2 Korentyen 2 - Labib An Kreol Seselwa

¹ Ensi, mon'n deside pour pa retourn kot zot dan latristes.

² Annefe, si mon rann zot tris, lekel ki pou donn mwan lazwa, si pa sa enn ki mon'n rann tris?

³ La rezon akoz mon'n ekri zot sa let: Mon pa ti oule, ler mon ti ava ariv se zot, ki sa bann dimoun ki ti devre donn mwan lazwa, zot rann mwan tris. Annefe, mon konvenki ki ler mon dan lazwa, zot osi zot ere.

⁴ Wi! Mon'n ekri zot avek en gran sagren, avek en leker lour, e avek larm, pa pour fer zot tris, me pour ki zot santi sa gran lanmour ki mon annan pour zot.

Pardonn Sa Enn ki Koupab

⁵ Si en dimoun i'n rann zot tris, pa mwan ki i'n met dan lapenn, me zot tou. Annou pa egzazere: En bon pe zot i'n dan lapen.

⁶ Pour sa zonm, repros sorti kot mazorite parmi zot i ase.

⁷ Aprezan, zot devre plito pardonn li e ankouraz li, pangar i ganny telman akable ki i tonm dan dezespwar.

⁸ Mon konsey zot alor, montre ki zot kontan li.

⁹ Mon ti ekri zot pour mwan konnen si vreman zot obei tou sa ki mon'n dir zot.

¹⁰ Sa enn ki zot pardonnen, mwan osi mon pardonn li. Sa enn ki mon'n pardonnen, mon'n fer li akoz zot, devan Kris,

¹¹ pour ki nou pa les nou ganny tronpe par Satan. Annefe, nou konn byen son bann lentansyon.

¹² Kan mon ti ariv Troas pour anons Bonn Nouvel Kris, menm si Senyer ti'n ouver en laport,

¹³ mon lespri pa ti anpe, akoz mon pa ti trouv mon frer Tit. Alor mon ti bezwen kit zot pour al Masedwann.

Laviktwar dan Zezi-Kri

¹⁴ Nou loue Bondye ki'n fer nou ranport laviktwar ini avek Kris. Par nou, i fer ki Kris i ganny konnen partou e ki i repann parey loder en parfen.

¹⁵ Annefe, pour Bondye, nou sa bon loder parfen Kris parmi tou bann ki pe ganny sove, koman pour bann ki pe al ver zot pert.

¹⁶ Pour serten, nou en loder lanmor ki anmenn lanmor; pour lezot en loder lavi ki anmenn lavi. Lekel alor ki kalifye pour ranpli en tel misyon?

¹⁷ Nou pa parey sa kantite lezot dimoun ki fer komers avek Parol Bondye. O kontrer, akoz Bondye ki'n anvoy nou, nou koz avek senserite delapar Bondye, devan Bondye, ini avek Kris.