1 Korinti 16 - Dadiya NT

Kɛtǝm Kemʌn Tɨkalɨ Nǝb Bwangtǝm Kwaamaɨ

¹ Kǝngkɔ, a kɛl kɛtǝm kemʌn maatǝm tɨkalɨ mʊrkalɨ nǝb bwangtǝm Kwaamaɨ, kanga mǝ sʊwa nǝb bwangtǝmɔ a Galatiyaɨ, n kanga jǝ́ maam lɛ tʌjeni.

² Na nǝn dibɨlɨɨ, bɛ gwam jenɔ jǝ́ saa kemʌn ya jǝ́ ya lɛ dǝngdǝng nyatǝm jenɔ. Ka jǝ́ yam lɛ na n bɛɨ, sǝla jǝ́ mʊr tɨkalɨ jenɔ.

³ Na n bɛɨ, sǝ n twam nǝb nɨ jǝ́ jǝla nǝn jii nǝn langǝn bwangǝn, sǝ ja yɔ nǝn tɨkalɨ jenɔ a Urushalima.

⁴ Na bʊm bʊm mǝ tǝmɨ n yɔɨ, nǝn yɔ dakini.

Fɛkalɨ Yɔmɔ

⁵ Mǝ bɛ bɛ fɔla a daa jen woi na ba n dɔ a tǝm Makidoniyaɨ, jʊ a bwɨɨ mǝ ya nǝl lɛ ba mǝ yɔ a Makidoniya.

⁶ Kɛna mǝ ta bʊtɔ lɛ a daa jen woi, n ja shenagɔ wo, sǝ jǝ́ ywa ɨ a daa nɨ mǝ yɔ lɛ wo gwamɨ.

⁷ Ke bɔ swɨtǝm mɨ n kuwo jen, n shu. Mɨ nyɔ. Mǝ ya nǝl lɛ n maa kumtɨnɔ a gǝlala a daa jen woi, na Tɛlalɔ a jǝlaɨ.

⁸ Mǝ tɨ tɨ a Afisa ba la nǝn kum Fentikosɔ,

⁹ jʊ a bwɨɨ ja wum mɨ kaa gola dʊʊn na maatǝm maajɨ nyan. Nǝb kiimɔ wo a lada.

¹⁰ Na Timoti a bɛɨ, bɛ jǝ́ bǝla gǝn a kwɨ bʊtɔ a kʊm jen, jʊ a bwɨɨ gǝ maa maajɨ Tɛlalɔɨ kanga mǝ maam lɛɨ.

¹¹ Ka jǝ́ soga gǝn nɛ. Jǝ́ ywa gǝn nǝn lǝma a gola, a yǝla a daa mǝ woi, jʊ a bwɨɨ mǝ dʌng gola gǝnɔ lɛ nǝbɔ kambɔ.

¹² A kɛl kɨla bǝn Afolosi, n kela gǝn dangǝn mǝʊ a yɔ a daa jen woi dakini jǝbɔ tangǝn kambɔ. A gǝnɔ a ya bɔ nǝl yɔtǝm kǝngkɔ. Yɔ yɔ nǝn kwama nɨ a kuwo a bʊm gǝmɨ.

Gʊtǝm Lɔl Jǝbɔ Yaltǝm

¹³ Jǝ́ yɨ yɨm fɛkalɨ. Jǝ́ bɨ nǝl a nǝtǝm bɨlǝngkɛl jenɔ gǝm. Jǝ́ kʊʊ nǝl. Jǝ́ tɨ nǝn kwaan.

¹⁴ Gwam jʊ nɨ jǝ́ maa lɛɨ, jǝ́ maa nǝn swɨkan.

¹⁵ Kambɔ, jǝ́ nyǝm nyɔ nǝbɔ lɔ Istifanusi nǝji ja nǝ bɨlǝngkɛl nǝn tɨkǝga a tǝm Akayaɨ, ja dǝg dul jinɔ dangǝn a maatǝm tɨkalɨ nǝb sagsagɨɨ. Mǝ kela jen nɛ kambɔ,

¹⁶ jǝ́ nǝ nǝb nɨ dʊʊn gwam, jǝbɔ nǝb nɨ n fatǝm maajɨ bǝn jǝbɔ gaalan bǝnɨ.

¹⁷ N maa fulotǝm nǝl nǝn bɛtǝm Istifanusi, jǝbɔ Fartunatas jǝbɔ Akaikas, jʊ a bwɨɨ ja dem mɨ gaalan yɔtǝmɔ a daa jen woi.

¹⁸ Ja kʊʊ mɨ nǝl dangǝn kanga ja maa jem tʌjeni. Bɛ jǝ́ nǝ ji dʊʊn.

¹⁹ Mʊrkalɨtɨn nǝb bwangtǝm Kwaamaɨ a Asiyaɨ, yal jen nɛ. Akila jǝbɔ Bilkisu jǝbɔ mʊrkalɨ nǝb bwangtǝm Kwaamaɨ nɨ mʊrka lɛ a lɔ jii, jǝ yal jen nɛ dangǝn a mʊgɔ dun Tɛlalɔɨ.

²⁰ Kambɔ gwam yal jen nɛ. Jǝ́ yalka nǝn kwalkatǝm sagsag.

²¹ Mǝ Bulus, nǝmǝ mǝ mʊla yaltǝm nɨ lɛ nǝn kang mɨɨ.

²² Nʊ nɨ gwam mɨ swɨ Tɛlalɔ lɛɨ, bɛ a yǝlam nǝ lagtǝm. Tɛlalɔ bǝn, bɛ!

²³ Bɛ lǝma Tɛlalɔ bǝn Yesui a ta tʌgo gwanggwang a daa jen woi.

²⁴ Bɛ swɨkan mǝndɨ a na jǝbɔ jen a mʊgɔ Kiristi Yesui.