1 Korintus 7 - Eipomek

Paulus arye, kil dona ati, nyabuk yupu

¹ Winira, anggun surat sekeipnuluma deice arye, asipdenulum yupu ara, nyapnusine. Tonok ning ara, ani. Na kanye ara, sal arye, kil kum doptingce, kwityuk pia ulamtingopura, pia telebe, tenepne.

² Winibuka dipkoprop tenenun bukni, wini talak ara, ninye mutuku-mutuku nirya, talye-talye yoldana pia weika arye, wininyake. Wininyaka anya arye, ‘Weika arye tonap winibicak’ tenen, na kanye tamupnirye, yuk yupu nyapnusine. Teleb ning ara, sal nirya ap, kilapu nirya ap, tonok-tonok bukni, adiparyuk dopdakirye, neika unamake.

³ Kil domlinye birye, el kil koprop ati, ‘Yoptinye,’ teneplye talak ara, el dobuk kil arye, adiparyuk, “Telebe,” nyaptue. Aning atonun, sal dobuk kil arye, el akanye biti, ‘Yopnutue’ tenen, pataplye talak ara, el dobuknye birye adiparyuk, “Telebe,” nyaptue. Teleb ning ara, aninguka.

⁴ Sal dobuk kil, el nong ara, el damang aniryuk kum talildalule, el akanye birye ton el kil talilule. Aning atonun ton, kil arye, el dobuknye bira, el nong ara, el tonok aryuk kum talilule, el kil arye, ton el akanye talilule.

⁵ Kil dobuknye birye do, el dobuk kil arye do, atotouk, aning pataplye ati, morobicopura, “Kume, na like, kum winipnamnilame,” nyabuka kum batakdanamake. Aning ara, kum wininamlulume. Bukni, tonok deiyok ara, aning nyapdatiringe ara telebe. Ara, sik neika yupu talipdarikirye, “Kume, wini talak ara, yuk ning nirya tenena kum arye, Allah ati moronauk unamna anya arye, aning daupmale bukni, tia talak ati, urdemuk una telebe,” nyapdatiringe. Bukni, Allah moronmamunya ani, akunum winipmumopura, tuba tamubuka neika unamlulume. Aning ara, talye ati kum nyapsine. Ara, sik anang bitinye arye, tia talak ati loipdanuka batakdanamdica ani, ouku weik akunum uplyopura, aning pia tenebuka patapsilye talak ara, Isa Mutuku Dongonye arye, kanye talima pum tam weksilirye, adeice arye, ‘Se,’ tenebuka, aning ati teninmamunce, ‘Se,’ tenepmunyak ati, yuk ninye ap talye ubula yopdamunce, malye winipmunyak ati nyapsine. Ati ara, mandipna weik arye, yuk-yuk una meme.

⁶ Anirya nyapmasina ara, “Dipkoprop anggun nirya adiparyuk wininamlume. Yuk kume,” nyabuka, mem yupu atonun anggun deice kum nyapsine. Anggun yukuna ap, melina ap ati, ayupu nyapmasine.

⁷ “Kil dona ara, telebuka,” nyapmasin bukni, na kanye ara, Allah el mikip arepnuka deice arye, kil kum dopse bukni, mikip ubuka diksukumuk tuba unye touk, ‘Ninye nirya atonun winiptingtoura, telebe,’ tenenune. Utenenun bukni, Allah arye, yuk ninye nirya ati, ‘Kam nanguk pia unamak’ tenen, el mikip na arepnuka atonun kum arilule. Ton nang ara, amikip aresulule. Yuk nang ati ara, ‘Yuk Pil donamniak’ tenen, yuk mikip deiyok ning arilule.

⁸ Ara, sik kil kum domikce nang ap, ninye kum domikce kilapu ap, tonda youwak kilapu ap ati, ayupu nyapnusine. “Na kamnye binyuk unye touk, anggun babye, kam ninye atonun utibirye, Allah el piluk doptumopura, aning telebe,” nyanune. Na Paulus arye, nyapsine.

⁹ Nyanun bukni, aninye ara, ‘Se, nun talima kalikildana ara, mikip kum unyabe. Talyeuk ulamibya ani, aning pia patapsilye talak ara, teleb ubuka mikip arye, kum kalikdatibye. Na malye upnyak’ tenen, malye kanye bomuk ning ara, kam ninyeuk kum unamake. Ato ninye ara, kil dona telebe. Aning pia pataplye ninye ara, ‘Malye ubicak’ tenen ati, kil dona telebuka.

¹⁰ Ara, sik kilapu akunum domikce nang ap, sik Sal akunum domikce Kilapu ap ati, ayupu nyapsine. Dipkoprop ara, naryuk kume, nun Deiyoknye Yesus arye, nyasulule. Yata kilapu do nirya, sik akunum ninye domikce kilapu ara, sik akanye yapu batakana meme.

¹¹ Kilapu akunum ninye domik bukni, batakanyak kilapu ara, yuk nang ton pia kum doptinge. ‘Pia weluk kum unamne,’ teneplirye, el mince akunum domuknye koprop ap, yupu taliprikirye, sik yu wamlye ning lak nyabuka batakdarikirye loploprikirye, tamubuka el mince domlinyebuk dona telebe. Aning nyapmasin touk, sal arye, sik domikce kilapu batakana meme.

¹² Ura, yuk kilapu ap, sal ap ati ayupu nyapsine. (Ara narye, “Yesus arye, nyapsuk yupu ara ani,” nyabuka kum nyapsine.) Yata dib tenebuknye do nirya, el dib kum tenyamuk talak arye, domuk kil ara, dib tenena kum kil bukni, akil arye, “Nun neika una telebe,” nyabuka kanye deibuka ulyopura, anye birye akil kum bataknamle.

¹³ Aning atonun yata kil do nirya, el dib tenyamuk talak arye, domuknye bira, dib tenena kumnye bukni, anye birye, “Telebe, nun neika una ara, telebe,” nyabuka kanye deiplyopura, akil arye, anye bira kum bataknamle.

¹⁴ Anyapmasina ara, talye ati kume. Deiyok ani. Allah el kanye ara, ‘Akilapu ara, minop dib kum tenyamik talak arye, dib tenena kum nang domik bukni, wini talak ara, akilapu dib tenebika anya arye, sik akanye yapu babye, na tenen ning unamake. Sik neika unyaka ara, malye gume,’ tenesulule. Aning atonun, anang ara, minop dib kum tenyamik talak arye, dib tenena kum kilapu domik bukni, wini talak Allah ati, dib tenebika ati ara, sikce domik kilapu babye, Allah el na tenen ning unamake. Sik neika unyaka ara, malye kume. Allah arye, winibuka tenesulule. Allah arye, aning kum tenelamtuopura, talye yoltakanyak kilapu anya arye, sik delinyak mapu ara, malye mapu uptinge. Bukni, wini talak Allah ati diba tenebika ati ara, Allah arye aning tenesulula anya arye, Allah el kanye ara, ‘Aninye sikce delinyak mapu babye, telebe uk,’ tenesulule.

¹⁵ Sal do, kilapu do, dib kum tenenyak bukni, anggun dib tenelulum ninye min arye akunum domlumba, “Nun neika una ara, telebe,” nyaptingopura, telebuka. Batakana meme. Bukni, sik dib kum tenenyak kilapu do, sal do, sikda anggunce, “Nun kume, sikda batakuka yuk bindopnamabe,” nyabuka bataksikcopura, anggun dib tenelulum ninye arye, “Telebe dabilulume,” nyanamlulume. Pia pi kwatibuka kum donamlulume. Allah arye, nunti, ‘Yu ubuka waldana kum aniryuk, kanye deibuka telebuk unamake,’ tenepsuke. Ati, atonun nang arye, bicopura, tonap pi dobuka dobolbinamlum do, kum do? Kum nyapsine. Anggun kanye aryuka.

¹⁶ “Sik dib tenena kum kilapu ap, sal ap, kum batakdanamlume,” nyapmasina deiyok ara, anggun walwal bukni, anggun dib tenelulum ninye arye, diksukumuk winimunya deice arye, aninye eipsikirye, aminyan dib tenepnamak do, kum do? Aning ara, kum biktibye anya arye, akunum dopdanamunye ninye ara, batakalana kume nyapsine.

Paulus arye, “Malnye kum bukni, min arye, dolamse pil batakuka, yuk pil dopro unamne do, tenena kume,” nyabuk yupu

¹⁷ Arup nyapmasin yupu aupmasil bukni, yuk ning ton nyapnusine. Ara, anggunce asipdenulum ning ara, nyapnusine. Yesus min dib kum teneplum talak, malye winina kum bukni, pil dobuka ulalumce, dib akunum tenepmunyopura, ‘Min arye, dolamse pil batakuka, yuk pil dopra unamne do?’ tenena kume. Allah arye, ‘Awinin ning ap, apil ap donamak’ tenen, wipdeiamsuk touk, aninguk talibuka wininamlulume, nyapsine. Aning nyapmasin touk, mutuku-mutuku nirya, Allah ati dib tenenyak ninye nirya ati, “Talibuka wininamlume,” nyabuka, ayupu uk peterepnabuk, kekebuka dobolbanyake.

¹⁸ Winipmanto ning ton nyapnusine. Tonok Yahudi yalanye bira, Yesus min kum dib teneplye talak ara, Yahudi yala ninye winilamak touk, el den bam bol akunum seklyopura, aminyan Allah arye, elti, yukupliba, dib teneplyopura, elce, ‘Se, den bam bol mouse ning seknika dil ara, yata wiribuka arye, kum datu do?’ tenen, malye kanye bona kume. Aning atonun, yuknye bira, dib kum teneplye talak ara, el den bam bol kum sekika ati, akunum dib teneplyopura, ‘Se, na den bam bol mouse ning seknitinge,’ tenena kume.

¹⁹ Den bam bol mouse ning sekenyak nang babye, sekna kum nang ababye mambule kume. Allah arye, “Wininamlume,” nyabuka, el yupu arepsukce nyasilye touk, ayupu uk kekebuka dobolbanauk ara, aning ara weik mambule. Yuk ning nirya ara, mambule kume.

²⁰ Yata ninye do nirya, Allah arye, ‘Anye bira dib tenepnunil’ tenen, yukupsiliba, malye winina kum bukni, dib tenebice talak, pil dobuka winilamak touk, aninguk talibuka pil donamake.

²¹ Winipmanto ning nyapnusine. Anggunda, yo bok deice dekikirye, “Pil dopsilulume,” nyabuka pil urdem aryuk dolamak ninye ulalumbuk, Allah arye, ‘Diba tenepnamak’ tenen, yukupsukba, dib teneplum do? Pil dolulum bukni, dekna ning kum dololulum ninye ululum ninye ara, anggunce, ‘Se, nunda, yo bok deice deksik nang unyaba anya arye, yata wiripnuyap do?’ tenena kume. Ilil kanye kum bonamlulume. Deksik nang arye, bataksikceba, talye ninye utumopura teleb bukni, kum bataksikiba talye kanye bobuka kum utuma babye telebuka. Aning ara, mambul kume.

²² Ayupu ara, talye kum nyapsine. Deiyok ani. Yo bok deice dekikceura, Pil urdem aryuk donyak bukni, Allah arye, yukupliba, dib tenebiceura, adeice arye, nun Deiyoknye Yesus arye tapu lopdeipsiliba, sik talima noutamak ara, talye balamak ninye atonun banyake. Aning atonun, ton nang ara, talye balamak bukni, Allah arye, yukupliba, dib tenebiceura, adeice arye, Kristus el pil melin nang unyakba, elce nyalye yupu uk kekebuka, el piluk donyake. Talye kum unyake.

²³ Allah arye, weik mambul dekna weik ning deice arye, deksuka ati, yuk talye ninye amu tam bukuka, sik nyapsikce touk, ‘Ayupu uk kekebuka, sik piluk donamape’ tenen, kum unamlume. Allah elcuk talisulule. Ninye arye, kume.

²⁴ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Nun nirya winilamibya ani, aminyan talak ara, Allah arye, nun nirya ati, asipsilirye, yupu lipsisikuka bokeipnamsile anya arye, Allah arye, anggunti, ‘Diba tenepnamak’ tenen, yukupsuk talak malye winina kum bukni, pil dobuka winilamlum ning atonun, apiluk dopmunce, Allah ap talima dukdongobuka unamlume.

Sal ap, kilapu ap, min kum dopdanamikce ninye ati, nyabuk yupu

²⁵ Ara, anggunce, “Sal ap, kilapu ap, min kum dopdanamik ninye ara, yata wiripnamak do?” nyabuka, asipdenulum ning ara, na Paulus arye, nyapnusine. Aninye ati ara, nun Deiyoknye Yesus arye, “Winipnulyam, winipnulyam,” kum nyapnuk bukni, Allah arye bicoe tenepnukce, melyamnukba, adeice arye, dib tenepmantonye ununa anya arye, na kanye aryuk tinipse ning ara, nyapnusine.

²⁶ Ara, na kanye ara, sirya talak ikin weik upnamsil ning ara, akunum dam upmasile ati, ikin unyabe. Aning ati ara, anggun wini talak umunya atonun, winibuka aninguk unamlume. Utenesunune.

²⁷ Ati, kil akunum dolum ninye ap, sal akunum dolum kilapu ap, ‘Nun kilapu bataknuyap do? Nun akanye yapu bataknuyap do?’ tenena kume. Anggun kilapu, min kum doplum nang ara, ‘Dan tam kil dopnaman do?’ tenen, morolbana kume. Wini talak akunum ulalum touk, anyuk unamlume.

²⁸ Winibuka nyapmasin bukni, anggun sal arye, aminyan ara, kil dopmunyopura, malye kum winipnamlume. Tonda, kam kilapu arye, aminyan ara, sal dopmunyopura, malye kum winipnamlume. Malye kum wininamlum bukni, tukwak mutuku unamap talak noutamak arye, sal ap, kilapu ap dolalamak ninye ara, aminyan talak ara, kanye imun ning weik unamle ati, ‘Aminyan talak ara, ikin ning weik upsilyak’ tenen, nyapsine. ‘Kanamuk tuba utumba, ikin kum unamsil’ tenen, nyapsine.

²⁹ Na nyapmasin yupu dukdongobuka lak arye, kibuka laka nyapnusine. Deiyok ani. Ara, Yesus dib teneluluma ati, nun du weit atonun ululum ninyeo, anggun sal babye, kilapu babye, anggun nirya ati nyapsine. Yesus tamubuka dolyanamsil talak sirya talak ara, akunum dam upmasil anya arye, ‘Tukwak mutuku unamap talak ara, akunum sirya daknin banmabe,’ tenepmana ati, nyapsine. Wini talak arye, diprongobuka, dolyanamsil talak noutamak nirya ara, kil akunum domik nang arye, sik kilapu patalul ning atibuk, ‘Yata winipnun do?’ tenebuka, kanye dipibuka kum unamlume. Sik kam nang tenelamak atonun, mitik atonun tenenamlulume. Deiyok ara, Yesus tamubuka yanamle ning ara, weik mambule. Yuk tukwak mutuku noutamak ulul ning nirya ara, mitik mambule ati nyapsine.

³⁰ Aning atonun, anggun ikin kanye bobuka engemunye ninye ara, engena kumce, kanye deibuka unamlulume. Anggun kanye deibuka pin-pina asa ululum ninye ara, aning batakuka, urdemuk talye kanye bobuka unamlulume. Anggun bona dekuka dolamlum ninye ara, ‘Adekmanunye ning ara, tia talakuk dopropmane’ tenen, unamlulume.

³¹ Ayupu nirya nyapmasina ara, deiyok ani. Ara, wini talak dinyabuk, atukwak mutuku ulul ning nirya ara, atalak ulye touk, pia weik tonun tonap kum unamle. Aning nirya, akunum kum upnin banmala ati, ayupu nyapmasine. Aning ati ara, yata yala ning do nirya, tukwak awablye ning nirya talibuka, pil dolamak ninye nirya ara, aning ap, apil ap, aninguk tenebuka kum wininamlulume. ‘Aning-aning nirya ara, tia ning uka,’ tenebuka unamlume.

³² Ara, sal arye, kil doldana yupu ati tonap nyapnusine. Sirya talak akunum dam yanamsila anya arye, anggunce aning-aning nirya ati, ‘Se yata wiripnun do?’ tenen, ‘Mambul kanye bobuka kum unamak’ tenen, pataniliba, nyapmasine. Kil min kum dopmakce nang ara, Yesus el piluk tenebuka, el ning atibuk pia moubuka tenenauk unyake. Ara, sikda, ‘Se, yata teleb pil doptinyeba, Allah arye, kanye deipnamnil do?’ tenenauk unyake.

³³ Kam nang arye, wininyak bukni, kil akunum domik nang ara, tukwak mutuku ulul ning, aning-aning ati, ilil kanye bobuka unyake. Ara, ‘Se yata pil dopnun do? Yata ning arepnibuk, na kil arye, kanye deipnamnil do?’ tenenyake.

³⁴ Winibuka tenenyaka deice arye, ‘Mambul weik ning ara ani’ tenen, tenebikcopura, sik kanye bitinilule. Kanye bokoltonauk unyake. Aning atonun kum bukni, sik ninye kum domik kilapu ap, kam kilapu ap ara, nun Deiyoknye Yesus, el piluk tenebuka, el ning atibuk pia tenenauk unyake. Sik kanye ara, ‘Kume, nun nong ap, nun kanye talima ap nirya, Allah el piluk dopnamap’ tenen, ‘Sik kanye el deiceuk delinamabe,’ tenenyake. Utenyakce wininyake. Sik kam kilapu ara, wininyak bukni, ninye akunum domik kilapu ara, tukwak mutuku ulul ning ati, ilil kanye bobuka unyake. Ara, ‘Se yata pil dopnebuk, na kanye birye kanye deipnamnil do?’ tenenauk unyake.

³⁵ Ara, na kayapu, narye, ‘Kume, anggun patapsilye ninguk winipmunyak’ tenen, narye, ‘Yupu seknun’ tenen, kum nyapmasine. Aning kum bukni, ikin upnamsil talak noutamak arye, kanye bokoltona kum aniryuk, ‘Allah el piluk donamabe. El mambul ninguk tenebuka unamabe,’ tenebuka, diksukumuk ubikirye, ‘Sik ning nirya telebuk unamak’ tenen, nyapmasine. Arup nyapmasin yupu deiyok ara, aninguka, yuk ton kume.

³⁶ Ayupu nyapmasin bukni, aning ton nyapnusine. Yatanye do nirya elce, ‘Akil doptinye’ tenen, kanye tenelul kil moun dilul kil ati, ‘Se, akunum doptinye’ tenen, ‘Pia patapniliba, malye upnyak’ teneplyopura tonda, ‘Na tenenun kil ara, akunum wisi danmala anya arye, akunum doptinye,’ teneplyopura, aning ara, malye kume. Akil akunum doptue. Adeice arye, malye kum upnamle.

³⁷ Bukni, yuknye birye, ‘Kume, akil ara, moun dilul bukni, Allah el ninguk tenebuka pil donamne,’ teneplinye bira, yuk nang arye elti, “Nunce winipnulyam nyanyap touk adiparyuk winipnulyam,” nyabuka mikip arye, kum nyabikcebuk, kil patalamlye babye, ‘Kil talye yopnyak’ tenen, el bidamnye aryuk el babye ati, dipdanmantonye bira, anye birye kil kum doptu babye, teleb aryuk unamle. Aning deice arye, malye kum upnamle.

³⁸ Aning ati ara, na kanye ara, ani. Kam kil doplinye bira, malye kum ulule. Teleb upnamle. Bukni, kil pia kum doplinye bira, na kanye ara, elce weik teleb upnamle.

³⁹ Yata kilapu do nirya, sik domikce ninye akunum dibicopura, akunuma. Akunum dipmala anya arye, akil el teneplinye binyuk doptue. Yuknye doptu bukni, talye ululnye, dib kum tenelulnye kume. Allah akunum dib tenebuknye binyuk dona telebe.

⁴⁰ Na kanye ara, el akanye diplyopura, teleb ning ara, youwak kiluk pia uptue. Youwak kiluk utopura, pia kanye deibuka unamle. Ninye ton doptopura, mitik kanye ikin arye, unamle. Tonda, na kanye ara, ayupu nyapmasin touk, Allah El Dib Kanye arye, aning atonun tenelule, tenepne.