1 Korentyen 2 - Labib An Kreol Seselwa

Anons Zezi-Kri Krisifye

¹ Kan mon ti vin kot zot frer ek ser, mon pa ti vin anons plan sekre Bondye avek bann parol konplike, oubyen bann gran fraz lasazes.

² Annefe, mon ti deside pour pa pres nanryen parmi zot eksepte Zezi-Kri, spesyalman Zezi-Kri krisifye.

³ Pour sa menm rezon, kan mon ti prezant mwan devan zot, mon ti feb e mon ti pe tranble.

⁴ Mon parol ek mon mesaz pa ti ganny anonse avek bann gran diskour ek lasazes imen, me avek en demonstrasyon pwisans Lespri Bondye.

⁵ Pour sa rezon, zot lafwa pa baze lo lasazes imen, me lo pwisans Bondye.

Lasazes Bondye

⁶ Pourtan, nou anons en mesaz lasazes parmi bann kretyen adilt; non pa lasazes sa lemonn, ni lasazes bann dirizan sa lepok ki pou ganny detri.

⁷ Mon pe anons lasazes sekre Bondye ki'n kasyet pour zonm. Depi avan kreasyon lemonn, Bondye ti'n deza swazir sa lasazes pour fer nou partisip dan son laglwar.

⁸ Okenn dirizan sa lemonn pa'n deza konn sa lasazes. Si zot ti'n konnen, zot pa ti ava'n krisifye Senyer laglwar.

⁹ Me parey Lekritir i deklare: Sa ki lizye pa'n zanmen war, sa ki zorey pa'n zanmen tande, sa ki zonm pa'n zanmen mazinen, Bondye in prepare pour sa bann ki kontan li.

¹⁰ Bondye in revel son sekre avek nou, par Lespri Sen. Annefe, Lespri i kapab egzamin tou, menm plan pli sekre Bondye.

¹¹ Lekel ki konn sa ki dan zonm, sinon lespri zonm ki dan li? Demenm, personn pa konn sa ki Bondye i mazinen, eksepte Lespri Bondye.

¹² Nou, nou pa'n ganny lespri dapre lemonn, me Lespri ki sorti kot Bondye. Konmsa, nou konpran tou sa ki Bondye in donn nou par son lagras.

¹³ Nou pa servi bann diskour dapre lansennyman lasazes imen, me avek sa ki Lespri Bondye i ansennyen. Konmsa ki nou eksplik bann verite spirityel avek dimoun ki annan sa Lespri dan li.

¹⁴ Me zonm ki kont zis lo son bann fakilte imen, pa kapab aksepte bann verite ki Lespri Bondye i kominike. Pour li, sa i en lafoli; i pa kapab konpran, akoz zis Lespri ki kapab fer li disernen.

¹⁵ Zonm ki annan Lespri Bondye i kapab disern tou; me personn pa kapab ziz li.

¹⁶ Annefe, parey Lekritir i deklare: Lekel ki konn panse Senyer? Lekel ki kapab donn li konsey? Me nou, nou annan panse Kris.