Kelokelozato 3 - BAṈARA KO VAIRU AMA LEVELEVEO

Sadisi lotu qoqono kasi ama bazu

¹ “Ṉota eria rikito eve sai Sadisi ama lotu qoqono ko mateana kasi: Eri nio koa bazu koko kuevako vokasi azo vo okai lekasa puani koa sikeura auvana vo Baṉara ko ni koa sikeura suti sala. Aṉata aqai nianiia ko me lula me erekako quli ni aṉata a melai nianiia ta meta saevo mela jaria mela lelo, melai meko tuveano ta meta vou mela inio!

² So sole meta toiratomo, ni kai vaitomo meko uria luluevo vo Karisito ni pizaekomo koa silo pala uri ama quli mekasi kobeta evako puliako koa kiadama mumailo. Ako aṉata ada mela kea ko me lula me erekako quli ta pui nio ko korota vo aṉavo Baṉara ko vilu kasa sole.

³ So sole kerukeruekomo koa nianiiekato ko me lula me viqema ni me ṉeamukema. Meta zorikomo ko ni liliziomo meko sarueko poso kale azo. Ako meta pui me doiratou nio aṉata ota podolo kilo a melai elou vo kuilokuilo ala maba jari, ni meta maba pui meba kai nianiiovou koa taku so keru aṉa a qilou keru mekasi sole.

⁴ Melai kama poso maba madu mela me sai Sadisi peuru kale me evani mela ta pui nio kaqa meqai ika meko suma ko sarueko. Me inio me daliovou aṉa sate tapo sabosaboa mela, ako meta me malezika sole.

⁵ Seke koqotaeko amu ko ruqe inio soa tapo sabosabo ke elo amu, nio aṉata pui aba tama vouvaekou seko ṉi poso ko noqola kama saevo samu ko ṉi ko buka topi azo. Aṉavo Mama ni voko mateana madu ko tanama kale inio aṉata a uria zakaremu puekou ko seta aṉa kale amu inio ko se kio.

⁶ “Uri tu meta paqumukomo meme viqako quli vo Tabu ala Auvana kiolani sikeura lotu qoqono poso kasi!

Piladelepia lotu qoqono kasi ama bazu

⁷ “Ṉota eria rikito eve sai Piladelepia peuru kale ama lotu qoqono ko mateana kasi: Eri nio koa bazu koko kuevako vo Tabu ala ni Tuvevo ala kasi azo. Vo inio vo Devita ko vidulu o ṉeamukani nio so keru vo o veuka keru ko tibulu inio puliala ta o rovea tibuliko ko, ni so keru vo o tibulika keru ko inio puliala ta o rovea veuko.

⁸ Aṉata aqai nianiia ko meme erekako quli ni aṉata aqai nianiia meta pui matuma pizato samela inio; melai inio meta me lulueka aṉako nianiiekato ni meta kerula meda eva aṉa tona. Keatini, aṉata lula a mela veuka ko tibulu ko puliala opa roveovo ama tibuliko.

⁹ Keatini! Ako sea Setani ko vaki se ‘Eṉe inio ko Jiu amu ṉela,’ kikelani, melai seko tuveano ta pui Jiu amu, se inio aṉa a mati kilo amu mekasi ni seta ke loqunou meko kiti kasi. Nio sea kiadamu ta kelai nianiiovou ko aṉata a roquemela me kio.

¹⁰ Meta lula me zorika aṉako bazu meko inobea pataito kai elo ko naqunaquto kale, so sole aṉata a bakiemelou me kiadama tapata kale azo koko kuevako peuru ma peuru kale amu tona, tu kota ko madoemo kiadama maba madu se miduku kale ke evani.

¹¹ Aṉata a qilou taukavole, so sole meta pizaka noqoeko emo ko quli meme ṉeamukako so inio puliala ta opa roveovou tamela rapeko koa reketekete, ko me koqotaeko ko ruqe kale me qovo ama.

¹² Seke koqotaeko amu ko ruqe ta piza kama jujuli barabara a imou aṉavo Baṉara ko Jelepade kale, ni seta maba pui kepa vaekou ko. Aṉata a rikiekou se tona aṉavo Baṉara ko ṉi, ni aṉavo Baṉara ko peuru ko ṉi, koa vairu ama Jerusalema, koko saqoro ama aukale azo aṉavo Baṉara kasi azo, ni a ṉaviko vairu ama ṉi.

¹³ “Uri tu meta paqumukomo meme viqako quli vo Tabu ala Auvana kiolani sikeura lotu qoqono poso kasi!

Leodisia lotu qoqono kasi ama bazu

¹⁴ “Ṉota eria rikito eve sai Leodisia lotu qoqono ko mateana kasi: Eri nio koa bazu vo Emeni kasi azo ko kuevako, vo kerula kala ni tuvevo ala bazubazuto ko maba, ni koko raki ota ka evani kiadama quli vo Baṉara o erekema.

¹⁵ Aṉata aqai nianiia ko meme erekako quli; aṉata a melai nianiia ta meta pui sarosaroro ni pui vualavuala me evani mela. Soa mela inio ko aṉata a mela zariani me!

¹⁶ Melai meko luluelo aṉa ta omuqa kerukeru sate, meta sasa vualavuala kuvaruvarua mela pala, pui vualavuala kamela ni pui sarosaroroa mela, so sole aṉata a jupaemelou me a juto kude!

¹⁷ Ako meta eri kimela, ‘Eṉeta batiroa ṉela ni kubo quli saṉela, pulia quli ṉeqa lilita,’ kimela. Melai meta pui meqai nianiia ko meme evania upotuqu ni tolailo elo! Meta ozaoza kamela, ni leqa kamela.

¹⁸ Aṉata a uria bazuemela me tu meta tatabaraekomo ko qolo aṉa kasi azo, koa bulebule ama qolo, tu meta au kalea batiro emo. Ni so jari meta tatabaraekomo ko tapo suma tu kai kiazaekomo meko quraqurati ama lava pide elo. Ni so jari meta tatabaraekomo kama meresini tu kai raibikomo meko vilu, so inio meta me roveovou kelokelozato.

¹⁹ Aṉata a riqaema ni a jidopu puema sea kiadamu se aṉa a roquemani. So sole tuvevo putomo ni liliziomo meko sarueko poso kale azo.

²⁰ Ako keatini! Aṉata a lojoa veutu tona ni a dubitubita; so sole vo ota la viqo ala aṉako kora ta ola veukou ko veutu, nio aṉata a amaqeovou voko pade kale ni a zomanou vuato vo sase, ni vo melai o zomanou vuato aṉa sase.

²¹ Nio seke koqotaeko amu ko ruqe ta a zariemou tu seta ke papuvou lekasa puilo aṉa sase aṉako papupapu topi, omadeuvo aṉa lula a qoqotate jari ni abeta papua lekasa puilo a Mama ko papupapu topi.

²² “Uri tu meta paqumukomo meme viqako quli vo Tabu ala Auvana kiolani sikeura lotu qoqono poso kasi!”