1 Tesalonisyen 5 - Labib An Kreol Seselwa

Prepare pour Retour Senyer

¹ Mon bann frer ek ser! Konsernan bann letan ek bann moman ki tousala pou arive, i pa neseser ki mon ekri zot.

² Zot konnen zot menm, ki zour Senyer pou ariv koman en voler dan lannwit.

³ Kan dimoun ava pe dir: Tou i anpe e an sekirite, alor en sel kou, destriksyon pou tonm lo zot, parey douler lakousman ki sezi en fanm ansent, e personn pa pou sape.

⁴ Me zot mon bann frer ek ser! Zot pa dan fernwanr, e sa zour pa pou sirprann zot parey en voler.

⁵ Annefe, zot tou, zot bann zanfan lalimyer, bann zanfan lizour. Nou pa fer parti lannwit ni fernwanr.

⁶ Alor, fodre pa ki nou dormi parey lezot, me annou reste vizilan e avek en lespri kler.

⁷ Bann ki dormi, zot dormi pandan lannwit; bann ki soular, zot bwar pandan lannwit.

⁸ Me nou, akoz nou fer parti lizour, annou reste vizilan: Pran pour boukliye, lafwa ek lanmour e pour kas proteksyon, lesperans pour ganny sove.

⁹ Annefe, Bondye pa'n swazir nou pour sibir son lakoler, me pour nou ganny sove par nou Senyer, Zezi-Kri.

¹⁰ Kris i'n mor pour nou. Kan i pou retournen, nou pou viv avek li, ki nou vivan oubyen mor.

¹¹ Alor, ankouraz e fortifye kanmarad, parey zot pe fer.

Dernyen Rekomandasyon

¹² Mon bann frer ek ser! Mon demann zot pour annan respe pour bann ki travay parmi zot; bann ki lo lord Senyer, zot responsab pour diriz zot e ansenny zot.

¹³ Annan bokou respe ek lafeksyon pour zot, akoz travay ki zot pe fer. Viv byen anpe ant zot.

¹⁴ Nou ankouraz zot, frer ek ser! Averti bann ki pares, ankouraz bann ki timid, ed bann ki feb; pran pasyans avek zot tou.

¹⁵ Fer atansyon ki personn pa rann mal pour mal, me dan tou lokazyon, esey touzour fer dibyen kanmarad, ensi ki tou lezot dimoun.

¹⁶ Reste touzour dan lazwa!

¹⁷ Priy toultan!

¹⁸ Dan tou sirkonstans, remersye Bondye. Sa i lavolonte Bondye pour zot avek Zezi-Kri.

¹⁹ Pa les Lespri Sen azir.

²⁰ Pa bezwen mepriz mesaz bann profet,

²¹ me egzamin tou keksoz. Gard sa ki bon,

²² e prezerv zot kont tou sa ki mal.

²³ Bondye ki donn lape, ava konsakre zot konpletman. I ava gard zot lespri, zot lekor ek zot et antye san repros pour retour nou Senyer Zezi-Kri.

²⁴ Sa enn ki'n apel zot, i fidel: I pou fer li.

²⁵ Mon bann frer ek ser! Priy osi pour nou.

²⁶ Anbras kanmarad koman frer ek ser.

²⁷ Mon sipliy zot lo non Senyer: Lir sa let avek tou bann krwayan.

²⁸ Mon demande ki lagras nou Senyer Zezi-Kri ava avek zot.