1 Samuel 1 - DIOSPA QHELQACHISQ

Tata Diosqa Anaj mañakusqanta uyarin

¹ Efraín jatun aylloj jap'iyninpa orqorara cheqapi, Ramá llajtapi uj runa Elcana sutiyoj tiyakorqa. Payqa Jeroanpa churin karqa, jinataj Eliujpa allchhin. Eliujpa tatantaj Tohu karqa, paytaj Sufpa churin. Tukuy paykunaqa Efraín jatun ayllumanta karqanku.

² Elcanaqa iskay warmiyoj karqa. Ujninpa sutin Ana karqa, ujninpatataj Peniná. Peninaqa wawakunayoj karqa, Anatajrí mana.

³ Sapa wata Elcanaqa llajtanmanta Siloman rejpuni, chaypi Tukuy Atiyniyoj Tata Diosta yupaychananpaj, uywata ñak'aspa q'olachinatawan jaywananpaj. Silo llajtapi Elí sacerdotejta iskay churinkuna karqanku, ujninpata sutin Jofní karqa, ujninpatataj Finés. Paykunapis Tata Diospa sacerdotenkunallataj karqanku.

⁴ Maypachachus Elcana uywa ñak'asqata Diosman jaywaj chaypacha, warmin Peninaman, churinkunaman chantá ususinkunaman ima aychata mikhunankupaj qoj.

⁵ Chaywanpis Elcanaqa warmin Anaman aswan sumaj kajta qoj, Tata Dios mana wawata rejsinanta munashajtinpis payta astawan munakusqanrayku.

⁶ Chayrayku Peninaqa Anawan jap'inakuspa, chantá alqorakuspa k'umuykachachej, Tata Dios wawata mana rejsinanta munasqanrayku.

⁷ Sapa wata Dioswan Tinkukuna Toldoman rejtinku, Peninaqa asipayaspa Anata llakichillajpuni. Chayrayku Anaqa waqallajpuni, manataj mikhojchu.

⁸ Chantá qosan Elcana nerqa: Ana, imaraykutaj waqallankipuniri? Imaraykutaj llakisqalla kashanki manataj mikhunkichuri? Manachu noqaqa chunka wawakunamantapis aswanraj kani? nispa.

⁹ Ujpacha Silopi kashajtinku, Ana mikhuytawankama jatarerqa. Elí sacerdotetaj Dioswan Tinkukuna Toldo punku qayllanejpi uj tiyanapi tiyasharqa.

¹⁰ Anataj, sonqon ukhupi may llakisqa kasqanrayku, waqaspa Tata Diosmanta mañakorqa.

¹¹ Tata Diosmantaj ajinata nerqa: Tukuy Atiyniyoj Tata Dios, sichus qan kay llakiyniyta qhawariwaj, sitajchus noqa kamachiykimanta yuyarikuspa uj wawata qowankiman chayqa, noqa chay wawata mayk'ajkamachus kawsanqa chaykama qanpata kananpaj qopusqayki. Manataj jayk'ajpis chujchan ruthusqachu kanqa, nispa.

¹² Tata Dioswan Ana unaytaña parlashanankama, Eliqa Anaj siminta qhawasharqa.

¹³ Anaqa sonqon ukhullapi Dioswan parlarikusharqa. Chaywanpis parlasqan mana uyarikorqachu, manachayqa simillan kuyusharqa. Chayrayku Eliqa Ana machasqa kashasqanta yuyarqa.

¹⁴ Chantá, Elí sacerdote nerqa: Mayk'ajkamataj machasqa kankiri? Amaña astawan ujyaychu, nispa.

¹⁵ Anatajrí kuticherqa: Mana jinachu, wiraqochíy. Mana vinota, nitaj machachikoj ujyanatapis ujyarqanichu. Manachayqa manchay llakisqa kashani, llakisqa kasqaytataj Tata Diosman willakushani.

¹⁶ Ama yuyaychu noqa kamachiyki mana allin warmi kasqayta. Noqaqa sinch'i llakisqa, phutisqa kasqayrayku kunankama Dioswan parlarikusharqani, nispa.

¹⁷ Elitaj kuticherqa: Sonqochakuspa ripullay, israelitakunaj Diosnintaj imatachus mañakusqaykita qosuchun, nispa.

¹⁸ Anataj kuticherqa: Maypaj qhawawasqaykimanta pachis niyki, nispa. Chantá Anaqa kutipuspa mikhorqa, manañataj llakisqachu karqa.

¹⁹ Q'ayantin paqarin tutamanta, Elcanawan, wasi ayllunwan ima Tata Diosta yupaychaytawankama, Ramapi wasinkuman kutiporqanku. Chay qhepatataj Elcanaqa warmin Anawan puñuykorqa, Tata Diostaj Anaj mañakusqanmanta yuyarikorqa.

²⁰ Ajinamanta Anaqa wijsallisqa rikhurerqa. Onqokunan tiempo chayamojtintaj, uj qhari wawata paqarichikorqa. Wawantataj Samuel sutiwan suticharqa, nerqataj: Kay wawata Tata Diosmanta mañakorqani, nispa.

²¹ Chaymanta Elcanaqa tukuy wasi ayllunwan Siloman rerqa, chaypi Diosman qosaj nisqanta junt'ananpaj, jinataj Tata Diosman sapa wata jaywanata jaywamunanpaj.

²² Anatajrí mana riyta munarqachu, qosanmantaj nerqa: Wawayta januk'anaykama, mana riymanrajchu. Chaymantaraj rispa, wawayta Tata Diosman apapusaj, chaypi wiñaypaj qhepakapunanpaj, nispa.

²³ Qosan Elcanataj kuticherqa: Imachus allin rijch'asojta ruwallay. Qhepakullay wawata januk'anaykikama. Tata Diostaj imatachus nisusqanta junt'achun, nispa. Ajinata Anaqa qhepakorqa, wawantataj januk'anankama uywarqa.

²⁴ Aswan qhepanejman wawata januk'aytawan, Anaqa Silopi Dioswan Tinkukuna Toldoman aparqa. Apallarqataj kinsa watayoj torillota, uj arroba trigo jak'utawan, chantá uj wich'i vinota ima. Wawarí juch'uyllaraj karqa.

²⁵ Chantá torillota ñak'aspa Diosman jaywaytawan, Anaqa wawata Elí sacerdoteman pusarqa.

²⁶ Chaypitaj Anaqa Elita nerqa: Tatáy, yachanki jina, unay qan rikushawajtiyki Tata Diosmanta mañakorqani, noqa chay warmi kani.

²⁷ Kay wawata Tata Diosmanta mañakorqani, paytaj mañakusqayta qowan.

²⁸ Chayrayku noqapis kunanqa kay wawata Tata Diosman qopunaypaj pusamuni. Kawsanankamaqa Tata Diospata kachun, nispa. Chantá chaypi Tata Diosta yupaycharqanku.