2 Pita 1 - BAṈARA KO VAIRU AMA LEVELEVEO

¹ Aṉa Saimone Pita lala vo Jisu Karisito vo nabulu ni apositolo lala. Aṉata a joroeka aṉako riki mekasi, me matu qulepo ama oqu samela kasi eṉe ṉe qoema oqu jari ama. Ni meta me ṉeamuka koa oqu ako animevo Baṉara ni Pakio Jisu Karisito ta ijatiniavo o kavani ni sidopu ala sole.

² Baṉara ko pado ama pakiezato sama roquano ni bule ta o katimelou me meko vai nianiio kale vo Baṉara ni Jisu animevo Lekasa.

Baṉara ko nokaemelo ni pitoemelo

³ Jisu inio vo Baṉara ko pizato sala. Ni voko pizato kale inio o katimele kiadama quli anime meqai zariako animeko saevo kale tu meva nabuluputo vo Baṉara. Animeta me ṉeamuka komi quli ako animeta mevai nianiia vo Baṉara sole, vo o nokaemeleni anime. Vo Baṉara ta voko ṉaṉaidara ni sidopu kale

⁴ inio vota o katimele voko matuma ni aqasiele ama puaro poso vo leveleveo o mela ikema. Ni koa puaro poso kale inio me roveovou zomano vo Baṉara o kavani jaria kalo. So inio peuru ma peuru kale ama ruqe ama zario poso ta pui ko niumaemelou me.

⁵ Sokale avo inio meta me matu madoekou tu uri me ikou meko saevo. Meta oqu samela, melai matu madoekomo tu kokale meta kati tuboekomo ko uri ama kalo ni ko nianiio,

⁶ ni me ṉaviko aveavezio, ni ko pizaka lojo elo tapata kale, ni vo Baṉara va nabuluputo,

⁷ ni meko baisemo meko lotu tamania madu, ni ko roquano.

⁸ Ni komi quli ta ko elou me tona ni ko rapukou ni matu ko elou ta ko ikio ko tauvemelou ni meta pui utua mela melai ko ikio ko tauvekou meko vai nianiio animevo Lekasa Jisu Karisito tu kokale meko saevo ta uri ko elou.

⁹ Melai kala ta puliama ko quli sala, vota pui o uria keazatani ni vota leqa kala jari, ako vo inio vo ukaka o ikani voko lulama saqailo voko boutare kale azo sole.

¹⁰ So sole lolo poso, Baṉara ta o nokaemele ni o pitoemele me tu o ṉavi kaqe. Sole meta matu madoekomo ni kasa ikomo ta me inio voko tuvevo ama pitopito ama maba poso mela. Ni meta me erekou ko quli ta meta maba pui meba pialou.

¹¹ Kokale inio meta me qovou matuma baroekato vo Lekasa animevo Pakio Jisu Karisito ko lekasa puo kale. Ni koa lekasa puo ta paito pide ama ko elo ama.

¹² Mebe kai nianiiako ikio ni piza kavole tuvevo mebe ikako ikio melai kiada keru aṉata a dauvemelou me tu me qerukeruekou.

¹³ Ako kota ko male sole tu aṉata a dauvemelou me tu me qerukeruekou so keru aṉa abeta saeva keru miduku kale.

¹⁴ Ako aṉata aqai nianiia ta aṉata sipole ada vouvou sole, vo animevo Lekasa Jisu Karisito olai bazuekevo.

¹⁵ So sole aṉata a matu madoekou tu a dauvemelou me tu me roveovou kerukerueko komi quli kiada keru. Ako aṉako vou ko tova melai, aṉata aqai zaria tu meta pui ukaka me ikou melai me qerukeruekou komi quli.

Eṉeta ṉe qeve vo Karisito ko ṉaṉaidara

¹⁶ Eṉeta lula ṉe melai bazueka me vo animevo Lekasa Jisu Karisito ko kilo pizato kale. Ni komia bazu ta pui kala ko bazubazulao bazu, melai eṉeta ṉe qeve Jisu ko ṉaṉaidara ṉe ṉaviko vilu kale.

¹⁷ Ni eṉe sai keru inio Jisu ta ota va viqake vo qulepo ama ṉaṉaidara sala Baṉara ko kora. So keru inio Jisu ta o koake ko matuma raurailo sama pesio vovo Mama Baṉara kasi azo koa kora eri kikovema kale, “Nei nio aṉavo Meqora, vo aṉa a matu roquevani ni avai matu zoleivani.”

¹⁸ Eṉe melai ṉe viqake koa kora ko saqorema aukale azo so keru eṉe Jisu sate ṉebeta eva keru koa tabu ama sopu kale.

¹⁹ Ni komi quli kale inio animeta me rovea uria tuvevo pueko se poropita madu kikevevo. Sole uri tu me luluekou se kikevevo, ako seko bazu ikio ko bokerimelako me tu meta me bitasikou ko uri ama nianiiekato ruqe ama kale azo, kota ko juke koko taloako kutumana kale jari sole, ni koa juke ta kobeta talolou ti kobeta raneovou, ko ikio, ti obeta vaitou vo Lekasa Jisu ni me maba vai nianiiovou vo Baṉara. Kota omadeuvo raneodola ko zakaremu kobeta talolou meko bulo poso kale jari sole.

²⁰ Ni matu qulepo ama quli tu meta meqai uria nianiiovou ko eri: puliama bazu Tabu ama Riki topi ama ta kepa utu ereke se poropita madu ke ṉaviko kerukeru kale.

²¹ Ako puliama se poropita madu ko bazu ikio kopa utu erei vo maba ko vatolo kale. Melai sea maba poso seke odiziani Tabu ala Auvana kale inio kekai pesiake vo Baṉara ko bazu.