1 कुरिन्थियों 2 - डोगरी नवां नियमपौलुस दा सूली उपर चढ़ाए दे मसीह दा प्रचार 1 ए विश्वासी प्राओ, आऊँ थुआड़े कोल तुसेंगी चलाकी कन्ने ते नां गै बड़ीयां ज्ञान गल्लां दसनें गी आया हा लेकन थुआड़े इत्त्थैं परमेसर दा संदेश खोलियै सनानें गी आया हा। 2 किके मैं ए तै करी लेता हा, के थुआड़े बेच यीशु मसीह दा ते ओसदी सूली दी मौत गी छुड़ीयै ओर कुसे गल्ल दे बारै नेई बोलां। 3 जेसलै आऊँ थुआड़े इत्त्थैं हा मैं समझया के आऊँ एस काबल नेईयैं के जे केछ मसीह मेरे कोलां चांदे न आऊँ ए नेई करी सकदा एस कारन आऊँ थुआड़े बेच डरें कम्बदा रिया। 4 ते मेरे शिखया, ते मेरे प्रचार च ज्ञान दी कलाकारी आलियां गल्लां नेई हियां जेड़ीयां मनुक्ख दे ज्ञान थमां न; लेकन पवित्र आत्मा ते परमेसर दी शक्ति दा सबूत हा। 5 एसकरी थुआड़ा विश्वास, मनुक्खें दे ज्ञान उपर नेई, लेकन परमेसर दी शक्ति उपर मनसर रवै। आत्मिक ज्ञान 6 पी बी अस सेध लोकें च ज्ञान आलियां गल्लां सनानयां न, लेकन एस दुनिया दे ज्ञानीयें दा ज्ञान नहीं; जेड़ा नाश ओंने आले न; 7 लेकन अस परमेसर दे ज्ञान दा गोप्त पेद, जेड़ा अजां तकर गोप्त रखया गेदा हा, प्रकट करनयां न, जिसी परमेसर ने शुरू थमां साड़ी मैमा आसतै पक्का कित्ते दा हा। 8 परमेसर दी जोयनां गीं एस दुनिया दे राजें बिचा कुसे बी नेई जानयां, किके जेकर ओ जांनदे, तां मैमा आले प्रभु गी सूली उपर नेई चढांदे। 9 लेकन जियां पवित्र शास्त्र च लिखे दा ऐ, “जेड़ीयां गल्लां कुसे नेई दिखयां, ते नेई कुसे सुनयां, ते जेड़ीयां गल्लां मनुक्ख दे मन च समझ नेई आईयां, उवै गै ऐ न, जेड़ीयां परमेसर ने अपने प्यार करने आलें आसतै त्यार कित्ती दियां न।” 10 लेकन परमेसर ने अपने गोप्त पेदें गी अपने आत्मा थमां साड़े उपर परकट कित्ता, किके पवित्र आत्मा सारीयां गल्लां वरन परमेसर दे गैरें पेदें गी बी जांचदा ऐ। 11 मनुक्खें चा कोन कुसे मनुक्ख दी गल्लें गी जांनदा ऐ, सेर्फ मनुक्ख दी आत्मा जेड़ी ओस च ऐ? उयांगै परमेसर दियां गल्लां बी कोई नेई जांनदा, सेर्फ परमेसर दा आत्मा। 12 लेकन असैं दुनिया दे लोकें दा आत्मा नेई, लेकन असेंगी ओ आत्मा थोदा ऐ, जेड़ा परमेसर थमां ऐ, के अस उनै गल्लें गी जांनचै, जेड़ीयां परमेसर ने असेंगी मोफ्त दिती दियां न। 13 जिनेंगी अस मनुक्खें दे ज्ञान थमां सखाई दियें गल्लें च नेई, लेकन पवित्र आत्मा थमां सखाई दियें गल्लें च, पवित्र आत्मा, आत्मिक ज्ञान कन्ने आत्मिक गल्लें गी खोली-खोली दसदा ऐ। 14 लेकन शरीरक मनुक्ख परमेसर दे आत्मा दियें सचाई गी कबूल नेई करदा, किके ओ ओदी नजर च बेबकूफ आलियां गल्लां न, ते नेई गै ओ उनेंगी जांनी सकदा ऐ किके उन्दी जांच आत्मिक रीति कन्ने ओंदी ऐ। 15 पवित्र आत्मा पाए दा मनुक्ख सब केछ जाची लैंदा ऐ जेड़ा पवित्र आत्मा सखान्दी ऐ, लेकन ओ अप्पुं कुसे थमां जाचया नेई जन्दा। 16 ए सच्च ऐ किके पवित्र शास्त्र च लिखे दा ऐ “प्रभु दा मन कोन्नें जानया ऐ, के उसी सखा?” लेकन साड़े च मसीह दा मन ऐ। |
This work is licensed under Creative Commons Attribution-ShareAlike 4.0 License.