1 Koriniti 11 - BAṈARA KO VAIRU AMA LEVELEVEO

¹ Meta luluekomo aṉako kalo omadeuvo aṉa a lulueva jari vo Karisito.

Bouluko ko lezu lotu padopadoilo kale

² Aṉata a mela zoleiva me ako meta me qerukeruela aṉa kiada keru ni meta me lulueka koa nianiiekato ko aṉa lula a melai bazuekema me.

³ Melai aṉata aqai zaria tu melai bazueko ko rekoreko ko bouluko ko lezu. Vo Karisito inio raura kala kiadama maba kasi azo, sole vota sevo lezu jari ala. Ni vo roroto ala lasive ta raura kala voko reko kasi azo, sole vota kovo lezu jari ala. Ni vo Baṉara inio raura kala Karisito kasi azo, sole vota vovo lezu jari ala.

⁴ So sole voa maba vo o vararaitani ma okai pesiani vo Baṉara kasi azo ama bazu lotu padopadoilo kale bouluboulu lezu ala ta o zarazaraeva vovo lezu, vo inio vo Karisito.

⁵ Ni koa rekoreko ko vararaitako ni kokai pesiako vo Baṉara kasi azo ama bazu lotu padopadoilo kale lezu bouluboulu pide ama ta ko zarazaraeva kovo lezu, vo inio kovo lasive. Puliama ta koko azavo kama pado reko lula qopu rui kama kasi azo.

⁶ Ko rekoreko ta pui ko sudekou koko lezu inio kota ko male tu sidopu avole ko kobuekou koko tou. Melai kota kama quraqurati ama quli koa reko kasi tu qopu rui ko elo ma kota ka kobuilo koko tou, so sole kota ko boulukou koko lezu.

⁷ Vo lasive ala maba ta pui uri tu vota o boulukou voko lezu, ako vota vo Baṉara vo piqepiqemu ni vo o odiemani maba poso tu ke ṉaṉaidara puevo vo Baṉara. Melai se rekoreko inio ke odiemani maba poso tu ke ṉaṉaidara puemo seko lasive poso.

⁸ Ako vo Baṉara ta pui opa ereve vo maba reko kale azo melai reko ikio vo maba kale azo.

⁹ Ni vo Baṉara ta pui opa ereve vo maba tu vota reko kaqe, melai ko reko ikio o ereke tu vo maba kaqe.

¹⁰ Sokale avo inio ko reko ta ko boulukou koko lezu tu ko puratiko se mateana madu kasi ta kota zariekato sate inio ko vararaita ni bazubazuta kio.

¹¹ Melai animeko omadeu vati elo vo Karisito kale ta ko reko ta pui ko rovea ereko kiadama quli ko kiada, ni vo lasive ta mata pui o rovea ereko kiadama quli o kiada, melai nioqata omadeu tauvekinio qo elou.

¹² Ako tuvevo ikio ko reko ta kulekuleto ko purate vo maba kale, melai mata tuvevo ikio ko so jaria alilo inio o eva vo maba vairutu reko kale, ni kiadama omuqa ta vo Baṉara kale, vo kiadama quli ko raki.

¹³ Meta pizaekomo me ṉavi; kota koroto ama quli kio tu kama reko ta ko vararaitou vo Baṉara kasi lotu padopadoilo kale lezu bouluboulu pide ama, kio?

¹⁴ Keatini, animea kiada mela ta meqai nianiia ta lasive maba ko jako tou elo ta qurato sama quli,

¹⁵ melai ko reko topi ama ta koko zaloni kio. Ako koko rosia tou ta koka puariziovi ko tu kokai bouluilo sole.

¹⁶ Melai kala ta pesipesi saṉa o ikou komi quli kiovou, inio aṉako opato ta eṉe ni vo Baṉara ko qoqono poso ta puliama edoloma kalo saṉela.

Vo Lekasa Jisu ko vuato

¹⁷ Melai erisaṉa aṉata a melai bazuekou me kama quli, ni aṉata pui aba rauraemelou me, ako meko kalo meko ilusato ko padoilo kale ta matu ruqe sole.

¹⁸ Kuleto ta aṉata lula a viqa meko bazu ta meta kama sebito ko pesipesito ko poqala poso me eva meko lotu padoilo kale, ni koa bazu ta ka kobu ta a duvevo pueka kota tuvevo ama quli.

¹⁹ Ako zakaremu ko pitasio ta kota elou me tona tu se sidopu amu ta ke uria keazailou.

²⁰ So keru meme badoiva keru kuole vo Lekasa Jisu ko vuato tu me qerukeruekou voko mela vou, ta meta maba pui me qerukerueka voko vou.

²¹ Ako so keru meme vuata keru ta pui me darekinia vuato, nio kake ta keta luapa melai kake ta doilili kekai eva seko matu nozuto.

²² Noi nio? Meta puliama me ṉaviko zae samela inio sai me vuatakoi ni me nozutakoi, kio? Ta so inio meta maba pui me mati koidipa vo Baṉara ko qoqono ni me quratima se olaquama maba poso, kio? Noni kiavou aṉako melati kaseko kale komi quli? Abe rauraemeloa lala inio ko me, kio? Komia meko kalo kale ta maba pui aba rauraemelou me!

²³ Ako vo Lekasa kasi azo inio aṉata a qoe koa nianiiekato ko lula aṉa a melai nianiiekikako me, ko eri kio sama. Koa ipu kale vo o saiqoriovi keru inio vo Lekasa Jisu ta o koake ko bereti,

²⁴ ni ovai rauraekake vo Baṉara, ni vota so kiolake, “Komi ta ko mamola pueka aṉako tupu, ako aṉata a mela vouvou me sole. Meta kumo komi aṉako kerukeruelo kaqe,” kiolake.

²⁵ Ni so jari mata, koa vuato ko tova vota o katimake ko kapa vaini ko ju sama, ni so kiolake, “Komia kapa vaini ko ju sama ta ko mamola pueka vo Baṉara ko vairu ama leveleveo, ko pizato saṉa ko evako aṉako dara kale. Kiada keru meme nozuekou keru ko, meta erekomo aṉako kerukeruelo kaqe,” kiolake.

²⁶ Komi ko kalo ta kiada keru meme quovou keru komia bereti ni me nozuekou komia vaini ko ju ta me qasekou vo Lekasa Jisu ko vou ti kobeta barolou voko tova vaito mata.

²⁷ So sole kala maba ta o kuovou koa bereti ma o nozuekou koa vaini ko ju, ko anime mevai ilusikako animevo Lekasa Jisu, puliama voko tava paṉao sate, nio vota o sarueka vo Lekasa ko tupu ni dara kasi, ni vota koko kuiripato saṉa ota elou.

²⁸ So sole vo maba ta o korotiko voko kerukeru o ṉavi saita inio vota o kuovou koa bereti ni okai nozuekou koa vaini ko ju.

²⁹ Ako vota pui o paqumukou vo Lekasa ko vou ikio ko mamola pueka koa bereti vo o kua keru ni o nozueka keru koa vaini ko ju, vota kuiripato saṉa ota eva so keru vo o vuata keru ni o nozuta keru.

³⁰ Sokale avo inio kubo mela meta lekuleku meda eva ni meda verepa, ni kubo madu ta lula keta vouva.

³¹ Animeta me qorotikou animeko kerukeru me ṉavi kuleto, nio vo Lekasa ta pui opa tolaemelou tu o sidopu puemelo.

³² Melai animeta me qoa vo Lekasa Jisu ko koqotato tu animeta pui omadeu noqola tolailo meba elou komia peuru ma peuru ko maba poso sase.

³³ So sole, a qaka ni visi poso mela, so keru meme badoilou keru tu kuole vo Lekasa Jisu ko vuato tu me qerukeruekou voko mela vou, meta me darekiniou.

³⁴ Ni vo o luapani ta o vuatou o ṉaviko pade kasi kuleto, tu meta puliama kuiripato me qovou meko lotu padoilo kale. Ni ko kobeta evako quli poso ko meme qasekema meko riki kale ta a roveovou melati korotiko so keru aṉa a melai kilou keru.