2 Korentyen 4 - Labib An Kreol Seselwa

¹ Akoz Bondye ki dan son bonte, i'n konfye nou sa minister, nou pa perdi kouraz.

² Nou'n fini rezet tou sa bann aksyon sekre oubyen ki fer onte. Nou pa fer nanryen pour tronp dimoun, e nou pa sanz Parol Bondye. O kontrer, nou montre laverite klerman. Nou fer tou pour ganny konfyans tou dimoun devan Bondye.

³ Sepandan, si sa Bonn Nouvel ki nou anonse i ankor annan en vwal lo la, sa vwal i pour bann ki pe perdi.

⁴ Pour bann ki pa krwar, bondye sa lemonn in avegle zot lentelizans; i'n anpes zot war lalimyer Bonn Nouvel mazeste Kris, ki resanblans Bondye li menm.

⁵ Annefe, kan nou prese, pa nou menm ki nou pe proklanmen, me Zezi-Kri koman Senyer. Lo nou kote, nou konsider nou koman zot serviter akoz Zezi.

⁶ Annefe, Bondye ki'n dir: Lalimyer pour briye omilye teneb. Se li menm ki'n briye dan nou leker, pour donn lalimyer konnesans son laglwar ki ilimin vizaz Kris.

⁷ Me sa trezor, nou pe anmenn li dan bann po fer avek later, pour montre ki sa pwisans siperyer, i sorti kot Bondye, pa kot nou.

⁸ Nou ganny pouse dan tou kote, me san ganny kraze. Nou enkyet, me nou pa perdi lespwar.

⁹ Nou ganny persekite, me nou pa ganny abandonnen. Nou ganny kraze, me nou pa ganny detri.

¹⁰ Nou pe touzour anmenn dan nou lekor, soufrans Zezi, pour ki son lavi i ganny osi manifeste dan nou lekor.

¹¹ Annefe, nou ki vivan, nou touzour pe ganny met anmor akoz Zezi, pour ki lavi Zezi i ganny manifeste dan nou lekor mortel.

¹² Konmsa, lanmor pe travay dan nou, pour ki lavi i travay dan zot.

¹³ Lekritir i deklare: Mon'n krwar; pour sa rezon ki mon'n koze. Nou osi, dan sa menm lespri lafwa, nou krwar e pour sa rezon ki nou osi, nou pe koze.

¹⁴ Annefe, nou konnen ki sa enn ki'n resisit Senyer Zezi, pou resisit nou osi avek Zezi e i pou plas nou avek zot, obor li.

¹⁵ Tou sa ki nou pe andire se pour zot. Konmsa, lagras Bondye i tous plis dimoun, e en pli gran nonm dimoun ava rann gras Bondye dan lapriyer.

Viv par Lafwa

¹⁶ Pour sa rezon ki nou pa perdi kouraz. Menm si nou lekor pe dousman ganny detri, lo kote spirityel nou pe ganny renouvle de zour an zour.

¹⁷ Nou bann pti soufrans aktyel pe prepar pour nou en gran laglwar eternel ki napa okenn konparezon.

¹⁸ Annefe, nou pa pe pran ka avek keksoz ki nou war, me plito avek sa ki nou pa war. Wi! Sa ki nou war i zis pour en pe letan. Me sa ki nou pa war i eternel.