YOSHUWA 22 - Bibliyeeda Ghaydit

Yoshuwa ghwanung' gabiikta ghoah eemeeda heeda ghayeawa

¹ Hean gaguursa Yoshuwa fuga Rubeni, ea fuga Gadi, ea eemeeda silach bugusta nibiyeenya bea Manase,

² ak gwayeesha saawa, “Agooga noang'waanyi sean gea ghayi rukuneegwa Musaheeda was siida gadiyeeda NG'UTAMIIDA, nea ghoamwaschi ng'asheegeasu sean earukuneegwa;

³ ak ea mii gwanda fugeagwa ooduupcheewi aba eawoojigiga seaniin, ea ghoah ghamneawa, nea ghoang'waanyi muuchi digheanyeeka NG'UTAMIIDA was ASEETEANG'WA.

⁴ Ak ghamneawa NG'UTAMIIDA was ASEETEANG'WA niidaw fuufta fugeagwa ooduupcheewi, gawuurji gida ghayi rukusiinda saawa; asi ayamni geat ak gooweayi gealgeagwa mida jeeda ng'eanyiida oombali, ghayi gooneegwa Musaheeda was siida gadiyeeda NG'UTAMIIDA sigooneegwa bea giigheawda Yordani.

⁵ Asi asina badiida aba digheanyeeka ea deaweedeeda ghayi rukuneegwa Musaheeda was siida gadiyeeda NG'UTAMIIDA, gideaba bwariinya NG'UTAMIIDA was ASEATAANG'U, nea giyaadi naweadingaaschi sean, nea giing'waanyi diigheanyeekaaschi, ak gibwati niny, ak googadiyeesi niny aba gurooroodeang'wa sean ea aba jeedeang'wa sean.”

⁶ Ng'ata ghoadaw Yoshuwa ghawooda saawa, ak ghwanung' gaweay saawa; ak gaweay gealga nyaawa.

⁷ Musa ghoadaw fuga silach bugusta nibiyeenya bea eemeeda Manase goombal ng'eanyiida Bashani, nea suurja silach bugusta nibiyeenya ghoadaw goombal murdeeda fuga nyaawa duupchi mida dirbeayda Yordani. Ak ghwanung' Yoshuwa gaweay saawa gealga nyaawa ak ghoadaw saawa ghawooda,

⁸ ak gwayeesha saawa, “Abiikta gealgeagwa sea haleanjeedeang'wa, sea dugweagwa sea lapiyeedeang'wa, sea lagheangeagwa meeng'meeng'i, ea hang'weakeagwa; ak goolajayi haleanjeeda weajoodigeagwa sea fugeagwa ooduupcheewi.”

⁹ Hean gabiikta gealga nyaawa fuga Rubeni ea gea Gadi ea fuga silach bugusta nibiyeenya bea eemeeda Manase, ak gwariteawa jeeda fuga Israeli aba Shilo, mida ng'eanyiida Ganaani, ak gaweay ea ghwahita ng'eanyiida Gileyadi; ng'eanyiida nyaawa ghayi ambal saawa gawuurji gida ghayi rukuteayda NG'UTAMIIDA aba naweeda Musa.

Heeda wagiida sideeksa ghuuta Yordani

¹⁰ Iidu nea ghapka ng'eanyiida Yordani, mida ng'eanyiida Ganaani, hean ghwadeas fuga Rubeni ea fuga Gadi ea eemeeda silach bugusta nibiyeenya bea Manase heeda wagiida aba ghuuta eenda Yordani ak gwasin heeda wagiida haw.

¹¹ Hean ghwayiiy fuga Israeli nea geeyi, “Ng'ula, fuga Rubeni ea fuga Gadi ea eemeeda silach bugusta nibiyeenya ghwadeas heeda wagiida aba madeeda ng'eanyiida Ganaani, bea ghuuteenda Yordani, was meatkweeda fuga Israeli.”

¹² Iidu nea ghwayiiy fuga Israeli ng'asheanji, hean ghabwat geat fuga sean bea Israeli aba Shilo, gaweay gang'uchi saawa.

¹³ Hean goojeakta fuga Israeli Finehasi was orjeeda Eliyasari was ashoohoocheanda, heeda fuga Rubeni ea fuga Gadi ea eemeeda silach bugusta nibiyeenya bea Manase, aba ng'eanyiida Gileyadi,

¹⁴ ak gawa niny ea fih damanamughuush hees, aba jeenyaawa agi gwaleabu jeeda gheeh Israeli, ak gaba nih bea jeeda dooshta gheeh Israeli aba jeenyaawa.

¹⁵ Hean geapka heeda fuga Rubeni, ea fuga Gadi, ea eemeeda silach bugusta nibiyeenya bea Manase, aba ng'eanyiida Gileyadi, ak geeyeesha saawa,

¹⁶ “Gwayi fuga bwatgeat bea NG'UTAMIIDA, ‘Nih anagiidiinyaan gil ootiiysi ASEETA Israeli ak ghoayamnyi geat eaweecheanji aba eata geeshta NG'UTAMIIDA, ak goodeeksi geat heeda wagiida eaweecheanji nea ghoaheawi NG'UTAMIIDA?

¹⁷ Neada riing'eedida ghayi bea Beoriin ea mageandaneasa ak ea miyeemiina gurooruunatkaasa ea ghoah ghamneawa aba gideaba ghwahidu dawuni badayda fuga bwatgeat bea NG'UTAMIIDA

¹⁸ mayghwashiy gajayamwa geat eaweecheanji aba eatooda geeshta NG'UTAMIIDA? Ak inyas ghoaheawi NG'UTAMIIDA eaweecheanji abeeda gayghwanyareas numuji aba badayda fuga bwatgeat bea Israeli.

¹⁹ Nea ghamneawa ng'eanyiideang'wa iisiimiidu, ghoang'ati aweayeena ng'eanyiida NG'UTAMIIDA, heeda simiindaawa maheemajeanda NG'UTAMIIDA, ak googeasi geat gheambalmeeda aba bugusteanya ak adiidu ghoanung'wi heeda NG'UTAMIIDA, ghana adeeksiina geat hichnuut bea wagiida, nea ghoanung'waadi heeda wagiida bea NG'UTAMIIDA was ASEETEANG'WA.

²⁰ Heapi Akani was orjeeda Sera ea miigoodiiy aba haleanjeedida ghaydidiin, ak goobissa nyarasta badayda fuga bwatgeat bea Israeli? Ak siidida ea miyealas nea gabwa geaw aba giidiinyeanyeekaaschi.’”

²¹ Hean ghwalamda fuga Rubeni, ea Gadi, ea eemeeda silach bugusta nibiyeenya bea Manase ak gwayeesha, nea ghwasha ghuuta fuga hees bea gheeh Israeli,

²² “ASEETA hoauur, ea agi, was NG'UTAMIIDA! ASEETA hoauur, ea agi, was NG'UTAMIIDA! Niny ghwanal; ak eara Israeli gayghwanal! Inyas ea siheawi ghana ea siitiiysi NG'UTAMIIDA, adighuuheasa askweareani

²³ aba deesta heeda wagiida ak geayamnyi geat eanung'waada eatooda geeshta NG'UTAMIIDA; ghana iimeataydani haleanjeeda sisabwa geadi bea ghadooweeda sighwarda ghana iimeataydani booga sisabwa geadi bea ghadooweeda ghana haleanjeeda sisapa geadi bea hoyyoo, abeeda NG'UTAMIIDA deang'weersiin niny ng'asheanji.

²⁴ Manda masnu, geesinyi ng'asheanji aba gideaba gayghwahidu damanda jea gwayeesha diibigeagwa diibigaasa, ‘Agooga goondeawi naaha sea NG'UTAMIIDA, was ASEETA Israeli?

²⁵ Aba gideaba NG'UTAMIIDA nisin Yordani ghoah moonghooda aba bugusteanya ea agooga, agooga fuga Rubeni ea Gadi; ak ea moondeawani ghaat aba heeda NG'UTAMIIDA.’ Asi gwachi abeeda diibigeagwa gayghwanung' ea mabwada NG'UTAMIIDA diibigaasa.

²⁶ Aba nih geeyeenyi, ‘Asi eadeasa heeda wagiida, nea maygaba haleanjeeda sisabwa geadi bea ghadooweeda sighwarda, ghana lukghumeeda,

²⁷ ak gayghoah muushoocheanda aba dageascheedeanya aseasa ea agooga ea dageascheeda seaygoojiga iisisulaadi aseasa, aba gideaba gajeesna gadiyeeda NG'UTAMIIDA aba madeadaanyi sea haleanjeeda sisabwa geadi bea ghadooweeda sighwarda ea haleanjeeda sisabwa geadi bea hoyyoo; aba gideaba aba damanda jea ghwahidu adagwayeesha diibigeagwa diibigaasa, “Moondeawani gil aba heeda NG'UTAMIIDA.”’

²⁸ Iidu geeyeenyi inyas gwarukuneasa ng'asheanda sunu ghana gwarukusa fuga seaygeedeanya ghana damanda jea ghwahidu abeeda gajeeyeeshiina, ‘Ng'ula heeda wagiida bea NG'UTAMIIDA ghayi deas ghweanigaasa, nea nih heeda haleanjeeda ghadooweeda sisabwa geadi sighwarda gil, ghana lukghumajeega, gayghoah muushoocheanda aba bugusteanya ea deang'wa.’

²⁹ Adaghwanyaseasa ng'asheanji gideaba geanung'wi heeda NG'UTAMIIDA, ak geayamnyi geat askweareani eayaada geeshta NG'UTAMIIDA ak geadeaschi heeda wagiida bea haleanjeeda ghadooweeda sisabwa geadi sighwarda, ea booga sisabwa geadi bea ghadooweeda, ghana lukghumajeega, dea mawoosa heeda wagiida bea NG'UTAMIIDA was ASEETEANYA miinaada aba madeeda maheemajeandaanyi!”

³⁰ Damandida abeeda gwanda hoowa Finehasi was ashoohoocheanda ea fuga hees bea fuga bwat geat, was fuga hees bea fuga gheeh Israeli, mideayi sea niny abeeda ghwayiiy ng'asheesu baloola fuga Rubeniin ea fuga Gadi ea Manase, ak gahoosasa saawa muuchi.

³¹ Ghwalamda Finehasi was orjeeda Eliyasari was ashoohoocheanda ak gwayeesha fuga Rubeni ea fuga Gadi ea Manase, “Eanean sinali gideaba NG'UTAMIIDA gwanda bugusteanya, aba gideaba mii aramwasa aba badaydeaba ng'asheanji aba madeeda NG'UTAMIIDA; ak ghamneawa gajeaghuuha fuga Israeli aba geatinda NG'UTAMIIDA.”

³² Hean ghang'eat Finehasi was orjeeda Eliyasari was ashoohoocheanda, ea fuga hees, ak gabiikta ghwanung'wa heeda fuga Rubeni, ea fuga Gadi aba ng'eanyiida Gileyadi ak gawa ng'eanyiida Ganaani, heeda fuga Israeli ak gwarukusa saawa ng'asheanji.

³³ Ak ng'asheanji goohoosan fuga Israeli; nea ghoaghaambiit fuga Israeli ASEETA ak ea mudeebaloola ng'ucheeda aba badayda nyaawa, bea nyarjeawda ng'eanyiida mida fuga Rubeni ea fuga Gadi.

³⁴ Hean fuga Rubeni ea fuga Gadi gaguura hoowa bea wagiidean Muushoocheanda ak geeyi, “Nih muushoocheanda gil aba dageascheedeanya gideaba NG'UTAMIIDA ASEETA gil.”