1 Korinti 13 - Dadiya NT

Swɨkan

¹ Na mǝ sʊwa sʊwa kɛl nǝn kaam nyiyo nǝbɨɨ jǝbɔ a bɛtɔ twama Kwaamaɨ, na a yǝlam mɨ mǝ nǝn swɨkanɨ, n yǝlam dǝnglǝng nɨ nǝn diili jǝbɔ bʌn nɨ nǝn diili.

² Na mǝ maa maa kuwotǝmkǝgaɨ, na n nyǝm jʊ nɨ ja yʊ yʊɨ, jǝbɔ nyǝmtǝmɔ gwamɨ, na mǝ nǝn nǝtǝm bɨlǝngkɛl dangǝnɨ, wʊnɨ mǝ sʊwa tuligɔ lɛ mǝʊ a bǝla daa tɨm gǝnɨ, na mɨ mǝ nǝn swɨkanɨ, mǝ ke bɔ kaa jǝl.

³ Na n nǝ jʊ nɨ gwam mǝ nǝnɨ, na n nǝ bʊtɔ mǝndɨ ja twɨɨ, na mɨ mǝ nǝn swɨkanɨ, a sʊ mɨ bɔ kaa jǝl.

⁴ Swɨkanɔ gǝ dǝg dǝg bwatǝm nǝl jǝbɔ nǝl lǝmǝn. Swɨkanɔ mɨ gǝ maa nungon nɛ, mɨ gung dul lɛ.

⁵ Swɨkanɔ mɨ nǝn dʊʊlǝn dul, mɨ gǝ maa swɨtǝm dul lɛ. Swɨkanɔ mɨ gǝ nʊng shilotǝm nǝl lɛ, mɨ gǝ ta nǝl lɛ a nǝl.

⁶ Swɨkanɔ mɨ gǝ maa fulotǝm nǝl lɛ nǝn maatǝm shil, gǝ maa fulotǝm nǝl nǝn bɨlǝngkɛl.

⁷ Swɨkanɔ gǝ dǝg dǝg bwatǝm nǝl kwangkwang, jǝbɔ jǝlakatǝm kwangkwang. Nǝngǝn nǝn yatǝm nǝl a kanjǝlɔ gǝm gwam kwangkwang, jǝbɔ kʊtǝm nǝl a kanjǝlɔ gǝm kwangkwang.

⁸ Swɨkanɔ mɨ gǝ dɨ lɛ wo. Kuwotǝmkǝgagɔ shu shu. Sʊwatǝm kɛl nǝn kaam nyiyo lɛlam lɛlam. Nyǝmtǝmɔ dɨ dɨ.

⁹ Nyǝmtǝm bǝnɔ a yii bɔ. Kuwotǝmkǝga bǝnɔ a yii bɔ.

¹⁰ Na nǝ yiitǝmɔ a bɛɨ, kanjǝl nɨ a yii bɨɨ shu shu.

¹¹ Kwama mǝ a lɔ bwɛsǝnɨ, mǝ sʊwa kɛl bɛtɨɨ, mǝ maa bʊʊlalɨ bɛtɨɨ, mǝ taba fɨ na bwɛsǝn. Ba mǝ la dʊʊɨ, n bǝla kanjǝl bɛtɨɨ wo.

¹² Kǝngkɔ maamɔ bǝ dʌng a bwaala duddugi. Kwama gɔ bǝ kuwo kuwo kǝga jǝbɔ kǝga. Kǝngkɔ nyǝmtǝm mǝndɨ a dwal. A kwama gɔ mǝ nyǝm nyǝm dangǝn, kanga Kwaama a nyǝm ɨ kǝngkɨɨ.

¹³ Kǝngkɔ kanjǝlɔ taal a yɨɨ, nǝtǝm bɨlǝngkɛl, jǝbɔ yatǝm nǝl, jǝbɔ swɨkan. Nʊ a laa ji gwamɨ n swɨkan.