1 Korintus 8 - Eipomek

Talye ning bukni, ‘Nun ni koprop anya arye, si erebuka kipnamap’ tenen, arilamik din ning ati, nyabuk yupu

¹ Ara, na kayapu, aning ara, talye ning bukni, anggunce, ‘Nun ni koprop anya arye, si erebuka kipnamap’ tenen, tup ning kalibuka arilamak ning ara, yupu nyapnusine. Anggun Allah ati, dib tenelulum ninye arye, “Diptibye do, kum do?” nyabuka, asipdenulum yupu ara, nyapnusine. Aning nirya ati ara, nun nirya kel bikamupe. Bukni, luba kina kume. ‘Nunda weik kel ninye unyabe,’ tenelamak ninye ara, weik kanye erebuka kwalinyake. Wininyak bukni, yuk ninye ati, ‘Bico tenebuka melilanauk unamabe,’ tenelamak ninye ara, yuk nang ati, talima kwa dibuka melibikiba, nun nirya teleb upnin banyabe.

² Yatanye do nirya, ‘Nara, aning-aning nirya weik kelnye akunum unune’ tenen, kwalilinye bira, dipkoprop pia walwal ninye atonun tuba ulule. Allah arye nunti, ‘Kel bikikirye winibuka unamake,’ tenepsuk touk kum ulule.

³ Bukni, yata ninye do nirya, Allah ati sik kanye talima, el deiceuk delilamak ninye ara, Allah arye aninye, el kele.

⁴ Winira, talye ning bukni, ‘Nun ni koprop el si erepnamap’ tenen, kam ulul ning obuka, tup dobuka isa si sisibuka, delilamak ning ara, “Nun dib tenenyap ninye dena teleb do, kum do?” nyabuka asipdenulum ning ara, nyapnusine. Nun nirya akunum kel bikamupe. Dipkoprop Allah ara, el tonok ulule. Yuk Allah ton kum unyake. Aning ati ara, ‘Nun ni’ tenen, talye ning si erenyak ning nirya ara, talye ninguk ulule. Ara, nong kum upnamle ning, Allah atonun kum ulule.

⁵ Nun kele, yuk dib tenena kum ninye arye, ‘Nun ninye deiyoknye’ tenen, talye-talye ning si sisibuka erenyak ning weik aupmal. Anang arye, im deice ulul ning ap, tukwak mutuku noutam ulul ning ap, aning si erebuka, ‘Nun Ninye Deiyoknye Allah aulule’ tenen, meryi lebuka, aning siuk kinyake.

⁶ Sik dib tenena kum ninye ara, wininyak bukni, nun dib tenenyap nang ara, nun kele. Nun Ni Koprop Allah, el tonok ulule. Yuk ton pia kume. Elda Kam Una Deiyoknye ulula anya arye, el deice aryuk aning-aning nirya kintinipdeiamsuke. Winipsuka ati ara nunce, ‘Nun kam unyaba ara, Allah el si erena ap, el piluk dona ap ati, wininamabe’ tenen, unyabe. Aning atonun, nun Weik Ninye Deiyoknye tonokuk ulule. Elda, Yesus Kristus ulule. Allah arye nyabukba, Yesus pil dobuka deice arye, aning-aning nirya kintinibuka deiamsuke. Tonda, Yesus el pil dopsuka deice aniryuk, lyepdeipsuka ati, el mikip deice aryuk kam unyabe.

⁷ Winira, nun Allah ati dib tenenyap ninye ara, aning nirya akunum kel bikupu bukni, ninye mutuku-mutuku nirya ayupu moubuka min kum kel bikamik. Ton ninye ara, wini talak dib akunum tenebik bukni, mince Isa si ap, talye ning si ap, tabakuka pia erenauk ulamika anya arye, yuk nang arye, isa si erena ati, domba basam obuka, tup arilamikca dobuka, dinamak talak ara, ilil kanye bobuka, ‘Malye winibabe,’ tenenyake. Ara sikce, ‘Se, adomba tup ara, isa si erena ati arepmaka anya arye, isa el na tenen ning tuba ulule,’ tenenyake. Sik kanye talima noutamak, Yesus ati dib tenenyak mikip ara, naminuk ulula anya arye, ‘Aning diptinye do, kum do?’ tenen, teniltonauk ubica deice arye, ‘Se malye winipnyak’ tenen, ilil kanye bonyake. Wininyaka deice arye, sik kanye talima malye winililanyake.

⁸ Bukni, na kayapu. Din ning dinyap deice arye, Allah ap talima dukdongobuka neika kum unyabe. Din ning dibiya deice arye, Allah ara, ‘Anang ara teleb, anang ara malye,’ kum tenesulule. Yata din ning do nirya, aning dipbiya babye, kum dipbiya babye, adeice arye, teleb una ap, malye una ap, kum winililanyabe. Din dina ara, mambul pia kume. Aning-aning nirya ara, talye dena telebuka.

⁹ Allah el kanye ara, ‘Din ning ara, weik mambule,’ kum tenesulule anya arye, anggun dip tenen, ninye arye, pataplyeba, ‘Aning dipnune,’ tenepmunye touk, talye diptume. Winina ara, teleb bukni, winimunyopura, sik talima noutam, dip tenena ning kanye kum wisiamlye ninye eipsikirye, ‘Se, aning dinmaka ara, malye unyake do?’ tenepsiceura, anggun dib tenena deice arye talima akunum wisipsuk ninye babye, anang ati, ‘Malye kipdeipmunyak’ tenen, kanye moubuka unamlume, nyapsine. Ara, sik anang kanye wisina kabul talak ara, Allah el diksukum bisik balamikcak, yan dum duklirye, olamle touk, anggun kel nang arye, aning-aning nirya, talye dimunya deice arye, ‘Sik talima mikip ubuka kanye wisina kum unyak nang ati, malye kipdeipmunyak’ tenen, nyapsine.

¹⁰ Ayupu deiyok ara, ani. Sikda, ‘Adomba tup, isa si erepnuyap’ tenen, kwalibuka deipmace bukni, asi erenyak ning ara, dipkoprop ning kume. Tonda, ‘Dina dibibya deice arye, Allah ati kum yaniptibye’ tenen, akunum kel kiplum nang arye, aning deklamak aik wekuka dipmunyebuk, sik dib tenen ning ap, talima ap min kum wisilamlirye, walwal ulamle ninye eipsikirye, ‘Malye wininyak do?’ tenepsikirye, ‘Sik kanye talima boktoplilirye, walwal uplyak’ tenen, nyapsine. Ara, sik anang eipsikca deice arye, ‘Ura, yuk nang arye, isa ati arinyak ning, sik dib tenenyak nang arye, talye dinmak touk, nun babye dipnamape’ tenen, pi dobuka, aning dobuka dibicopura, aminyan ara sikce, ‘Se, nun malye winipmabe’ tenen, tenenmakirye, adeice arye, sik babye ilil kanye bobikirye, malye kililanyake. Ara, ‘Sik kel nang arye, mitik walwal tuba wininyak ninye ati, malye winilalulum’ tenen, nyapsine.

¹¹ Se, na kayapu, aninye atonun ninye ara, sik dib tenen ning ara, tuba kum wisiamlye nang babye, ‘Anang lyepnamne’ tenen, Kristus dibuk. Anggun weit yapu atonun ninye unyak bukni, anggunda aning nirya kel kiyamlumce, aning diplumba eipsikca deice arye, ‘Aning ara malye,’ tenenyak ning bukni, pi dobuka dibikcopura, adeice arye, anang sik dib tenen ning malye uplibuk, mikip ara, mitang upnamle.

¹² Aning laka nyapmasin touk, sik kel nang arye, Yesus ati dib tenebikbuk, sik du weit atonun unyak ninye bukni, sik dib tenen ning kum wisiamlye ninye ati, malye winiplumba, sik aninye arye, ‘Se’ tenen, mambul kanye bobikcopura, dipkoprop ara, anggun kel nang arye, Kristus ati malye kipreipmalume. Tonda anggun kel nang arye, sik kanye talima min kum wisibuk nang ati, sik talima malye kipreipmalume.

¹³ Aning ati ara, na kanye ara, ani. Sikce, isa si eren ati, aribice ning narye dipniba, na weit yapu nang eipnikirye, ‘Aning ara malye,’ tenenyak bukni, ‘Na eipnikca deice arye, talye dibikiba, malye kanye bobicak,’ tenenune. ‘Winibuka tenebicak’ tenen, nara, ‘Aminyan talak ara, aning tonap pia kum dinamne,’ tenenune. Ara, talye ati kume. Ara, ‘Na wininye ning deice arye, sik kanye talima min kum wisibuk ninye, anggun dib tenen ning malye updeipsicak’ tenen, nyapsine.