रोमियो 13 - डोगरी नवां नियम

कुमत दे दीन

¹ अर एक मनुक्ख राज अधिकारियें दे दीन रवै, किके कोई अधिकार ऐसा नेई, जेड़ा परमेसर थमां नेई उवै; ते जेड़े अधिकार न, ओ परमेसर थमां पक्के कित्ते जंदे न।

² एसकरी जेड़ा कोई अधिकार दा वरोध करदा ऐ, ओ परमेसर दी विधि दा वरोध करदा ऐ, ते वरोध करने आले परमेसर थमां सजा पागन।

³ किके कुमत करने आले अच्छे कम आसतै नेई, लेकन बुरे कम आसतै डर दा कारन न; आखर; जेकर तू कुमत करने आलें छा निडर रौना चानां ऐ, तां ठीक कम कर, ते ओदे थमां तेरी सेफ्त्त ओग;

⁴ किके ओ तेरी पलाई आसतै परमेसर दा सेवक ऐ। लेकन जेकर तू बराई करें, तां डर, किके ओ तलवार व्यर्थ लेई नेई; ते परमेसर दा सेवक ऐ; के ओदे गुस्सा दे मताबक बुरा कम करने आले गी सजा दे।

⁵ एसकरी दीन रौना न सेर्फ ओस सजा कन्ने डर कन्ने जरुरी ऐ, ते अन्तर आत्मा बी इयै गवाही दिन्दा ऐ।

⁶ एसकरी चुंगी बी दियो, किके कुमत करने आले परमेसर दे सेवक न, ते मेशा इसै कम च लगे दे रौंदे न।

⁷ एसकरी जिसी जेड़ा आक्क देना ऐ उसी दियो; जिसी कर देना चाईदा ऐ उसी कर दियो, जिसी चुंगी चाईदी ऐ, उसी चुंगी दियो; जेस छा डरना चाईदा, ओदे थमां डरो; जेसदा आदर करना चाईदा, ओसदा आदर करो।

पड़ोसी कन्ने प्रेम

⁸ अप्पुं बिचें प्यार गी छुड़ीयै ते कुसे गल्ल च कुसे दे कर्जदार नेई उवो; किके जेड़ा दुए कन्ने प्यार रखदा ऐ, उवै कनून पूरा कित्ता ऐ।

⁹ किके मूसा दे उक्म च ए ऐ के, “व्यभिचारी नेई करना, अत्या नेई करनी, चोरी नेई करनी, लालच नेई करना,” ते इनेंगी छूडीयै ओर कोई बी उक्म उवै तां सारें दा नचोड़ एस गल्ल च पाया जन्दा ऐ, “अपने गबांडी कन्ने अपने आला लेखा प्यार रख।”

¹⁰ प्यार गबांडी दी केछ बराई नेई करदा, तां करी प्यार रखना कनून गी पूरा करना ऐ।

मसीह गी उच्चा करना

¹¹ ते बेलै गी पंछानियै ऐसा गै करो, एस लेई के ऊन थुआड़े लेई निंदर चा जागने दी घड़ी आई पूज्जी दी ऐ; किके जेस बेलै असैं विश्वास कित्ता हा, ओस बेलै दे वचार कन्ने ऊन साड़ा उद्धार कोल ऐ।

¹² रात बड़ी ओई गेई ऐ, ते देन निकलने आला ऐ; एसकरी अस न्हेरे दे कम्में गी त्यागीयै लोई दे थयार बनी लेचै।

¹³ जियां देन गी शोभा दिन्दा ऐ, इयां गै सीधी चाल चलने, नां के लीला-क्रीड़ा ते पियक्कड़पन कन्ने, नां व्यभिचारी ते लुचपन कन्ने, ते नां चगड़े ते डाह कन्ने।

¹⁴ ते प्रभु यीशु मसीह गी तारण करी लियो, ते जिंदु दी इच्छ्यें गी पूरा करने दी कोष्ट नेई करो।