YOSHUWA 14 - Bibliyeeda Ghaydit

Lachooda ng'eanyiida bea dirbeayda Yordani

¹ Suh hearaniischooda nyas fuga Israeli aba jeeda ng'eanyiida Ganaani, ghayi lakiisa ashoohoocheanda was Eliyasari, ea Yoshuwa was orjeeda Nuni, ea fuga hees bea ghweaniga fuga Israeli ghayi silakiisa saawa.

² Hearaniischooda nyaawa geeloosa, gawuurji gidaghayi rukusiinda NG'UTAMIIDA Musa aba eemooji shageash ea gea silach bugusta.

³ Abeeda Musa niidaw hearaniischooda eemooji iyeenya ea gea silach bugusta aba giigheawda Yordani, sighus fuga Lawi ea moadawa hearaniischooda.

⁴ Aba gideaba fuga Yosefu eemoojiga nyaawa ea iyeenya, nea Manase gil ea Efraimu; ak ea miighoadaw fuga Lawi ng'eanyiida, geaghus mujiineeda jea goobiida, ea ng'eanyoojiga haghweeda dugwa nyaawa ea heeda daghwarda nyaawa.

⁵ Gwasinda fuga Israeli gidarukusiinda NG'UTAMIIDA Musa; ak ghwaloat ng'eanyiida.

Hebroni geataw Galebu

⁶ Hean ghapka fuga ng'eanyiida Yuda heeda Yoshuwa aba Gilgali; ea Galebu orjeeda Yefune bea jeeda gheeh Genisi ak gwayeesha niny, “Ginali gidaghayi rukusa NG'UTAMIIDA Musa was siida ASEETA aba Gadesh-barneya aba badaydaang'u ea deanyu.

⁷ Abeeda geabeayi gweanyeew haradam damanda ajeakteawanean Musaheeda was siida gadiyeeda NG'UTAMIIDA ak ghaang'eadi Gadesh-barneya ak geawi dasikteawa ng'eanyiida; ak geayeasi niny gicha ng'asheanda mida jeeda gurooroodeanyu.

⁸ Ak fugeasu eaduupcheewi sischeang'di sea saawa ghwanung' ghabeal buuneeda; ak aniini ghaayaachi geeshta NG'UTAMIIDA was ASEETEANYU aba doobiiwnata.

⁹ Ak ghwaak Musa habeawooda eaweedida nea gwayi, ‘Aba huumwa ng'eanyiini iilaabi geeshtaang'uun gayhearana ang'iing'i ea diibigaagu damanda manda muudeanooda, aba gideaba giyaadi geeshta NG'UTAMIIDEANYU aba doobiiwnata.’

¹⁰ Ak ng'ula, ghamneawa nigoonan NG'UTAMIIDA eaweega, gawuurji gidaghayi nyaashta, nea gutaba gweanyeew haradam ea muut ghang'eada damanda abaloola NG'UTAMIIDA Musa, nea abeeda fuga Israeli gwaneay aba jeeda dareapcheeda, ak ghamneawa geabea gweanyeew Seedam ea muut.

¹¹ Nea eara ghamneawa ea gudugwanda uurda gawuurji damanda ghayi ajeakteawanean Musa, ak eara ghamneawa ea giduurji uurdeanyu gil aba ng'ucheeda ea aba riteayda ea biiknoodeaba gah.

¹² Asi goona ng'eanyiini bea heayeenigean ghayi baloola NG'UTAMIIDA itaanyi eaweedideaniin aba gideaba ang'iing'i niyiinyi iitaanyi eaweedida gideaba fuga Anaki gwanda hoowa, ak gwandeawa mujiineeda mideawa hilgweanda majeek; ak geararsi gideaba gaydandeawa NG'UTAMIIDA, ak gaydahoan saawa gwarita jarooda gawuurji gidanyaashta NG'UTAMIIDA.”

¹³ Hean ghoadaw Yoshuwa ghawooda niny; ak ghoadaw ng'eanyiida Hebroni Galebu was orjeeda Yefune gwahearan.

¹⁴ Hean Hebroni gwahearan Galebu was orjeeda Yefune bea jeeda gheeh Genisi ea ghoah ghamneawa, aba gideaba ghwaat geeshta NG'UTAMIIDA, was ASEETA Israeli.

¹⁵ Aba mwadi ng'eanyiida Hebroni geeguura mujiineeda Giriat-arba. Abeeda siida haweewa sean gil aba jeeda fuga Anaki. Ak iidu gwayi saw ng'eanyiida aba ng'ucheeda.