2 Korentyen 8 - Labib An Kreol Seselwa

Donn avek Zenerozite

¹ Mon bann frer ek ser! Nou oule ki zot konnen ki mannyer Bondye in montre son lagras dan bann Legliz ki Masedwann.

² Malgre bann leprev dir ki bann krwayan in pas ladan, zot lazwa ti telman gran, ki zot i'n montre zot byen zenere, menm si zot pov.

³ Mon konfirmen ki zot in donn spontaneman, tou sa ki zot kapab, menm anplis ki zot posibilite.

⁴ Zot in sipliy nou pour zot kapab partisip dan led an faver bann krwayan dan Zide.

⁵ Zot in fer plis ki nou ti pe espere: Zot ti dabor donn zot menm Senyer; answit zot in donn zot avek nou, par lavolonte Bondye.

⁶ Pour sa rezon, nou'n demann Tit pour al kot zot pour kontinyen e konplet sa travay lagras ki i'n deza konmanse parmi zot.

⁷ Aprezan, demenm ki zot annan tou annabondans: Lafwa, don laparol, konnesans, devouman san limit, lanmour ki nou'n eveye dan zot, montre zot osi zenere dan sa proze.

⁸ Mon pa pe donn zot en lord, me mon pe teste senserite zot lanmour e konpar zot devouman avek sa ki pour lezot.

⁹ Annefe, zot konn lagras nou Senyer Zezi-Kri: Ris ki i ti ete, i'n fer li pov pour zot, pour ki zot vin ris par son povrete.

¹⁰ La mon donn zot mon konsey lo sa size: Kontiny sa ki zot in konmanse lannen pase. Zot ti premye, pa zis pour fer sa laket, me osi pour deside azir.

¹¹ Konplet sa travay avek otan devouman ki zot ti annan pour planifye li, e avek tou zot mwayen.

¹² Annefe, si nou met nou bonn volonte, Bondye i aksepte nou don, pa dapre sa ki nou napa, me dapre sa ki nou annan.

¹³ I pa en kestyon met zot dan lanbara pour ed lezot, me i en kestyon legalite.

¹⁴ La ki zot dan labondans, zot kapab ed sa bann ki dan bezwen. Si en zour zot dan bezwen, sa bann ki dan labondans ava kapab donn zot led. Konmsa ki i ava annan legalite,

¹⁵ parey Lekritir i deklare: Sa enn ki ti'n anmas bokou pa ti annan an tro, e sa enn ki ti'n anmas en pti gin pa ti mank nanryen.

Tit ek Son bann Kanmarad

¹⁶ Nou remersye Bondye ki'n met dan leker Tit sa menm motivasyon anver zot, parey mwan.

¹⁷ I'n aksepte nou lenvitasyon avek bokou kontantman e san ezite, i'n deside li menm pou vin kot zot.

¹⁸ Nou pe anvoy avek li en frer ki tou bann Legliz i felisite akoz son aktivite pour pres Bonn Nouvel.

¹⁹ An plis, i'n ganny swazir par bann Legliz pour akonpanny nou dan nou vwayaz pour sa lantrepriz zenerozite ki nou pe fer pour laglwar nou Senyer e pour montre nou dezir pour ed lezot.

²⁰ Nou pa oule ki personn i blanm nou lo size sa sonm enportan ki dan nou responsabilite.

²¹ Nou oule fer keksoz ki byen, pa zis devan Senyer, me osi devan tou dimoun.

²² Nou pe anvoy osi nou frer avek zot; nou'n ganny bokou lokazyon pour rekonnet ki i tre devoue. Aktyelman, akoz sa gran konfyans ki i annan dan zot, i pe montre ankor bokou plis devouman.

²³ Konsernan Tit, i mon kolaborater pour zot. O size lezot frer ki pe akonpanny li, se bann delege ki'n ganny anvoye par bann Legliz. Zot fer sa pour laglwar Kris.

²⁴ Alor, montre sa bann frer laprev zot lanmour, pour ki bann Legliz ava vreman sir ki nou annan rezon fyer akoz zot.