Romu 12 - BAṈARA KO VAIRU AMA LEVELEVEOSaevo Baṉara va nabuluputo kale ama 1 So sole, me aṉako tamania kalea mela, vo Baṉara ko matuma roquano ko kio kale avo aṉata a melai titia me, tu meta kativomo vo Baṉara meko saevo, saevoma siqasiqa jari, ni tabu emo vo va nabuluputo kale voko zolevo kale. Ko ikio koa tuvevo ama ilusato ko meme qativo ama vo. 2 Meta pui lulueko komia ruqe ama peuru ma peuru kale amu ko kalo, melai meta zarievomo vo Baṉara meko bulo kale tu vota vairu o imelou me meko saevo ni kerukeru kale. So inio meta me roveovou paqumuko vo Baṉara ko vatolo—koa uri ama ni zoleilo sama ni sidopu ama vokasi. 3 Ako vo Baṉara ko roquano sama puaro vo o katilako aṉa kale ta eri kiala mea kiada mela kasi: Meta pui aikailo me ṉavi melai meta zarazaraimo meko kerukeru kale, vo Baṉara o katimelako oqu ko malezikako kale. 4 Animeta kubo kata samela omadeu tupu kale, ni koa kata poso ta azaazama koko sake sama. 5 So inio animeta kubo maba mela, melai animeta omadeu pado tupua mela vo Karisito kale ni animeta omadeu me eva azaazama kata poso mela omadeu pado tupu kale. 6 Vo Baṉara ta o mela puarika azaazama iruruputo, so sole ko male tu animeta meqai iruruputo animeko azaazama puaro poso. Nio ṉota Baṉara kasi azo ama bazu kai bazuto ko puaro saṉa ṉo elou, ta ṉota ereka ko ṉoko oqu ko podepodeti kale; 7 ma ṉota nabuluputo ko puaro saṉa ṉo elou ta ṉota ṉo nabuluputou; ma ṉota kama nianiiekato ko puaro saṉa ṉo elou ta ṉota ṉo nianiiekatou; 8 ma ṉota edolomu ko zuvarimo ko puaro saṉa ṉo elou ta ṉota ṉo zuvarimou se. Vo o puarikani edolomu kasi voko quli ta o puarikou zoleilo kale. Vo pizato sala ta o uria erekou voko koidi; ni vo o tauvezatani ta o tauvezatou zoleilo sase. 9 Ko roquano ta maba tuvetuve ama ko elou. Kai kideipomo ko ruqe ama quli, ni noqoekomo ko uri ama quli. 10 Meta matu roquekiniomo muli me ṉavi ako meta lotu tamania mela sole, ni dikidauputole paṉaekiniomo me ṉavio kude. 11 Matu iruruputomo vo Baṉara ko iruruputo kale ni pui lupalupato. Va nabuluputomo mevo Lekasa meko pado ama bulo kale. 12 Meta zoleimo meko kai keru kale ko kilo ama saevo, ni kaitiziomo meko tapata keru, ni vararaitomo kiada keru. 13 Meta puarikomo meko kama ma kama se olaquamu vo Baṉara ko maba madu kale amu kasi, ni ma veukomo meko pade se pakepakeo maba madu. 14 Pasevomo vo Baṉara tu vota mauru o imo seke niumaemelani me, pasevomo vo tu mauru o imo se, ni pui mati levezo. 15 Mati zomanomo zoleilo seke zoleivani, ni zomanomo zialo seke ziani sase. 16 Meta kerukeruekiniomo muli. Meta pui rauraraurailo, melai paṉao kale ṉeamukomo meko koidi. Ni meta pui kai aikailo meko nianiio. 17 Esa kala ta ruqe o imelou me ta meta pui mevai besiekou vo koa ruqe. Madoekomo ereko ko uria kelo ama quli kiadama maba poso kasi. 18 Meta matu madoekomo tu meta bule kale me elou kiadamu kasi. 19 A baerebaere poso mela, meta pui me erekou ko vaitotola sama quli, melai vaekomo tu vo Baṉara ko korakorailo ta ko korotiko. Omadeuvo ko Tabu ama Riki kikolani jari, “Aṉa inio vaitotola salala, ni aṉata a erekou ko, kiola vo Baṉara,” kikolako. 20 Melai meta luluekomo ko Tabu ama Riki ko eri kikolako, “O luapou ṉovo kana, ṉota niaeva vo; o rokauvou, ta ṉota kativa ko ju; komi kale inio ṉota ṉo roveovou qurativo vo,” kikolako. 21 Meta pui zarieko ko ruqe tu kota zara ko imelo me; melai meta koqotaekomo ko ruqe uri kale. |
The New Testament in the Bilua language, Solomon Islands © The Bible Society of the South Pacific, 1995.
Bible Society of the South Pacific