प्रेरितों के कम 13 - डोगरी नवां नियमबरनबास ते शाऊल गी पेजया जाना 1 अन्ताकिया शैर दी कलीसिया च केई पविखवक्ता ते शिखया देने आले हे; जियां; बरनबास ते शमौन जिसी नीगर यनी काला मानु आखया जन्दा ऐ; ते लूकियुस कुरेनी, ते चौथाई देश दा राजा हेरोदेस राजा दा दोध प्रा मनाहेम, ते शाऊल। 2 जेस बेलै ओ उपवास कन्ने प्रभु दी पगती करा करदे हे, तां पवित्र आत्मा ने उन्दे क्न्ने आखया, “मेरे आसतै बरनबास ते शाऊल गी ओस सेवा आसतै लग्ग करो जेस आसतै मैं उनेंगी बलाए दा ऐ।” 3 ओस बेलै उनै उपवास ते प्रार्थना करियै ते उन्दे सेर उपर अथ्थ रखियै उनेंगी परमेसर दी सेवा आसतै विदा कित्ता। पौलुस दे प्रचार दा पैला सफ़र 4 एस आसतै शाऊल ते बरनाबास पवित्र आत्मा दे पेजे गेदे सिलूकिया बंदरगाह गी गै; ते उत्त्थुआं दा समुन्दरी जाज उपर चढ़ीयै साइप्रस टापू गी चली गे; 5 ते सलमीस च पूजियै, परमेसर दा वचन यहूदीयें दे प्रार्थनाकार च सनाया। ते यूहन्ना उन्दे कन्ने उन्दी सेवा करदा हा। 6 ते ओस सारे टापू ग्रां-ग्रां च ओदे ओई पाफुस शैर तकर पूजे। उत्थें उनेंगी बार-यीशु नां दा एक यहूदी जादू टोना ते झूठा पविखवक्ता मिलया। 7 ओ राजपाल सिरगियुस पौलुस दे कन्ने हा, जेड़ा बुद्धिमान मनुक्ख हा। ओसने बरनबास ते शाऊल गी अपने कोल बलाईयै परमेसर दा वचन सुनना चाया। 8 लेकन एलीमास जादूगर ने, किके इयै ओदे नां दा मतलब ऐ, उन्दा वरोध करियै राजपाल गी यीशु उपर विश्वास करने थमां रोकना चाया। 9 ओस बेलै शाऊल ने जेसदा नां पौलुस बी ऐ, पवित्र आत्मा कन्ने परपुर ओईयै ओस एलीमास जादूगर दी बखी खडोईयै दिखियै आखया, 10 “ए सारे कपट ते छल कन्ने परोए दे शतान दी औलाद, सच्चे तर्म दे बैरी, के तू प्रभु दे सीधे रस्तें गी डिंगा करना नेई छुडगा? 11 ऊन देख, प्रभु दा अथ्थ तेरे विरोध च ऐ; ते तू केछ बेलै तकर अन्नां रौगा ते सूरज गी नेई दिखगा।” ओस बेलै फोरन तोंध ते न्हेरा ओसदी अखें उपर छाई गीया, ते ओ इत्थैं-उत्थें फरोलन लगया तां जे कोई ओसदी मदाद करै। 12 ओस बेलै राजपाल ने जेड़ा ओया हा उसी दिखियै ते प्रभु दी शिखया थमां रांन ओईयै यीशु मसीह उपर विश्वास कित्ता। पिसिदिया दे अन्ताकिया च पौलुस दी शिखया 13 पौलुस ते ओदे साथी पाफुस शैर थमां जाज खोलियै पंफूलिया लाके दे पिरगा शैर च आए; ते यूहन्ना मरकुस उनेंगी छुड़ीयै यरूशलेम गी बापस आया। 14 ते पिरगा शैर थमां अगें निकलियै ओ पिसिदिया जिले दे अन्ताकिया शैर च पूजे; ते यहूदीयें दे बसां दे देन प्रार्थनाकार च बैठी गै। 15 मूसा दा कनून ते पविखवक्तें दी कताब पढ़ने थमां बाद प्रार्थनाकार दे प्रधानें उन्दे कोल आखी पेजया, “ए प्राओ, जेकर लोकें गी सखाने आसतै थुआड़े मने च कोई गल्ल ऐ तां बोलो।” 16 ओस बेलै पौलुस ने खड़ोईयै ते अथ्थें कन्ने शारा करियै आखया, “ए इस्राएलियें, ते परमेसर थमां डरने आलयो गैर यहूदियों, सुनो; 17 इनें इस्राएली लोकें दे परमेसर ने साड़े पिता दादें गी चुनी लेता, ते जेसलै ए लोग मिस्र देश च परदेसी ओईयै रौंदे हे, ते उन्दी तरक्की कित्ती; ते बड्डे शक्तिशाली अथ्थें कन्ने कढी लेई आया। 18 ओ कोई चाली साल तकर सन्सान जगै च उन्दी बर्दाश करदा रिया, 19 ते कनान देश च सत जातीयें दा नाश करियै उन्दा देश कोई साड़े चार सौ साल च इंदी बरास्त च करी दिता। 20 एस दे बाद ओसने शमूएल पविखवक्ता तकर उन्दे च न्यायी ते अगबें नयुक्त कित्ते। 21 ओदे बाद जेस बेलै शमूएल उन्दा अगबा हा उनै एक राजा मंगया। ओस बेलै परमेसर ने चाली साल आसतै बिन्यामिन दे गोत्र बिचा एक मनुक्ख; मतलब किश दे पुत्तर शाऊल गी उन्दे उपर राजा रखया। 22 परमेसर ने शाऊल गी लग करियै दाऊद गी उन्दा राजा बनाया; जेसदे बारै च ओसने गुआई दिती, मिकी एक मनुक्ख, यिशै दा पुत्तर दाऊद, मेरे मन दे मताबक मिली गीया ऐ; उवै मेरी सारी मरजी पूरी करग। 23 इसै दे वंश बिचा परमेसर ने अपने बायदा दे मताबक इस्राएल दे कोल एक मुक्तिदाता, मतलब यीशु गी पेजया। 24 जेसदे औने थमां पैलैं यूहन्ना ने सारे इस्राएलियें च मन फराने दे पवित्रशनांन दा परचार कित्ता। 25 ते जेसलै यूहन्ना अपनी सेवा दा कम पूरा करने आला हा, तां ओसने उनै सारे गी आखया, तोस मिगी के समझदे ओ? आंऊँ ओ मसीह नेई ऐं। बरना दिखो, मेरे बाद एक औने आला ऐ आंऊँ तां तुसेंगी पानी कन्ने पवित्रशनांन दिना ऐ, लेकन ओ औने आला ऐ, आंऊँ तां एस योग बी नेई के ओदे पैरें दी नोक्क दा तसमा खोली सकां; ओ तां तुसेंगी पवित्र आत्मा ते अग्ग कन्ने पवित्रशनांन देग।” 26 “ए इस्राएली प्राओ, तोस जेड़े अब्राहम दी औलाद ओ; ते परमेसर थमां डरदे ओ, थुआड़े कोल एस उद्धार दा वचन पेजया गीया ऐ। 27 किके यरूशलेम दे रौनें आलें ते उन्दे प्रधानें, नां यीशु मसीह गी पछानया ते नां पविखवक्तें दियां गल्लां समझीयां; जेड़ीयां अर बसां दे देन पढ़ीयां जंदियां न, एस आसतै उसी दोषी बनाईयै उनै गल्लें गी पूरा कित्ता। 28 उनै उसी मारी ओड़ने दे योग कोई दोष ओस च नेई लबया, तां बी राजपाल पिलातुस दे अगें अर्ज कित्ती के ओ मारी दिता जा। 29 ते जेसलै उनै ओदे बारै च पवित्र शास्त्र च लिखी दियां सारीयां गल्लां पूरीयां कित्तियां, तां उसी सूली उपरा तुआरीयै कब्र च रखया। 30 लेकन परमेसर ने उसी मरें दे बिचा जिन्दा कित्ता, 31 ते ओ उनै चेलें गी जेड़े ओदे कन्ने गलील जिले चा यरूशलेम च आए हे, मते देन तकर लबदा रिया; लोकें दे सामनें ऊन ओ गै ओदे गवाह न। 32 ते अस तुसेंगी परमेसर दे बायदे दे बारै च जेड़ा बजुर्गें कन्ने कित्ता गीया हा, ए शोभ समाचार सुनानयां न,” 33 के परमेसर ने यीशु गी मरें दे बिचा जिन्दा करियै, उवै बायदा साड़ी औलाद आसतै पूरा कित्ता; जियां दुए पजनें च बी लिखे दा ऐ, तू मेरा पुत्तर ऐं; अज्ज मैं गै तुगी जमायां ऐ। 34 ते परमेसर दी एस रीति कन्ने मरें दे बिचा जिन्दा करने दे बारै च बी, के ओ कदें बी नेई सड़ै, ओसने ए आखया ऐ, आंऊँ दाऊद दे उपर दी पवित्र ते अटल क्रपा थूयाडे उपर करगा। 35 एस लेई दाऊद ने अपने एक ओर पजन च बी आखया ऐ, किके तू मेरे प्राणें गी नरक बेच नेई छुड़गा; ते नां अपने पवित्र जन गी सड़ना देगा। 36 किके दाऊद तां परमेसर दी मर्जी दे मताबक अपने बेलै च सेवा करियै मरी गीया, ते अपने बजुर्गें च जाई मिलया, ते सड़ी बी गीया। 37 लेकन जिसी परमेसर ने मरें दे बिचा जिन्दा कित्ता, ओ सड़ी नेई सकया। 38 एस आसतै, ए मेरे इस्राएली प्राओ; तोस जानी लियो के यीशु थमां पापें दी माफी दा समाचार तुसेंगी दित्ता जन्दा ऐ; 39 ते जिन्नें गल्लें च तोस मूसा दे कनून थमां बेकसुर नेई ओई सकदे हे, उनै सबनीं गल्लें उपर अर एक विश्वास करने आला यीशु मसीह थमां बेकसुर आखया जन्दा ऐ। 40 एस आसतै चकने रवो, ऐसा नेई ऊऐ, के जे पविखवक्तें दी कताब च लिखे दा ऐ, थुआड़े उपर बी आई पवै; 41 “ए निंदया करने आलयो, दिखो, ते रांन ओई जाओ, ते मिटी जाओ; किके आंऊँ थुआड़े दिनें च एक कम करना ऐं, ऐसा कम, के जेकर कोई थुआड़े कन्ने ओसदी चर्चा करै, ते तोस कदें बी विश्वास नेई करगे।” अन्ताकिया च पौलुस ते बरनबास 42 पौलुस ते बरनाबास दे मन्दर चा बार निकलदे बेलै लोग उन्दे कन्ने अर्ज करन लगे के अगलै बसां दे देन असेंगी ए गल्लां पी सनाया जांन। 43 जेसलै संगत मुकी गेई तां यहूदी ते यहूदी मत च आए दे पक्तें बिचा मते सारे पौलुस ते बरनबास दे पिछें ओई गे; ते उनै उन्दे कन्ने गल्लां करियै समझाया, के परमेसर दी क्रपा च बने रवो। 44 अगलै यहूदीयें बसां दे देन शैर दे सारे लोग परमेसर दा वचन सुनने गी किटठे ओई गै। 45 लेकन यहूदी अगबें पीड गी दिखियै गुस्सै कन्ने परोई गै, ते निंदया करदे ओई पौलुस दी गल्लें दे वरोध च आखन लगे। 46 ओस बेलै पौलुस ते बरनबास ने बिना डर दे आखया, “जरुरी हा के परमेसर दा वचन तुसेंगी पैलैं सनाया जंदा; लेकन जेसलै तोस उसी नकारी दिंदे ओ, ते अपने आप गी मेशा दी जिंदड़ी दे योग नेई बनांदे, तां दिखो, अस ऊन दुई जातीयें आली बखी फिरनयां न। 47 “किके प्रभु ने असेंगी ए उक्म दित्ता ऐ, मैं तुसेंगी दुई जातीयें आसतै लो बनाया ऐ, तां जे तुं तरती दे ऐन्त तकर मुक्ति दा दरबाजा उवै।” 48 ए सुनीयै दुई जातीयें दे लोक खोश ओए, ते परमेसर दे वचन दी बड़ाई करन लगे; ते जिन्नें बी मेशा दी जिंदड़ी आसतै चुनें गेदे हे, उनै विश्वास कित्ता। 49 ओस बेलै प्रभु दा वचन ओस सारे देश च फैलना लगया। 50 लेकन यहूदी अगबें पक्त ते कोलीन जनांनीयें गी ते शैर दे मशूर लोकें गी बकाया, ते पौलुस ते बरनबास दे वरोध चगड़ा कराईयै उनेंगी अपने बन्ने थमां बार कढी दिता। 51 ओस बेलै पौलुस ते बरनाबास उन्दे सामने अपने पैरें दी तुड झाड़ीयै इकुनियुम शैर गी चली गै। 52 ते चेलें अन्ताकिया शैर च खुशी कन्ने ते पवित्र आत्मा कन्ने परपुर ओदे गै। |
This work is licensed under Creative Commons Attribution-ShareAlike 4.0 License.