Biblia Todo Logo
線上聖經

- 廣告 -

Liv Zob 21 - Labib An Kreol Seselwa


Malfeter pa Ganny Pini

1 Zob ti reponn:

2 Ekout byen sa ki mon pe al dir. Donn mwan sa rekonfor.

3 Permet mwan koze, apre ki mon'n fini, zot ava kapab gognard mwan.

4 Mwan, eski mon pe plenny kont en et imen? Pa mon annan rezon perdi pasyans?

5 Get mwan byen! Zot ava etonnen; reste trankil, lanmen devan labous.

6 Ler mon reflesi lo tousala, mon boulverse; mon lekor antye i tranble.

7 Akoz bann malfeter i kontinyen viv? Zot viv vye e ganny ankor plis pouvwar?

8 Zot war zot bann zanfan reisi e zot bann pti zanfan grandi devan zot.

9 Kot zot, napa lafreyer; zot viv anpe e baton Bondye pa fwet zot.

10 Zot toro i krwaz byen, e zot bann vas i met ba san perdi zot piti.

11 Zot les zot zanfan zwe parey bann mouton e bann marmay i danse an liberte.

12 Zot sante, akonpannyen avek tanbouren ek laarp; zot anmize avek lanmizik laflit.

13 Zot viv dan lazwa tou zot lavi; trankilman zot desann dan lemonn lanmor.

14 Zot dir Bondye: Les nou trankil; nou pa anvi konn ou lavolonte.

15 Ki Bondye Toupwisan i ete, pour nou servi li? Ki benefis nou gannyen pour nou envok li?

16 Zot boner pa i dan zot lanmen? Mon pa kapab aksepte bann plan ki bann malfeter i fer.

17 Eski i ariv souvan ki lalanp bann malfeter i tennyen? Konbyen fwa maler i tonm lo zot? Eski dan son lakoler, Bondye i fer zot soufer?

18 Menm si zot souvan parey lapay dan divan, parey lapousyer ki tanpet i fer anvole,

19 zot dir ki Bondye i pini bann zanfan dan plas zot papa. Sa papa menm ki devre ganny pini pour donn li en leson.

20 Fodre ki i war son maler avek son prop lizye, e gout lakoler Bondye liniver.

21 Apre son lanmor, ler in fini viv, sa ki arive avek son fanmir, pa enteres li.

22 Lekel ki kapab ansenny Bondye, kan li, i ziz bann lanz?

23 Serten i mor dan zot byennet, satisfe e san okenn traka.

24 Zot byen gra akoz zot in byen manze; zot ankor byen frengan.

25 Me lezot i mor apre en legzistans mizerab, san ki zot gout okenn boner.

26 Zot tou, zot dormi dan lapousyer e lever i kouver zot.

27 Mon konn byen ki zot pe mazinen e tou zot plan pour donn mwan tor.

28 Zot dir: Oli lakaz bann gran dimoun? Oli latant kot bann malfeter ti reste?

29 Eski zot in deza poz kestyon bann vwayazer? Akoz zot pa rekonnet zot bann temwannyaz?

30 Zour maler, bann malfeter i ganny eparnyen; lakoler Bondye i kit zot sen e sof.

31 Lekel ki oze denons en malfeter dan son figir. Lekel ki fer li peye pour sa ki i'n fer?

32 I ganny anmennen ziska simityer; e son latonm i ganny byen garde.

33 En lafoul dimoun i swiv deryer; menm later ki kouver son lekor i leze.

34 Alor, ki kalite konsolasyon zot pe ofer mwan avek en bann parol initil? Tou zot parol i zis mansonz.

Labib An Kreol Seselwa © Seychelles Bible Society, 2013.

跟著我們:



廣告