2 Tesalonisyen 3 - Labib An Kreol Seselwa

Priy pour Nou

¹ Anfen, mon bann frer ek ser! Priy pour nou, pour ki mesaz Senyer i kontinyen repann rapidman, e i ganny byen aksepte avek loner, parey i'n fer parmi zot.

² Priye pour ki Bondye i delivre nou avek sa bann move dimoun mesan. Annefe, pa tou dimoun ki krwar dan Bondye.

³ Me Senyer i fidel. I pou fortifye zot e prezerv zot kont sa enn ki move.

⁴ Senyer i donn nou sa lasirans lo zot size: Nou sir ki zot pe fer e ki zot pou kontinyen fer sa ki nou'n demann zot.

⁵ Mon demann Senyer gid zot leker dan lanmour pour Bondye e dan pasyans ki Kris i donnen.

Lobligasyon Travay

⁶ Mon bann frer ek ser! Nou donn zot sa lord lo non nou Senyer Zezi-Kri: Evit asosye zot avek bann frer parese ki pa oule travay, e ki pa oule viv dapre lansennyman ki nou'n transmet zot.

⁷ Zot konnen zot menm ki zot devre fer tou pour swiv nou legzanp. Nou pa ti pares kan nou ti parmi zot.

⁸ Nou pa ti demann manze pour nanryen avek personn. O kontrer, nou ti travay dir, aswar koman lizour, pour nou pa vin en fardo pour personn parmi zot.

⁹ Nou ti azir konmsa, pa akoz nou ti napa drwa resevwar zot led, me akoz nou ti oule donn zot en legzanp pour swiv.

¹⁰ Annefe, kan nou ti kot zot, nou ti averti zot: Sa enn ki pa oule travay, pa devre osi manze.

¹¹ Nou'n tande ki i annan parmi zot ki viv en lavi pares, nanryen fer, ki zis mel dan zafer lezot.

¹² Nou demann bann dimoun parey e ordonn zot lo non Senyer Zezi-Kri: Travay dan kalm pour zot ganny zot nouritir zot menm.

¹³ Kanta zot, frer ek ser! Pa zanmen aret fer dibyen.

¹⁴ Pran kont sa bann ki pa obei rekomandasyon ki nou donnen dan sa let. Pa bezwen frekant zot. Sa i ava fer zot onte.

¹⁵ Sepandan, fodre pa tret zot koman bann lennmi, me konsey zot koman bann frer.

Benediksyon ek Salitasyon

¹⁶ Aprezan, Senyer ki sours lape, ava li menm donn zot lape, dan tou letan e dan tou fason. Mon demande ki Senyer i reste avek zot tou.

¹⁷ Mwan, Pol, mon ekri sa salitasyon avek mon prop lanmen. Konmsa ki mon siny tou mon bann let. Sa i mon lekritir.

¹⁸ Mon demande ki lagras nou Senyer Zezi-Kri i avek zot tou.