1 Goriinto 7 - NEAJEEDA EESH BEA BUUNEESSEAN

Iitta geeshshooda

¹ Asi aba iitta ng'asheekka ghayi oang'warjiin. Ghang'wana ng'eedeeda aamwasada gatmooda.

² Iiduu aba simsimda ea ng'asheega mealuuleega, gilinyoo ea ng'eedeeda gil gagasa gwandeawa gatmoadaannyi, nea giliwas gatmu gagasa gwandeawa siyeadaannyi.

³ Ng'eedeeda dandeayeatta gatmoadaannyi gittoobiiwusa aba jeeda gheeda, ak gwasnu eara gatmooda aba heeda siyeadaannyi.

⁴ Asi gatmooda meabala saseadaannyi, goobal siyeadaannyi; ak gwasnu eara siyeeda meabala saseadaannyi, goobal gatmoadaannyi.

⁵ Adooheewachchi geat inyeessa gooneaji damanda, ak abeeda ghoanyaschi gheatta mooshta Aseetta; ak iiduu goobiiksiinnyi gichcha, ak amwanyasa Shattaani gheatta gichchea gwasimdaneegwa imandaneegwa gheadeenda.

⁶ Asi geargu ng'asheesu nea geagoonyi gheatta, nea mii digheanda gil.

⁷ Nea gidagwachchi aabwariiydi aniini gideaballi gawuurjeewean buuneessean, amaduu gaba siisi nyas gidaghayi miy sajaada adaw Aseetta, siisi geattaw gili nea niirja geattaw gilnuut.

⁸ Ak geayeeshshi fuga mii gageeshshi ea masiinng'weega ghang'wana gwandeawa siida geaw gawuurjeewean aniini.

⁹ Amadeappa ghwaraay giingng'ooydeaba geat, ea dageeshshi. Aba gideaba ghang'wana gageeshshi mwasamwa gideaba gayghaghwarda geawunda gheang'da.

¹⁰ Ak gaydarukusa fuga nigeeshshi, ak ea mii aniini Ng'uttamiida gil, gatmooda adagwaheelli sea siyeadaannyi,

¹¹ (amadeappa gwaheelli, ea deabideada nea gaba geaw, ghana gabiikta gwaneaji sea siyeadaannyi), ea gideaba siyeeda adaghwanung' gatmoadaannyi.

¹² Nea buuneeda suurja gearukusi aniini mii Ng'uttamiida gil gideaba iimida oorjeeda giyeanya wassean mideawa gatmooda mandeawana masaweega, ak ghamwas gideaba gay gwandeayi sea niny adaghwanung' gatmoani.

¹³ Nea gatmooda mideawa siyeeda mandeawana masaweega, nea ghamwas gideaba gaygwandeawa Gatmoani, ea adaghwanung'sa heeda siyeadaannyi.

¹⁴ Aba gideaba ng'eedeetta mandeawana masaweegean gajeammiidu appadayda gatmoodaannyi, ak eara gatmootta mandeawana masaweegean gajeammiidu appadayda siyeadaannyi. Ghwanyawa iimasunu diibigeagwa gajeamiimiyaas, amaduuku ghamneawa ea ghaydidi.

¹⁵ Nea fuga nigeennyi mandeawana masaweega igasa ghwadarda, ea dadarda; aba sareani oorjeediyya ea hudiyya ea mii radeadi. Aba gideaba Aseetta gaguurneasa aba hooyyooh.

¹⁶ Gatmooda ginaldiin ang'iing'i ea jea lealni siyeadaang'u? Ng'eedeeda gaynaldaan ang'iing'i ea jea lealni gatmoadaang'u?

Abiideatta gidaguurdeaydaneey Aseetta

¹⁷ Giduurji sean daba siisi abiideatta gidaghayi goondaneey Ng'uttamiida giibinda, ea gidaguursiinda Aseetta. Ak nii ea gidearukkwiidi aba jeeda ganiisajeega sean gil.

¹⁸ Heappi siida iissa geaghus eguursa nea siyaat ghasmeahooda? Asi adagageanda girooraneeda ghasmeahooda. Siida damanda siguursiina mii gawa ghasmeahooda? Asi adagagasa ghasmeahooda.

¹⁹ Beatta ghasmeahooda mii gili ak siida meayaada ghasmeahooda ea mii gili, geaghus ging'ng'ooyda digheanda Aseetta.

²⁰ Daba siisi abiideatta gidaghayi bea mwadi suguursiinda.

²¹ Ang'iing'i ghayi geeguurneey nea guwosi ging'ng'oonyaneeda? Adiiduubayi. Asi iimmuusi gideaba gajabala geaw, ada abeeda ghwahit.

²² Aba gideaba siida siguursa aba jeeda Ng'uttamiida nea ging'ng'oonyaneeda gil, siisi goobal geaw aba heeda Ng'uttamiida. Gwasnu eara siida suguursa nea goobal geaw niny ging'ng'oonyaneedda Gristo.

²³ Agooga geashaheagwa aba sheayeeda haw; adeahuuyi ging'ng'oonyaneemba sih.

²⁴ Asi fuga eaduupcheewi, damanda wassean siguursiina siida, gagasa gwandeayi sea Aseetta.

Iitta fuga mii gageeshshi ea masiinng'weaga

²⁵ Asi ghamneawa aba fuga miigageeshshi, meandeawani digheanda Ng'uttamiida, geargu aba fughareedeanyu aniineeda nubwaydanaan Ng'uttamiida aba gideaba geawoschi doabiiwaat.

²⁶ Ghaaghanyi iyeang'ulayi aba sawanadeeni bea ghamneawean ghwahit gideaba siida gaygoobiideatta giduurji bea ghaneawa.

²⁷ Heappi niratteey geeshshooda? Adigasayi gideaba gajabala geaw. Ang'iing'i giibali geaw mii geeshsheena? Adiiduu gigasayi geeshshooda.

²⁸ Asi igeeshshi, ea misni riing'eeda, nea eara huda iisighi ea masna riing'eeda. nea fukka geshshiin gayghwanyas sawanaduutkka ng'eanyiida, ak gaydaweasaneegwa gili.

²⁹ Geayii fugea eaduupcheewi, damanda sigasa nineekkiit muuchchi; ghang'eada ghamneawa ak gagal mwadi fukka mideawa gadeemgean gidabal gobiideatta fuga mandeawana,

³⁰ nea fuga giisan ea dawuurji gili magiisana, nea fuga hoosan ea dawuurji fuga mahoosana, nea fuga shaah haleanjeeda ea dawuurji fuga mandeawana haleanjeeda,

³¹ nea fukka mideawa gadiyeeda aba jeeda ng'eanyiidean ea dawuurji fuga masna gil. Aba gideaba haleanjeeda muunda ng'eanyiida gay ghang'atta.

³² Geagasayi oppala geat aba deawiitmeeda. Siida mii gageeshshi iissa gwadeawiissa ngasheega Ng'uttamiida, gida jea gohoosanda Ng'uttamiida;

³³ nea siida nigeeshshi iissa gwadeawiit aba ng'asheega muunda ng'eanyiida, was gichchea goohoosanda gatmoadaannyi,

³⁴ nea gidagasa ea nibearshi. Nea gatmooda meegeenna ghana huda iissa gwadeawiit appadayda Ng'uttamiida, gichchea ghoawaatta siida ghaydit aba saseeda ea guroorooda; nea gatmooda sigeena iissa gwadeawiit appadayda haleanjeeda ng'eanyiida, gichchea gohoosanda siyeadaannyi.

³⁵ Geargu ng'asheanji ak abeeda ghoanyagaadi, ak ea mii gideaba ghaghuumnyeegwa agooga, geagasayi gideaba gajooppiidana jeeda doobiiwanatta ea naweeda miy ak ghaghu mooshteang'wa mabwaasha aba heeda Ng'uttamiida.

³⁶ Asi siida idaah gideaba masissiina huda jea ghaghi gidahaguuw, nea geawundaannyi bea gheang'da gwandeawa uurda, ak ea mayghwashiy gidagasa, gidabal gwasin gitta gasean: ghang'wana gageennyi, masna riing'eeda.

³⁷ Nea siida wassean hang'waanyiit aba jeeda gurooroadaannyi, ak ghanyea mediing'siina nea ghoammu ghoadeal gitta gasean, ak ea nimanya aba jeeda gurooreadaannyi, gideaba gaygwandeawa ghoaw gatmoadaannyi, abeeda ghoadoabiiw.

³⁸ Nea eara siida adayda hudaannyi ghoadoabiiw; nea dea meaghi ghoadoabiiw muuchchi.

³⁹ Gatmooda aradaat iduugwanda siyeadaannyi. Amaduu nea nimi siyeadaannyi, ea niibal geaw ak ghoammu ghaghi siida gasa niny, ak geaghus fuga mida jeeda Ng'uttamiida.

⁴⁰ Nea aba girgweageedeanyu gaygahoosan ak gang'wana muuchchi inyeeda goobiideada ameaghi. Aba gideaba earaniini iyeang'ulay geandeawi Guroorooda Aseetta.