2 Korentyen 7 - Labib An Kreol Seselwa

¹ Mon bann zanmi! Tou sa bann promes i pour nou. Alor, annou pirifye nou kont tou sa ki sali lekor ek lespri. Annou fer tou pour vin konpletman sen, an vivan dan respe anver Bondye.

Pol I Eksprim Son Lazwa

² Fer en plas dan zot leker pour nou. Nou pa'n fer ditor personn; nou pa'n rin personn; nou pa'n eksplwat personn.

³ Mon pa pe dir sa pour kondann personn. Annefe, parey mon'n deza dir: Zot dan nou leker pour lavi e pour lanmor.

⁴ Mon annan gran konfyans dan zot; mon tre fyer akoz zot. Malgre tou nou soufrans, mon ranpli avek kouraz e mon leker i deborde avek lazwa.

⁵ Annefe, depi ki nou'n ariv Masedwann, nou pa'n pran okenn repo. Ti annan difikilte partou: Otour nou, lalit; dan nou leker, lafreyer.

⁶ Me Bondye ki konsol tou sa ki dan lapenn, ti ankouraz nou avek larive Tit.

⁷ Pa zis par son prezans, me osi par lankourazman ki zot in donn li. In rakont nou zot gran lafeksyon pour li, zot gran sagren pour mwan. Sa in donn mwan ankor plis lazwa.

⁸ Annefe, menm si mon let in fer zot tris, aprezan mon pa regrete. I vre, mon ti sagren ki mon let in sagrin zot pour en pti moman.

⁹ Me aprezan, mon dan lazwa, non pa akoz zot ti tris, me akoz zot latristes in fer zot sanz zot mantalite. Zot latristes in ganny servi par Bondye, me nou pa'n fer zot okenn ditor.

¹⁰ Annefe, latristes ki dapre plan Bondye, i prodwi repantans ki donn delivrans, san ki nou bezwen regrete. Me latristes ki vin akoz bann traka lemonn, i prodwi lanmor.

¹¹ Gete ki mannyer Bondye in itiliz zot latristes: Zot in azir vit pour defann zot lekor e regrete! Zot per mal azir; zot anvi revwar mwan; zot deside pini sa enn ki koupab.

¹² Si mon'n ekri zot, i pa ditou akoz sa dimoun ki'n komet lofans, ni akoz sa enn ki'n sibir lofans. Me ti pour montre klerman devan Bondye, zot devouman pour nou.

¹³ Pour sa rezon ki zot reaksyon in rekonfort nou. Nou pa ti zis ganny rekonforte. Nou'n ganny osi bokou plis lazwa kan nou ti war Tit ranpli avek lazwa par fason ki zot in ankouraz li.

¹⁴ Annefe, mon ti fyer pour zot e zot pa'n dezapwent mwan. Parey nou'n touzour dir zot laverite, sa ki nou'n dir devan Tit dan zot faver i vre.

¹⁵ Annefe, son lafeksyon pour zot in vin pli gran ankor ler i mazin zot lobeisans, e ki mannyer zot ti resevwar li avek bokou respe.

¹⁶ Mon annan bokou lazwa akoz mon kapab kont lo zot.