Epesasi 2 - BAṈARA KO VAIRU AMA LEVELEVEOAnimeko kovo ko saevo 1 Ni koko paloasako taku kale meko auvana ta vouma meko boutare ni pui zoripato kale. 2 Ako koa taku kale meta me lulueke sole komia peuru ma peuru ko ruqe ama kalo, ni meta me zorive vo Setani, vo ziolo ko lekasa vo obeta evani komia peuru ma peuru kale. Ni voa omadeula Setani nio o iruruputani se pui ke zorivani vo Baṉara kasi. 3 Melai koko paloasako taku kale animea kiada mela ta se kekai saevako saevo jaria saevo me eve. Ni animeko elo kale animeta meqai zariovi zoleko animeko saevo boutare kale, ni animeta me lulueke animeko tupu ni kerukeru kokai zariako quli. Ni animeta meda tolailo nio vo Baṉara ko korakorailo kale me ṉaviko kalo kale sole, omadeuvo sea ruqe ama maba poso jari. 4 Melai vo Baṉara ko akoezato sama roquano ta palopaloasi ama ni vota matuvole o roquemele anime, 5 so sole anime mebeta vouva keru auvana kale animeko pui zoripato kale, inio vota o katimele anime vairu ama saevo vo Karisito kale. Nio voko pakiezato sama roquano kale inio animeta me bakiovi. 6 Ni animeko omadeu vati elo vo Karisito kale vota o saevimele anime vo Karisito sase ni vota o papuemele anime lekasa puole vo Karisito sate aukale. 7 Ni vota o erekake komi quli tu kiadama maba madu ta ke kelou ko kuevako taku kale noi tinia aqasiele ama ikio voko pakiezato sama roquano. Ako koa pakiezato sama roquano ta noqola kasa ko eve sole voko roquemelo kale anime omadeu me vati evani mela vo Jisu Karisito. 8-9 Ako vo Baṉara ko pakiezato sama roquano kale inio animeta me bakiovi animeko oqu kale. Ni kota pui me ṉaviko pizato kale inio kopa erei, ni pui animeko iruruputo kale, melai kota vo Baṉara ko puaro ikio, so sole puliala ta opa kai aikailou. 10 Ako vo Baṉara ta mata tova eremelo jari o eve ni voko omadeu melati ivo anime vo Jisu Karisito kale inio vota vairu ama maba poso jari o imelake tu animeta me ereko uri ama iruruputo vo lula o mela inainaekema tu animeta me erekou. Omadeu vati elo vo Karisito 11 So sole me pui Jiu mu mela meko alilo kale, meta kerukeruekomo ko eri. Se Jiu mu ta ke melai kuirika meta pui me moveivani mela, melai ke ṉavi nio ke moveivani nio kikelani. Melai koa moveilo ta maba ko erekako tupu kale ama pala ikio. 12 So sole kerukeruekomo, kuleto meta pui vo Karisito satea mela, ni pui Izireli ama qoqono kalea mela. Ni so keru meta puliama kena samela koa leveleveo sama korotato poso vo Baṉara o erekema voko maba madu Izireli qoqono kasi, so inio meta pui meba vai nianiiovini mela vo Baṉara ni puliama kai keru meko pakio samela. 13 Ni koa taku meta matu vaṉa mela Baṉara kasi azo, melai erisaṉa vo Jisu Karisito ko voukale inio meta sipole o imela Baṉara kasi. 14 Ako vo Karisito kale kude inio animeta meda odouvikinia erisaṉa, ako vo inio omadeu o imela sole Jiu amu mela ni pui Jiu amu mela. Ako animeta me bitasiovi omadeuvo ko matuma otu jari animeko tiania, melai vo Karisito inio o niaqarike koa kanaekinio ko otu o ṉaviko tupu kale ama voukale. 15 Ni se Jiu amu ko Bazu ta matu kubo koko silosilo ama bazu poso ni koko kalo poso. Melai vo Karisito inio o epezike ko, ako voko matuma zario ta okai zariake sole tu komia omuqa qoqono Jiu amu ni pui Jiu amu ta omadeu pado vairu ama qoqono qo elou Karisito kale. Ni komi kale inio vo Karisito ta o erekake ko bule anime Jiu amu ni pui Jiu amu mela ko tiania. 16 Ako vo Jisu ko vou korosi topi ama ikio ko dokolikake Jiu mu ni pui Jiu amu ko kanaekinio ni kokale vota omadeu qoqono o imake ni o mati odouvikiniake se Baṉara kasi. 17 So inio vo Karisito ta o kuevi ni okai bazubazute Baṉara ko bule me pui Jiu amu mela kasi me vaṉa me eveni mela Baṉara kasi azo, ni so jari vota okai bazubazutake Baṉara ko bule se Jiu amu kasi se lula sipole ke eveni Baṉara kasi. 18 Ako vo Karisito kale animea kiada mela ta me rovea kilo vo Mama kasi omadeu Auvana kale. 19 So sole erisaṉa me pui Jiu amu mela ta pui me ṉada raneani mela ni pui sorola mela. Melai meta vo Baṉara ko tabu ama qoqono kalea mela ni meta vo Baṉara ko saidi kalea mela. 20 Ni me melai me orumuilou koa vola topi se apositolo ni poropita madu ke erekema. Ni o ṉavi Jisu Karisito inio koko viluabara koa oruorumu ko. 21 Ni koa pado ama pade ta Jisu Karisito inio obe vinaeka. Ni vo inio obe rapukika inio kota vo Baṉara ko Jelepade kota eva. 22 Ni so inio vo Karisito kale inio me pui Jiu amu mela ta omadeu orumuilo meda eva se Jiu amu sate. Ni meta me orumuiva tu kala pade jari me elo sai vo Baṉara o evakoi voko Auvana kale. |
The New Testament in the Bilua language, Solomon Islands © The Bible Society of the South Pacific, 1995.
Bible Society of the South Pacific