Liv Zob 32 - Labib An Kreol Seselwa

Diskour Elihou

¹ Sa trwa zonm, Elifaz, Bildad, ek Sofar ti aret reponn Zob, akoz i ti santi ki i zis.

² Alor, Elihou, garson Barakel, ki sorti dan tribi Bouzit, dan fanmir Ranm, ti pran lakoler avek Zob, akoz i ti dir ki i annan rezon devan Bondye.

³ I ti osi ankoler avek sa trwa zanmi Zob, akoz zot ti nepli kapab reponn li, menm si zot ti'n deklare ki Zob i annan tor.

⁴ Elihou ti'n espere pour li koze akoz zot ti pli vye ki li.

⁵ Lakoler Elihou ti monte ler i ti war ki sa trwa zonm ti nepli kapab reponn Zob.

⁶ Alor Elihou, garson Barakel ki sorti dan tribi Boaz ti reponn: Mon ankor zenn, e zot, zot pli vye; pour sa rezon, mon ti per dir zot mon lopinyon.

⁷ Mon ti dir dan mwan menm: Les laz koze; dimoun aze ki ansenny lasazes.

⁸ Me an realite, sa ki donn zonm disernman, se lespri Bondye liniver.

⁹ Dimoun pa ganny lasazes zis akoz i vin aze; pa laz ki fer ou konpran sa ki zis.

¹⁰ Alor, mon demann zot ekout mwan; les mwan donn zot mon lopinyon.

¹¹ Annefe, mon'n esper zot koze. Mon'n ekout zot saz rezonnman, letan zot ti pe rode ki pour dir.

¹² Mon ti ekout zot avek bokou latansyon. Me personn parmi zot pa ti reisi konvenk Zob; personn pa'n reponn son bann argiman.

¹³ Alor, pa dir: Nou'n dekouver lasazes. Bondye ki kapab reponn en zonm, pa en imen.

¹⁴ Pa kont mwan ki Zob ti koze, e mon pa pou servi zot parol pour reponn li.

¹⁵ Zot in dekonserte, zot in perdi laparol, e zot nepli konnen ki pou dir.

¹⁶ Mon'n espere. Me akoz zot pa'n dir nanryen, akoz zot in perdi laparol,

¹⁷ mwan, mon ava pran laparol: Mwan osi, mon pou fer konn mon lopinyon.

¹⁸ Mon annan en kantite keksoz pou dir, e lespri anndan mwan i pous mwan koze.

¹⁹ Mon leker i koman diven anba presyon, parey bann sak diven nef ki pre pour desire.

²⁰ Mon bezwen koze pour mwan kapab respire. Mon bezwen ouver mon labous e reponn.

²¹ Mon pa pou montre preferans pour personn, e mon pa pou flat personn.

²² Annefe, mon pa abitye flate; sinon, mon Kreater ti pou deswit fer mwan disparet.