1 Timoti 6 - BAṈARA KO VAIRU AMA LEVELEVEO

Mabaku poso ke kalo avo

¹ Se mabaku poso ta keta ma uria paṉaovou seko tanamu, tu puliala ta ruqe kaseko o elou vo Baṉara ko ṉi ni animeko nianiiekato.

² Sea mabaku poso se lotu maba tanamu samu ta pui ke kaikuapo zorimo seko tanamu eri kio sama kerukeru kale, “Animevo tanala ta animea lotu tamania kale ala pala.” Melai seta kema uria nabuluputo se, ako sea tanamu seke koani ko tauvezato sea mabaku poso ko iruruputo kale ta tuvevo puto ko maba madu sole ni sea mabaku poso ta ke roquema seko tanamu sole. Ṉota kai nianiiekate ni kai bazubazute komi quli poso.

Lipalipa kama nianiiekato ni batiro

³ Vo okai nianiiekatani ko edoloma lotu ko bazu ko pui ko luluekako vo animevo Lekasa Jisu Karisito ko pesio kikolani ni pui ko kati korotako vo Baṉara ko tava paṉao

⁴ ta o utu aikaivani pala ni pulia quli ka supi vota o paqumuka. Voko sarusaru ama vatolo kale inio vota okai zolizolita ni okai aivepata koa rukuruku poso; komi ta kama konoilo, ni kasekasekinio, ni riqaekinio, ni ruqeruqe ama mamuro ko lainizato,

⁵ ni kiada keru ama zolizoliekinio sama quli. Sea maba poso ko kerukeru ta sarube ama ni seta pui ke rovea nianiieko ko tuveano. Ni koko topi tiniama seko sarube ama kerukeru ta Baṉara ko tava paṉao ta kai batiro puilo ko quli kikela.

⁶ Zio, vo Baṉara ko tava paṉao ta matu batiro ko iva voa maba, vo o paqumukani kai zoleilo kokale ozaoza obe elou melai batiro obe elou melai.

⁷ Ako loma quli kio anime me qati kuevima peuru ma peuru kale so keru anime me alile keru? Pulia quli! Ni mata loma quli ikio animeta me roveovou boriko peuru ma peuru kale azo anime me vouvou keru? Pulia quli!

⁸ So sole animeta sailao ni kama suma saṉa me elou ta, animeta meqai zoleilou ko.

⁹ Melai se keka zariani kovo ko batiro ta zolizolito ko moa ni keta tulumua kubo ruqe ama ni niumaniuma kama zario poso kale, koko niumaekake seko oqu.

¹⁰ Ako takula ko roqueko ta kiadama ruqe ko raki sole. Kake maba poso se lula matu piza ke evani takula ko vailiko kale ta keta epeiva oqu kasi azo, ni kokale kude inio kubo upotuqu ta ko duki pueka seko bulo poso.

O ṉavi Timoti o kalo avo

¹¹ Melai ṉo, vo Baṉara ko maba ṉa, ta taka lapase kiadama komia ruqe poso. Kai vinai ko sidopu, vo Baṉara tava paṉao kale, ni oqu kale, ni roquano kale, ni pataito kale, ni nodenode ama saevo kale.

¹² Matu madoe tu pizate ṉoko oqu ko saevo kale, omadeuvo vo rereo ko maba jari vo oka zariani pizato voziekinio kale, tu ṉo qovou koko mamola, ko ikio ko noqola kama saevo. Ako ko ikio koa noqola kama saevo vo Baṉara lula o ṉati nokaekema ṉo so keru ṉo parani putole kai bazuto ṉo eve keru ṉoko oqu ni kubo maba madu keta ṉa viqe keru ko.

¹³ Vo Baṉara ko tanama kale, vo o katikani ko saevo kiadama quli, ni Jisu Karisito ko tanama kale, vo o uria kasa puekeni voko oqu vo Ponitiasi Paelati ko kuleto, aṉata a bazueṉa ṉo

¹⁴ tu ṉota zorika ṉoko soru poso ni ṉo qati vailou ti kobeta barolou koa ṉaniu kale so keru animevo Lekasa Jisu Karisito o puratou keru.

¹⁵ Voko purato ta ko elou vo Baṉara ko tutututuki ama taku kale, voa mauruto sala omadeu pado Matu Lekasa, se aikovakova madu vo Aikovakova, ni se lekasa madu vo Lekasa.

¹⁶ Vo o kiada ta o saevani ni pui opa vouvo ala, ni o evani koa simanamana kale ko puliala o roveako kelo. Puliala maba ta lula o vea vo, ni puliala maba ta o rovea velo vo. Animeta me rauraevou vo noqola pizato sala! Emeni.

¹⁷ Bazuema se batiro kekai evani erisaṉama saevo ko lomaloma tu seta pui kekai raurailo, ni seta pui kekai keruvou soama batiro, ako koa batiro ta kapiavole ko roveako paito sole, melai seta kevai keruvou vo Baṉara inio, vo puaropuaroa katimelo o evani kiadama uri ama quli koko zolemelako anime.

¹⁸ Bazuema se tu seta kemai tauveko edolomu seko batiro, tu seko zolemo ama ta seko uri ama kalo ko elo, ni kekai zoleilo seko mati puaro se edoloma maba poso.

¹⁹ Komia keve kale kude inio seta noqola kama batiro saṉa ke elou ti ke kovou koa noqola kama saevo, koa tuvevo ama saevo.

²⁰ Timoti, ṉota mana vailo kati eve ko lotu kale ama nianiiekato ko lula ṉoqai nianiiako. Ṉota taka lapase koa kasekasezato sama pesio ko pui ko kasevako vo Baṉara, ni taka lapase koa sarube ama aivekinio kake maba poso “Nianiio” ka kikelako seko saruilo kale.

²¹ Ako sea poqala koa “Nianiio” samu kikelani ta kota lula komai niumata, ni kokale avo ta seta lula keta epeiva seko oqu kale azo. Aṉata a vararaita tu vo Baṉara ko roquano ta ko elou mea kiada mela tona. A baika.