1 Tasalonikaɨ 5 - Dadiya NT

Jǝ́ Yɨ Nǝn Fɛkalɨ A Bɛtǝm Tɛlalɔɨ

¹ Kǝngkɔ kambɔ, a dul kɛl kɔkɔgɔ jǝbɔ kumɔ kanjǝl nɨ bwɨm lɛɨ, a yǝlam bɔ nyɔ nǝn mʊla jem mʊlaɨ.

² Jǝ́ nyǝm nyǝmɨ nǝn kang jen, kɔkɔ bɛtǝm Tɛlalɔɨ bɛ na nǝkuu nǝn kum.

³ Nǝn kwama gɔ nǝbɔ sʊwa gɔ, “Bǝ yɨ yɨm lǝma lɛ jǝbɔ yɨm kwamɨgǝnɨ,” kǝngkɔ kǝngkɔ nɨ kalatǝmɔ bɛ jim bɛ, kanga butotǝmɔ gǝ ta nɔɔlɨ nɨ lɛ nǝn fʌli, mɨ gola bʊʊtǝm wo.

⁴ Kambɔ ke bɔ a mʊgɔ kumtojili jǝ́ woi, kɔkɔ nɨ ba do jen nɛ nǝn dul na nǝkuui.

⁵ Jʊ a bwɨɨ, gwam jenɔ jǝ́ bɛtɔ lɔ nyalǝmɨ, jǝbɔ bɛtɔ lɔ kɔkɔgɨɨ. Bǝ ke bɔ a kum jǝbɔ kumtojili.

⁶ A na nyɔ ka bǝ daa lɛ dum kanga kaamɨ gǝ maam lɛɨ. Bɛ bǝ yɨ yɨm nǝn fɛkalɨ jǝbɔ tɔɔtǝm.

⁷ Nǝbɔ gǝ daa dum lɛɨ, jǝ daa nǝn kum. Nǝbɔ gǝ nɔɔ lɛ ya maa ji lɛɨ, jǝ nɔɔ nǝn kum.

⁸ A bǝnɔ, bǝ na a yɨm nyalǝm. Bɛ bǝ yɨ yɨm tɔɔtǝm. Bɛ bǝ dʊʊ bɛllɛ kemʌn a nǝtǝm bɨlǝngkɛlɔ jǝbɔ swɨkan. Bɛ bǝ sum bule kemʌn na yatǝm nǝl a nyatǝm bʊʊtǝm.

⁹ Kwaama a ya bǝn bɔ gɔ bǝ gʌ nabwɨl gǝnɔ. A ya bǝn gɔ bǝ nya bʊʊlɨ a gola Tɛlalɔ bǝn Yesu Kiristii,

¹⁰ wʊnɨ a bʊla a kɛl dul bǝnɨ, sǝ na bǝ nǝn kʊlɨ, na bǝ bʊla bʊlaɨ, kwama a bɛmɨ, bǝ yɨ dakini jǝbɔ gɔ.

¹¹ A dul kɛl nɨ bɛ ya jǝ́ kʊʊka nǝl lɛ, ya jǝ́ tɨkaka lɛ, kanga jǝ́ maam lɛ kǝngkɨɨ.

Yaltǝm Jǝbɔ Gʊtǝm Lɔl

¹² Kambɔ, nǝn kela jen nɛ, nǝb nɨ gʌ lɛ nǝn maajɨ a kʊm jeni, nǝb kotere dʊʊn jenɔ a mʊgɔ Tɛlalɔɨ gʊ jem lɔl lɛɨ, jǝ́ nǝ ji dʊʊn.

¹³ Jǝ́ ta ji a bʊm dangǝn nǝn swɨtǝm a kɛl maajɨ jinɔ gǝm. Jǝ́ yɨ yɨm kwamɨgǝn a kʊm jen.

¹⁴ Nǝn kel jen kambɔ, jǝ́ gʊ nǝb sʊlagɔ gǝm lɔl. Jǝ́ kʊʊ nǝb nɨ mɨ nǝn kwamǝn nǝlɨ gǝm nǝl. Jǝ́ tɨka nǝbɔ a gɨyaɨ. Jǝ́ kʊ nǝl jǝbɔ nǝbɔ gwam.

¹⁵ Jǝ́ fɛ jǝ́ nyǝm ka nǝl ya ywa lɛ shil nǝn shil. Kwangkwang ya jǝ́ sʊtǝn maatǝm jʊ nɨ lɛ a bʊmɨ a kʊm jen jǝbɔ nǝbɔ gwam.

¹⁶ Ya jǝ́ maa fulotǝm nǝl lɛ kwangkwang.

¹⁷ Ya jǝ́ maa keligɔ lɛ mɨ tɨtǝm wo.

¹⁸ A daa nɨ jǝ́ nya dul jenɔ woi, ya jǝ́ buu Kwaama gǝm kang lɛ, jʊ a bwɨɨ n jǝlatǝm Kwaamaɨ a bwɨ nyɔ a dul jen a mʊgɔ Kiristi Yesui.

¹⁹ Ka jǝ́ bǝm lɛ Yʊwa Kwaamaɨ.

²⁰ Ka jǝ́ soga lɛ kɛl kuwotǝmkǝgagɔ.

²¹ Bɛ jǝ́ tɛl kanjǝlɔ gwam. Jǝ́ ta jʊ nɨ a bʊm bʊmɨ a kwam.

²² Jǝ́ kɔ jʊ nɨ gwam a yǝlam shili.

²³ Bɛ Kwaama nǝn kang gǝn, Kwaama nɨ dǝg yɨm kwamɨgǝn nɛɨ, a dǝg jen jǝ́ yǝlam nǝb sagsag. Bɛ kʊlɨ jenɔ jǝbɔ nǝl jenɔ jǝbɔ bʊtɔ jenɔ pʌd a yǝlam mɨ nǝn jǝ tuwol a yɔ nǝn a kum yǝlatǝm Tɛlalɔ bǝn Yesu Kiristii.

²⁴ Nʊ nɨ a jo jeni, n nʊ gɔ yii swatǝm yaa gǝnɔ lɛɨ.

²⁵ Kambɔ, jǝ́ maa nǝm keli.

²⁶ Jǝ́ yal kambɔ gwam nǝn kwalkatǝm sagsag.

²⁷ N kel jen a kǝga Tɛlalɔɨ, jǝ́ kiyo langǝn bwangǝn nɨ a kǝga kambɨɨ gwam.

²⁸ Bɛ lǝma Tɛlalɔ bǝn Yesu Kiristii a yɨ jǝbɔ jen.