsikcopura, tamubuka kwang dakana meme. Tonda, yuk nang arye anggunti, yu bobuka malye yupu nyapsikcopura, tamubuka sikti, malye yupu kum nyalanamlulume. Bukni, “Allah arye, ‘Teleb ulinamsile’ tenen, Allah moronamsine,” nyabuka, teleb yupu uk, tamubuka nyanamlulume. Anggunce yuk nang ati, ‘Teleb yupu nyalinamak’ tenen, Allah arye wibuka yukupsuk anya arye, winimumnyopura, Allah arye teleb ulinamsile.

¹⁰ Anyapmasin yupu deiyok ara, Mazmur yupu noutamak sekik ning ara, ani. ‘Yata ninye do nirya, ‘Teleb-teleb ubuka pia unamap’ tenen, pataplye ninye ara, sik bidamang moubuka kalikilakirye, tenepce arye talye yupu nyana ap, malye yupu nyana ap, pia kum wininamake.

¹¹ Sik adiparyuk, ‘Malye un ning nirya batakuka, diksukum winin ninguk unyakce, ninye nirya ansinibuka, teleb ubuka neika unamap’ tenen, pi dobuka pil donamake.’

¹² ‘Wininamaka deiyok ning ara, ani. Ara, Allah el yupu kekebuka diksukumuk unyak ninye ara, Allah arye pia melibuka disulule. Tonda, sikce elti, moronyak ning nirya ara, pia moubuka kekelule. Bukni, sik malye-malye unyak ninye ati ara, Allah arye sik yupu seklirye, batakalongolule.’ (Mazmur 34:12-16)

¹³ Teleb winin ninguk patapsilibuk, anyuk talibuka ulamunyopura, yata ninye arye, ikin ning anggun nong deice deipsikirye, malye kipnamsiyak do?

¹⁴ Bukni, anggun telebuk ubuka upmunyopura, sik malye nang arye ikin ning anggun nong deice deipsikcopura, kanye deibuka, ‘Telebuka,’ tenenamlulume. Allah arye kanye deipsilirye, anggunti teleb updeipnamsil atia. Yata ninye do nirya, sikti, ilil kum unamsile. Tonda sik diba tenena kum nang arye ilil ulul ning ati ara, anggun diba tenena ninye arye aning ati ilil kum unamsile.

¹⁵ Ilil kum unamsil bukni, anggun talima noutamak ara, ‘Yesus Kristus na Deiyoknye eluk unamnile’ tenen, wibuka kintinilinamlulume. Anggun kanye talima ara, Yesus deiceuk delinamlulume. Sik asilenamsiak nang nirya ati ara, ‘Allah arye lyepnamnil’ tenen, ‘El deice kanye delinuna ara, laka nyabuka deipnamne’ tenen, kintinilinamlulume. Yesus el lyen yupu laka nyanamlum bukni, yuk nang nirya ati, si erebuka, nimalye aryuk nyanamlulume.

¹⁶ Allah diba tenelulum ning, laka nyabuka deilinamlum talak nirya ara, weik yupu weika arye nyana kum bukni, yuk nang nirya ati, si erebuka nimalye arye, laka nyanamlulume. Yesus Kristus talima dukdongobuka teleb ubuka, diksukumuk unamlulum bukni, malye yupu nyabuka lululinamsiak ninye ara, ‘Ailye upnamle’ tenen, anggun kanye talima noutamak ara, malye ning duknuna kum arye, diksukumuk unamlulume. Winilulumopura, yu arye lululinamsiak bukni, anggun ap, Kristus ap talima dukdongobuka ululumba, teleb winin ning eipsikcopura, alye unamle.

¹⁷ Allah arye, ‘Wininamak,’ tenesilye touk, malye una kum bukni, telebuk ubibyopura, yuk nang arye nun nong deice ikin ning deipsikcopura, ara telebe uka. Bukni, malye winipbibya deice arye, ikin ning nun nong deice deipsikcopura, ara malyeuka. Teleb ning ara, deiyok kum upmalibuk, ikin ning nun nong deice deipsikcopura, ‘Aning ara, telebe uka,’ tenepnamabe.

¹⁸ ‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.

¹⁹ Ura, kam bukeibukura, el kanye kam ulamukce, sik dilamikba, Allah arye wenen ak dongolamuk ninye, sik dam binuka, Allah yupu peterebuk.

²⁰ Allah arye wenen ak dongolamuk ninye ara, minop talak Nuh ulamuk talak noutamak ara, Allah ati yaniltalamik. Sikce Allah ati yaniltalamik talak ara, tukwak mutuku-mutuku nirya, weik mekwen deipnamuk talak atia. Atalak ara, Nuh birye weik mek lia yo kintinibuka dolamuk talak noutamak, Allah arye, ‘Aninye dib tenepting’ tenen, nimalye arye ulamu bukni, malyeuk ubuka Allah ati yaniltalamik. Nuh birye weik mek lia yo akunum dobukura, ninye weik kum bukni, Nuh el mapu nirya nukukap, pin barye ninyeuk mek lia yo aik pum wekikura, weik mekwen deibukce, mekwen deice amek lia yo dobuka erepdobuk deice, Allah arye aninyeuk lyebuk. Yuk malye ulamik ninye nirya ara, mekwen arye dibuka dibik.

²¹ Weik mekwen deice aninye lyebuka ara, ‘Dip tenepnamak’ tenena ati upsuke. Ara, diba tenebibibuk, Allah lyepsilyopura, mek dongolamsiaka atonun ulule. Dib tenebibibuk, mek dongosinyaka ara, nun nong bol deice nininga usilye ning, mek liksilirye, kum danalisulul bukni, mek dongopnusikce talak ara, na tenena kum arye, ‘Allah arye lyebuka melipnilibuk, malye un ning nirya batakuka diksukumuk unamne’ tenen, lak akarye nyanyabe. Mek dongolamsiaka deice arye kum lyesulul bukni, Yesus Kristus dibukura, Allah arye, Yesus kam bukeibuka deice aryuk lyesulule.

²² Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.