Ezekyel 48 - Labib An Kreol Seselwa

Partaz Later Parmi bann Tribi

¹ La non bann tribi avek zot par: Teritwar Dann pou konmans depi Nor, tou dilon semen ki pas par Hetlonn, Lebo-Hamat ek Hatsar-Enonn, pre avek rwayonm Damas ek Amat. I pou sorti depi frontyer dan Les e al ziska lanmer Mediterane dan Was.

² Par pour Aser ava vin akote teritwar Dann. I pou sorti dan Les ziska Was.

³ Akote teritwar Aser, pou vin par Neftali.

⁴ Akote par Neftali, pou vin teritwar Manase.

⁵ Akote par Manase, pou vin teritwar Efraim.

⁶ Akote par Efraim, pou vin teritwar Riben.

⁷ Akote par Riben, sorti Les ziska Was, pou vin teritwar Zida.

Porsyon Milye pour Senyer

⁸ Akote par Zida, sorti depi frontyer Les ziska lanmer Mediterane dan Was, en teritwar menm longer avek lezot par pour sak tribi e 12 kilomet edmi larzer, pou ganny rezerve. Tanp pou trouv lo milye sa teritwar.

⁹ Dan sa porsyon, en morso 12 kilomet edmi longer e 10 kilomet larzer pou ganny rezerve pour SENYER.

¹⁰ Dan sa porsyon sakre, en morso ava vin pour bann pret: I pou mezir en porsyon sorti depi Les ziska Was: 12 kilomet edmi e senk kilomet larzer. Tanp SENYER pou trouv dan milye sa porsyon.

¹¹ Sa porsyon ava vin pour bann pret konsakre, desandan Sadok ki ti servi mwan avek fidelite. Zot pa'n abandonn mwan parey bann levit ti fer kan pep Izrael ti abandonn mwan.

¹² Sa porsyon spesyal ava vin zot par dan sa porsyon tre sakre, akote par bann levit.

¹³ Par bann levit pou parey par bann pret. Tou le de pou mezir 12 kilomet edmi longer, depi Les ziska Was, e senk kilomet larzer, Nor ziska Sid.

¹⁴ Sa morso later pli enportan, i sakre pour SENYER; personn pa pou kapab ni vann, ni fer lesanz, ni transfer.

¹⁵ Sa morso 12 kilomet edmi longer, senk kilomet larzer ki reste, ava servi pour lizaz ordiner, pour lozman ek lezot litilite. Lavil pou trouv dan milye.

¹⁶ I pou en kare ki mezir 2,250 met lo sak kote, Nor, Sid, Les ek Was.

¹⁷ Lo kat kote lavil, pou annan en lespas lib ki mezir 125 met larzer.

¹⁸ Later ki reste dan porsyon sakre lo sak kote lavil: Lo kote Sid, lo en longer senk kilomet par de kilomet edmi larzer lo kote Les ek Was, pou ganny servi pour plantasyon manze pour bann zabitan lavil.

¹⁹ Bann travayer ki pou kiltiv later dan lavil pou sorti dan nenport tribi Izrael.

²⁰ Grander sa porsyon later ki ou pou met apar pour SENYER, enkli lavil, ava en kare 12 kilomet edmi longer par 12 kilomet edmi larzer.

²¹ Sa ki reste lo de kote sa propriyete sakre ek lavil, pou vin pour prens. I pou mezir 12 kilomet edmi larzer sorti depi frontyer Les ziska lanmer Mediterane dan Was. Konmsa, propriyete rezerve pour SENYER ek tanp pou trouv dan milye sa rezyon.

²² Teritwar bann levit ek lavil pou trouv dan milye teritwar bann prens. Propriyete ki pour prens pou trouv omilye ant teritwar Zida ek teritwar Benzamen.

Teritwar Lezot Tribi

²³ La par pour leres bann tribi: Sorti depi dan Les ziska lanmer Mediterane dan Was, en par pour Benzamen.

²⁴ Akote par Benzamen, en par pour Simeon.

²⁵ Akote par Simeon, en par pour Isakar.

²⁶ Akote par Isakar, en par pour Zabilon.

²⁷ Akote par Zabilon, en par pour Gad.

²⁸ Lo kote Sid, par Gad pou baliz avek Negev. Frontyer pou sorti depi Tamar ziska oazis Meriba Kades, tou dilon larivyer, ziska lanmer Mediterane.

²⁹ Sanmenm sa pei ki ou pou partaz koman posesyon bann tribi Izrael. Senyer BONDYE ki deklare.

Bann Laport Zerizalenm

³⁰ La bann laport sorti lavil Zerizalenm: Lo kote Nor ki mezir 2,250 met,

³¹ pou annan trwa laport: Laport Riben, laport Zida ek laport Levi. Non bann laport i dapre non bann tribi Izrael.

³² Lo kote Les ki osi mezir 2,250 met, pou annan trwa laport: Laport Zozef, laport Benzamen, laport Dann.

³³ Lo kote Sid ki mezir 2,250 met, pou annan trwa laport: Laport Simeon, laport Isakar, laport Zabilon.

³⁴ Lo kote Was ki osi mezir 2,250 met, pou annan trwa laport: Laport Gad, laport Aser, laport Neftali.

³⁵ Dezormen, Lavil pou antoure avek en miray 9,000 met toultour. Dezormen, lavil pou apel: SENYER i la.