Yohaana 7 - Bibliyeeda Ghaydit

Yesu ea orjooga ghaamwat

¹ Ng'ata ng'asheesu gwaneayeewa Yesu jeeda ng'eanyiida Galilaya, aba gideaba magassa gwaneayi aba jeeda ng'eanyiida Yudeya aba gideaba fuga Yahudi gagasa gwanuus niny.

² Abeeda aba damandida ea nineekiit ghweelmeeda fuga Yahudi sisina Udahabeaschajeega.

³ Hean ghwalamda orjooga ghaamwat ak gwayeesha, “Ng'amwana hiji ak guwi ng'eanyiida Yudeya ghwadaah giinealangaagu gadiyoojiga isinayi.

⁴ Siida moamu gwasina gadiyeeda makcheameeda aba iigasa ghwadaambiir gheawungaaschi aba heeda buuneeda. Asi iisini gadiyoojusu abeeda giihiimsi geaw ng'eanyiida.”

⁵ Aba gideaba eara orjooga ghaamwat mamwasa niny.

⁶ Gwayeesha Yesu saawa, “Damandeanyu miighwahidu, amaduuku damandeang'wa gwanda galeagasean.

⁷ Ng'eanyiida moamu ghwasteagwa, duuku aniini ghwastan aba gideaba geamuuwu gideaba gadiyoojigaaschi ea munyas.

⁸ Aweayeena agooga jeedeaba ghweelmeedida nea goobeayi geat; aniini maydawa jeedeaba ghweelmeeni, aba gideaba miighwahidu damanda doabiiw aba heedeanyu.”

⁹ Gwarukuta ng'asheesu amang'ata goobiida hoowa bea Galilayaan.

Yesu aba jeeda ghweelmeeda sisna udahabeaschajeega

¹⁰ Ng'ata nea niweay Orjooga ghaamwat ghweelmeedida, iidu eara niny gawa nea mabwadakta.

¹¹ Hean gagaseadayi fuga Yahudi aba jeedeaba ghweelmeedida nea geeyeena, “Gwanda yeenu?”

¹² Iidu gwaheedu giiniikghta aba jeeda buuneeda. Mwaatkwa iissa gwayi, “Siisi aamiy,” nea mwaatkwa gwayi, “Manda, niny gahuteawi buuneeda.”

¹³ Eara gwasa ghanyea manda siida badaksa ak gwarukuta ng'asheega badaydaanyi aba eeshpwara aba gheawalmeeda fuga Yahudi.

¹⁴ Iidu siweay bugusta ghweelmeeda gawa Yesu gheeda sibata ASEETA ak goonealshi.

¹⁵ Hean ghahamng'eanyi fuga Yahudi nea gwayi, “Siisi ghwanyasa yeenu fughareani nea mii ghoasoamwa?”

¹⁶ Ghwasha Yesu ak gwayeesha saawa, “Ng'asheega anaali buuneeda mii geasu, gaba dea ajeaknean;

¹⁷ siida bwariiy gwasin gida bwariiy niny, gayghwanal giinealshooni ea gwaleabu heeda ASEETA ghana gideaba gearuku aba gheambalmeedeanyu.

¹⁸ Siida baloola gheambalmeadaanyi abeeda gagaseadayi giigheambiiteaba geaw, amaduuku siida gasa giigheambiita siida ghayi ajeagu gaba huumwa nea jeadaanyi ea manda munyinda.

¹⁹ Ghayi Musa magooneegwa deaweeda? Eara gwasa manda jeedeang'wa eara siyagi ang'waay deaweeda. Ghwasaan inyas googasayi anuusean?”

²⁰ Hean ghwasha buuneeda nea gwayeesha, “Gindeawi meangeenda! Gagaseadayi ng'eaha gwanuusnyi?”

²¹ Ghwasha Yesu nea gwayeesha, “Geasinyi gadiyeanagi, ak ghwanung' ghahameagwa ng'eanyi iyoadaayi.

²² Musa ghayi gagooneegwa ghasmeahooda (Maleapna heeda Musa, gwaleabu heeda ghweaniga), ak ghoayaachi agooga siida ghasmeahooda eaweeda Sabaato.

²³ Iissa iisiyaat siida ghasmeahooda eaweeda Sabaato, ak abeeda ea meenuusa deaweeda Musa, abeeda goonyareeksean aba gideaba ghaahaapchi siida eaweeda Sabaatohi?

²⁴ Adoorgweakiisi buuneeda aba gidoadaakti, iissa goorgweaksi aba girgweageeda doabiiw.”

Heapi niny Mesiyahi?

²⁵ Hean gwayi fuga mwaatkwa bea Yerusalemu, “Heapi! Siidida sigasa gideaba gajeenuusiin mii nihi?

²⁶ Ak ghamneawa gabalool aba eeshpwara nea meerukusiina ng'ashaan! Gwadeepa eara fuga ambaliischi ea nijeeng'u gideaba siisi Gristohi?

²⁷ Eaweeda jea ghwahina Gristo manda siichea ghwanal heeleabu, duuku aseasa geanali heeleabu siisi.”

²⁸ Gwarugu Yesu aba ghuuta haw aba damanda anealsheewa aba jeeda gheeda sibata ASEETA, “Ghoanalaan ak ghoanali eara heeda ealeabu? Mwaawuni aba uhuudeanyu aniini; dea ajeaknean niny huumwa ak ea moanali niny.

²⁹ Ghaanali niny aba gideaba gealeabu headaanyi, ak goojeaknean.”

³⁰ Geegaseadayi gichea eang'waayda ak ea manda siida aheaksa geatinda ghoang'waay aba gideaba mii ghwahita damandaanyi.

³¹ Iidu ghwamwas fuga saang'a niny; nea gwayi, “Gristo iihidu, gaygwasin gwadeagwajeega burdeawa geasin siisi?”

Geecheakta furiischoodiga ghoang'waay Yesu

³² Ghwayiiy Farisaayajeega gidameang'sheata eemeeda aba badaydaanyi, hean goojeakta ashoohoodiga hees ea Farisaayajeega furiischoodiga gaweay ghoang'waay niny.

³³ Gwayeesha Yesu, “Gajeendeayeena gheadi nuwaas, amang'ata gaydaweesa dea ajeaknean;

³⁴ gajagassean ak ea mwajanyasaan, nea heechea deabiida ea majoamuusa ahini.”

³⁵ Gabalool fuga Yahudi nea gwayeeniissa geat, “Siisi gaygawa yeenu jea ea mwajeamuusa eanyasaan? Gaygawa heeda eemeeda dardaawaat mida Yunani ak ghoanaal eemeeni bea Yunani iin?

³⁶ Gwarukuna naaha ng'asheanji bea gideaba, ‘Gajagassean ak ea mwajanyasaniin,’ nea ‘heechea deabiida ea majoamuusa ahiniin’?”

Eeniga beega jea gweadu eaweega

³⁷ Eaweeda huuydean asheala ghweelmeeda eaweecheanda haw gil, ghamiinaada Yesu ak gwarugu aba ghuuta haw nea gwayi, “Siida bearji muwooshta, doani heedeanyu ghwaleayda.

³⁸ Siida mwasan aniini aba ginyaashta Ng'ooruutka, ‘Gayghwadalalaana jeadaanyi eeniga beega eatu eaweega manda muudeanooda aba jeeda gurooroadaanyi.’”

³⁹ Gwarugu ng'asheesu aba badayda Guroorooda, jea ghwanyas fugiga jea ghamwas ninyiin; damandida Guroorooda mii ghwaan aba gideaba damandida Yesu miyeekghaambiit.

Dardeayda aba jeeda buuneeda

⁴⁰ Iidu aba jeeda buuneeda gwanda fuga ama iiy nea gwarugu ng'asheesu gwayi, “Aba huumwa siida sibaneeda.”

⁴¹ Gwayi fuga mwaatkwa, “Siisi Gristo gil.” Nea mwaatkwa gwayi, “Gristo ghoamu gwaleabu Galilaya?

⁴² Neada ng'ooruutka ea mayi, Gristo gaygwaleabu dooshta Dawdi, ak gwaleabu Betlehemu gharang'da abiita Dawdi?”

⁴³ Hean ghwadarda buuneeda aba badaydaanyi.

⁴⁴ Gagasa fuga mwaatkwa ghoang'waay niny amadu ea manda siida aheaksa geatinda ghoang'waay.

Fuga ambaliischi bea Yahudi mandeawana masaweega

⁴⁵ Gabiikta Furiischoodiga heeda ashoohoodiga hees ea Farisaayajeega, ak gwayeesha saawa, “Ghwasaan anda miyooyeani?”

⁴⁶ Ghwasha Furiischoodiga, “Eara heeda ghayi manda siida ammu gabaloolda gidabaloolda siisi!”

⁴⁷ Ghwasha Farisaayajeega nea gwayeesha saawa, “Asi eara agooga sireenganeegwa?

⁴⁸ Ghoang'wa adaaha eara ea siyagi gil aba jeeda fuga ambaliischi dea mwas ghana Farisaayo dea mwas niny?

⁴⁹ Eemeeni mwanala deaweedean, simwaashta.”

⁵⁰ Ghwalamda siyagi aba jeenyaawa was Nikodemeeda, ghayi weah headaanyi aba mwadi ak gwayeesha saawa,

⁵¹ “Neada deaweedeedeanya iissa goorgweaksa siida nea mii ghanyi ghwayiiy ak ghwanal gissini?”

⁵² Ghwasha Saawa nea gwayeesha, “Asi eara ang'iing'i gileabu ng'eanyiida Galilaya? Asi sikteawana ak gay daaha gideaba Galilaya mii gwaleabu sibaneeda.”

⁵³ Hean gaba siisi ng'eat ak gawa gheanyi.