Marcos 12 - DIOSPA QHELQACHISQ

Millay sonqoyoj llank'ajkunamanta rijch'anachina

¹ Chay qhepata Jesús rijch'anachinanejta runakunaman yachachiyta qallarerqa: Uj runa jallp'anpi uvata mallkiykusqa, chaytataj perqawan muyuykuchisqa. T'oqota allaspataj, uva ch'irwanata ruwasqa, qhawananpajtaj uj torreta sayarichisqa. Chantá uva huertanta partidopi qospa, karuman ripusqa.

² Uva pallana p'unchay chayamojtintaj, huertayoj ujnin kamachinta kachasqa, chay llank'ajkunamanta paypata kajta jap'inanpaj.

³ Llank'ajkunatajrí chay kachata jap'ispa, maqaykusqanku, ch'usaj makillatataj kachapusqanku.

⁴ Chaymanta huertayojqa waj kamachintañataj kachasqa. Llank'ajkunarí paytapis rumiwan ch'anqaykusqanku, jinaspataj uman jusk'usqata, p'enqayta kachapusqanku.

⁵ Chantá huertayoj waj kamachitañataj kachajtin, paytapis wañuchisqanku. Chaymanta qhepamantaj waj kamachikunatapis kachallasqataj. Chaywanpis llank'ajkunaqa wakinta maqasqanku, wakintataj wañuchisqanku.

⁶ Chay jinapi tukuypa qhepanta huertayojqa may munasqa churintañataj kachasqa, kay jinata yuyaspa: Churiytaqa respetanqankupuni, nispa.

⁷ Chaywanpis llank'ajkunaqa ninakusqanku: Huertayojpa churin kayqa. Pay kay huertata chayaqeta jina jap'enqa. Chayrayku payta wañuchinachej, uva huertataj noqanchejpaj kanqa, nispa.

⁸ Ajinamanta huertayojpa churintaqa jap'ispa, wañuchisqanku, ayantataj uva huertamanta jawaman wijch'umusqanku, nispa.

⁹ Chantá Jesús payta uyarejkunata taporqa: Imananqataj uva huertayojri? Pay jamuspa, chay llank'ajkunata wañurachenqa, huertantataj wajkunaman qonqa, icharí?

¹⁰ Manachu kayta Diospa Qhelqachisqanpi ñawirerqankichej? Ajinata nin: Wasi ruwajkunaj qhesachasqanku rumeqa cimiento esquinapaj sumaj rumiman tukupun.

¹¹ Chayqa Tukuyta Kamachej Diospa ruwasqanmin, noqanchejtaj t'ukuspa qhawanchej, nispa.

¹² Chantá Jesuspa awqankuna payta presochayta munarqanku, chay rijch'anachinawan paykunaj contrankuta nisqanta yachaspa. Chaywanpis runakunata manchachikusqankurayku, ripullarqanku.

Impuestota paganamanta tapunku

¹³ Chay qhepata judiokunaj kurajninkukuna Jesusman kachamorqanku wakin fariseokunata, herodianokunatawan, ima nisqanpipis Jesús pantajtin, chaymanta ch'ataykunankupaj.

¹⁴ Chaykunataj jamuspa, ajinata nerqanku: Yachachej Wiraqochi, cheqan sonqo kasqaykita yachayku. Qanqa mana runaj parlasqanta kasunkichu, nitaj runaj uyanta qhawarispallachu imatapis ruwanki, manachayqa Diospa munayninta kasunamanta cheqanta yachachinki. Chayrayku niwayku ari: Allinchu kanman Romapi kuraj kamachej Cesarman impuestota pagana, chayrí manachu? nispa.

¹⁵ Jesusrí puraj uya kasqankuta yachaspa, paykunata nerqa: Imaraykutaj pantachiwayta munankichej? Denario phisuta jaywawaychej qhawanaypaj, nispa.

¹⁶ Denario phisuta jaywajtinkutaj, Jesús taporqa: Pejpa uyantaj, pejpa sutintaj kay denario phisupi churasqa kashanri? nispa. Paykunataj kuticherqanku: Cesarpata ari, nispa.

¹⁷ Jesustaj kuticherqa: Jina kajtenqa, Cesarpata kajtaqa Cesarman qopuychej. Diospata kajtatajrí Diosman qopuychej, nispa. Paykunataj chayta uyarispa mayta t'ukorqanku.

Wañusqakuna kawsarimunankumanta tapunku

¹⁸ Chantá saduceokunañataj Jesusman jamorqanku. Paykuna nej kanku wañuymanta mana kawsarimuy kasqanta. Chayrayku Jesusta taporqanku:

¹⁹ Yachachej Wiraqochi, Moisés ajinata kamachiwarqanchej: Casarasqa qharichus warminwan manaraj wawayoj kashaspa wañupun chayqa, wawqen chay warmisapawan casarakuchun, ajinamanta wañoj wawqenpa miraynin ama chinkananpaj, nispa.

²⁰ Uj kuti qanchis wawqekuna karqanku. Kuraj kaj casarakorqa, chaymantataj wañuporqa, warminpi mana wawayoj kaspa.

²¹ Chantá, qhepan kaj wawqenñataj chay warmisapawan casarakorqa. Paypis kikillantataj mana wawayoj wañuporqa. Ajinallatataj chaypa qhepan kajpis chay warmisapawan casarakullarqataj. Paypis mana wawayoj wañupullarqataj.

²² Ajinamanta qanchisnintin chay warmiwan casarakorqanku, tukuyninkutaj chay warmipi mana wawata rejsispa wañuporqanku. Qhepanejmantaj warmipis wañupullarqataj.

²³ Niwayku ari: Qanchisnintin paywan casarakojtinku, wañuymanta kawsarimuy p'unchaypi chay warmi mayqenpa warmintaj kanqari? nispa.

²⁴ Chantá Jesús paykunaman kuticherqa: Qankunaqa pantashankichej, mana Diospa Qhelqachisqanta, nitaj Diospa atiyninta yachasqaykichejrayku.

²⁵ Wañojkuna kawsarimojtinkoqa, qharipis, warmipis manaña casarakonqankuchu, manachayqa janaj pachapi angelkuna jinallaña kanqanku.

²⁶ Wañusqakuna kawsarimuyninmantaqa, manachu ñawirerqankichej Moisespa qhelqasqallanpitaj imatachus Dios lawrashaj t'ankar sach'amanta parlamusqanta? Pay nisqa: Noqaqa Abrahampa Diosnin kani, Isaacpata, Jacobpata ima, nispa.

²⁷ Diosqa mana wañusqakunaj Diosninkuchu, astawanqa kawsajkunaj Diosninku. Chayrayku qankuna pantasqapuni kashankichej, nispa.

Kuraj kaj kamachisqa

²⁸ Chaypacha Diospa kamachisqanmanta ujnin yachachej uyarerqa imaynatachus Jesús saduceokunaman allinta kutichisqanta. Chayrayku, Jesusman qayllaykuspa, taporqa: Diospa tukuy kamachisqakunamanta, mayqentaj aswan kurajri? nispa.

²⁹ Jesustaj kuticherqa: Tukuy kamachisqakunamantaqa kaymin aswan kuraj kajqa: Israel, uyariy: Tata Diosninchejqa uj k'ata Diosmin.

³⁰ Tata Diosniykitaqa tukuy sonqoykiwan munakunki, tukuy almaykiwan, tukuy yuyayniykiwan, tukuy kallpaykiwan ima, nispa.

³¹ Qhepan kaj kamachisqataj kay jinata nin: Runa masiykita qan kikiykita jina munakunki, nispa. Chay iskay kamachisqakunamantaqa mana aswan kuraj kanchu, nispa.

³² Chayta uyarispa, Diospa kamachisqanmanta chay yachachej nerqa: Yachachej Wiraqochi, allinta ninki uj k'ata Dioslla kasqanta, paymanta jawataj waj dios mana kanchu.

³³ Chantá Diosta tukuy sonqonchejwan munakuna, tukuy yuyayninchejwan, tukuy kallpanchejwan ima, jinallataj runa masinchejtapis noqanchejta jina munakunanchej tiyan. Chaymin aswan uywa ñak'asqa q'olachinamanta, Diosman waj jaywanata jaywanamanta ima nisqaqa, nispa.

³⁴ Chantá chay yachachej allinta kutichisqanmanta, Jesús payta nerqa: Diospa kamachiyninman yaykunaykipajqa tumpallaña kashan, nispa. Manañataj pipis astawan tapoj churakorqachu.

Pejpa churintaj Cristori?

³⁵ Jesús Temploj pationpi yachachishaspa, taporqa: Imaraykutaj Diospa kamachisqanmanta yachachejkuna ninku Diospa kachamusqan Cristoqa Davidpa Churin kasqantari?

³⁶ Kikin Davidqa Santo Espiritunejta nerqa: Tata Diosqa Tukuyta Kamachejniyta nerqa: Kay pañaynejpi tiyarikuy, awqaykikunata chakiyki uraman churanaykama, nispa.

³⁷ Sichus David Diospa kachamusqan Cristota nerqa: Tukuyta Kamachejníy, nispa chayqa, imaynamantataj chantá Cristoqa Davidpa Churin kanmanri? nispa. Ajinata Jesús yachachishajtin, ashkha runakuna payta kusisqa uyarej kanku.

Jesusqa Diospa kamachisqanmanta yachachejkunata ch'ataykun

³⁸ Jinallataj Jesús runakunaman yachachishaspa, nerqa: Allinta qhawakuychej Diospa kamachisqanta yachachejkunamanta. Paykunaqa qhoysu p'achayoj puriykachanku, tukuymanta aswan sumaj runapis kankuman jina. Plazakunapipis tukuy runawan napaykuchikuyta munanku.

³⁹ Chantá paykuna tantakuna wasikunapi ñawpajpipuni tiyakuyta munanku, jatun mikhuykunapipis aswan allin kaj tiyanata ajllarikunku.

⁴⁰ Chaywanpis paykuna warmisapakunaj tiyapuyninkuta qhechunku, mana jina kasqankuta reparachikunankupajtaj mayta Dioswan parlarikoj tukunku. Chayrayku paykuna aswan sinch'i ñak'ariywan jasut'isqa kanqanku, nispa.

Wajcha warmisapa Diosman qolqeta qon

⁴¹ Jesús qolqe churana qayllapi tiyashaspa, imaynatachus runakuna Temploman qolqeta apamushasqankuta qhawasharqa. Chaypacha ashkha qhapajkunaqa ashkha qolqeta churasharqanku.

⁴² Chayllaman uj wajcha warmisapa chayamorqa, paytaj iskay phatallata churaykorqa. Chaykuna uj phisullawan ninakun.

⁴³ Jesustajrí yachachisqankunata wajyaspa, nerqa: Kayta sut'ita niykichej: Kay wajcha warmisapaqa qolqe churanaman aswan ashkhata churan tukuy churajkunamanta nisqaqa.

⁴⁴ Qhapajkunaqa kapuyninkumanta puchojllataña churanku. Payrí, wajcha kayninpi imawanchus mikhunata rantikunan karqa, chay tukuyta churaykun, nispa.