1 Korentyen 1 - Labib An Kreol Seselwa

¹ Sa let i sorti kot Pol, ki'n ganny apele koman zapot Zezi-Kri, par lavolonte Bondye, e osi kot Sostenn nou frer.

² Pour Legliz Bondye ki Korent, e pour sa bann ki'n ganny apele pour viv pour Bondye par lafwa dan Zezi-Kri; pour tou ki'n ganny apele dan non nou Senyer Zezi-Kri, zot Senyer e nou Senyer.

³ Lagras ek lape Bondye nou Papa, e nou Senyer Zezi-Kri ava avek zot.

Byenfe par Zezi-Kri

⁴ Mon touzour remersye Bondye lo zot size, pour son lagras ki i'n akord zot par Zezi-Kri.

⁵ Annefe, ini avek Kris, Bondye in anrisi zot avek tou bann don, an partikilye don laparol ek don konnesans.

⁶ Ensi, temwannyaz lo Kris in ganny byen etabli parmi zot.

⁷ Konmsa, i pa mank zot okenn don sorti kot Bondye, pandan ki zot pe esper nou Senyer Zezi-Kri aparet.

⁸ Li menm ki pou gard zot for e san repros, ziska lafen, pour sa zour nou Senyer Zezi-Kri.

⁹ Bondye i fidel dan son promes; li menm sa Bondye ki'n apel zot pour viv dan lakominyon avek son Garson Zezi-Kri, nou Senyer.

Divizyon dan Legliz Korent

¹⁰ Mon bann frer ek ser! Mon demann zot lo non Zezi-Kri nou Senyer: Met zot byen dakor ansanm; pa les okenn divizyon egziste parmi zot. Reste byen ini ansanm dan en menm mannyer panse e menm konviksyon.

¹¹ Annefe, mon bann frer ek ser! Mon'n aprann par bann dimoun sorti Kloe, ki i annan dispit parmi zot.

¹² Mon konpran ki en bann pe dir: Mwan, mon pour Pol; en lot: Mwan, mon pour Apolos; oubyen: Mwan, mon pour Pyer, oubyen: Mwan, mon pour Kris.

¹³ Eski Kris i divize? Eski Pol ki ti ganny krisifye pour zot? Oubyen, eski zot in ganny batize lo non Pol?

¹⁴ Mon remersye Bondye ki mon pa'n batiz personn parmi zot, apard Krispis ek Gayis.

¹⁵ Alor, personn pa pou kapab dir ki i'n ganny batize lo mon non.

¹⁶ I vre: Mon'n osi batiz lafanmir Stefanas, me mon pa rapel si mon'n batiz personn ankor.

¹⁷ Kris pa'n anvoy mwan pour batize, me pour anons Bonn Nouvel. In fer sa san servi gran diskour lasazes zonm, pour ki son lanmor lo lakrwa pa perdi son pwisans.

Kris, Pwisans ek Lasazes Bondye

¹⁸ Annefe, mesaz lanmor Kris lo lakrwa i en lafoli pour bann ki pe al perdi. Me pour nou ki'n ganny sove, i en pwisans Bondye.

¹⁹ La sa ki Lekritir in deklare: Mon pou detri lasazes bann saz; mon pou detri disernman bann ki entelizan.

²⁰ Alor, oli sa enn ki saz? Oli sa profeser Lalwa? Oli ou bann gran kozer dan lemonn? Bondye i'n demontre ki lasazes lemonn i en lafoli.

²¹ Annefe, lemonn avek tou son lasazes pa'n kapab rekonnet Bondye, la kot Bondye in montre son lasazes. Pour sa rezon ki Bondye in deside pour sov bann ki krwar par sa mesaz lakrwa ki nou pe prese, menm si i paret en lafoli.

²² Bann Zwif i demann mirak e bann Grek i rod lasazes.

²³ Kanta nou, nou anons Kris ki'n ganny krisifye, en mesaz skandal pour bann Zwif, en lafoli pour bann non-Zwif.

²⁴ Me pour bann ki Bondye in apele, Zwif koman Grek, Kris i pwisans ek lasazes Bondye.

²⁵ Annefe, sa ki lafoli pour Bondye, i pli saz ki zonm, e sa ki febles Bondye, i pli for ki lafors zonm.

Sa ki Bondye in Swazir

²⁶ Mon bann frer ek ser! Mazinen ki mannyer Bondye in apel zot: Parmi zot, napa bokou saz, ni bokou ki annan pouvwar, ni bokou ki sorti dan fanmir nob.

²⁷ O kontrer, Bondye in swazir sa ki paret fou dan lemonn, pour fer onte bann saz. Bondye in swazir sa ki paret feb dan lemonn, pour fer onte bann ki for.

²⁸ Bondye in swazir bann keksoz ki pa enportan dan lemonn, keksoz ki zot meprize, keksoz nanryen ditou, pour fer kanmi sa enn ki krwar i saz.

²⁹ Konmsa, personn pa kapab vant son lekor devan Bondye.

³⁰ Me Bondye in ini zot avek Zezi-Kri ki i'n fer vin nou lasazes: Kris ki rann nou zis devan Bondye, ki permet nou viv pour Bondye e ki delivre nou dan pese.

³¹ Donk, parey Lekritir i deklare: Sa enn ki oule vant son lekor, met son lafyerte dan Senyer.