Yohaana 6 - Bibliyeeda Ghaydit

Yesu ghoang'aata fih sagalamnyooji muut

¹ Iing'ata ng'asheesu ghoaghaawa Yesu basooda Galilaya, was basooda Diberiya.

² Ghwaat geeshta eemeeda aba gideaba saawa nidaah gwadeagwajeega sissa fuga miyeani.

³ Hean gwading'da Yesu giijeeda, ak goopteada sea ginealangaaschi.

⁴ Abeeda ea nineekiit ghweelmeeda Basaaka, bea fuga Yahudi.

⁵ Ang'wearda ghwadaah eemeeda nea ghapka headaanyi ak gwayeesha Yesu Filipo, “Gajeashaahana yeenu mukaatajeega jea ghwaak fiisu?”

⁶ Gwarukuta ng'asheanji nea gwasim, nea ghwanal niny gichea gwasin.

⁷ Ghwasha Filipo nea gwayeesha, “Dinaaraji bughalaji iyeenya moamu ghwasha mukaatajeega deayeat eara eelakiisa fiisu gil mwanang'.”

⁸ Gwayeesha orjeanagi was giinealaneadaanyi siguura Andreya bea geenyea Simon Betaro,

⁹ “Gwanda hiji jeabwagi mideawa mukaataji muut bea shayiiri ea ghweayi iyeenya; ak gaygwarachi naaha suh aba fuga saang'a deenu?”

¹⁰ Gwayeesha Yesu, “Anung' goobiitpiit buuneeda.” Abeeda gwanda hoowa nyeega saang'a; hean goobiitpiit headiga nyiit sagalamnyooji muut.

¹¹ Gageanu Yesu mukaatajeegiga ama ng'ata gabadiischeesa ASEETA ak gwalakiisa fuga abiitpiit; gwahindunu eara ghweayeegiga, ak gaba siisi siitaw gidagasiida.

¹² Iidu nea ning'ata agiischooda nea nilang'u buuneeda, gwayeesha ginealangaaschi, “Ooweamni gheaptanga silach adaghwaroat eara gil.”

¹³ Hean ghoawaam banajanga mukaatajeegiga bea shairiin ghwanyawa lach fuga siing'aataan, ak ghoanyiit sooscheew damaniyeenya.

¹⁴ Daah buuneeda gwadeagooda sin gwayi, “Aba huumwa siisi sibaneeda jea ghwahidu jeeda ng'eanyiida!”

¹⁵ Jeeng'u gideaba geegasa eang'waay eayaat aba uurda ghoah sugoocheanda, gooheeli geaw Yesu buuneeda ak gabiikta gicha uhuuda giijeeda nea goodeayi geaw.

Yesu ghabeawa badayda beega

¹⁶ Iidu nea ghoah shing'ada ghwararang'aada Ginealangaaschi ea gaweay ghuuta basooda,

¹⁷ gwading'da maleambooda ghoaghaawa basooda gaweay ng'eanyiida Gapernaumu. Gamisaniit nea Yesu ea miighwahita heanyaawa.

¹⁸ Gabalaksa basooda ak gooyuuk jeameeda ng'waan.

¹⁹ Hean ghamwanmwan maleambooda beata geanu aseedeanagi, ak ghwadaah Yesu nea ghwaan aba badayda beega ak gwariiksa maleambooda ak ghabeal,

²⁰ gwayeesha saawa, “Adoabeali, siida aniini.”

²¹ Hean gang'weela ak gagasa goodiing'sa jeeda maleambooda, ama deagheata ea nihita maleambooda ng'eanyiida ghajaam gwachi weay.

Fuga gaseadayi Yesu

²² Iimuchu ghwadaah fuga heeta sinung'wa giigheawda basooda meatkweeda niirjean, gideaba sinung'wa hoowa maleamboonagi, nea Yesu gwachi ea mading'da maleambooda sea Ginealangaaschi, abeeda giinealanga gaweay nea gabwageat.

²³ Nea abeeda ea nihidu maleambajeega leabu ng'eanyiida Diberiya ea ghwahita heeda neekeewa heeda aksa buuneeda mukaate, heeda ghayi moasha Ng'utamiida ghawooda.

²⁴ Hean iidu nea ghwadaah buuneeda gideaba Yesu ea ginealangaaschi manda hiji, gwading'da maleambajeega gaweay ng'eanyiida Gapernaumu nea gagaseadayi Yesu.

Yesu mukaateeyda eaweega

²⁵ Iidu nea geanyasa giigheawda basooda meatkweeda niirja geanyaash nea geeyeesha, “Rabi, gihidu eeju hiji?”

²⁶ Ghwasha Yesu nea gwayeesha saawa, “Aba huumwa, aba huumwa, geayeeshiineegwa, moogaseadayean, aba gideaba ghayi noadaayi gwadeagooda, googassean aba gideaba ghayi ghoayaaji mukaate ak goolang'uuchi.

²⁷ Adiidu goodeawiichi aba hamita jea gabay gamuudean, adeawiisiina hamita jea gwanyagu eaweega manda muudeanooda, jea gagooneegwa Orjeeda Siida; aba gideaba nigeawiit gooroor ASEETA was Ghwaan.”

²⁸ Hean geeyeesha, “Gajeesna naaha iijea eamuusa eesina gadiyeeda ASEETA?”

²⁹ Ghwasha Yesu nea gwayeesha, “Gadiyeeda ASEETA nihi, gideaba amwasa siida ajeagu niny.”

³⁰ Hean gwayeesha saawa, “Gisini ana gwadeagu jea eadaaha ak geamwascheey, Gaysina ana gadiya?

³¹ Ghweanigaasa ghayi ghwaak hamita siguura maana aba dareapcheeda aba gissing'oarda, ‘Ghoadaw mukaateeyda leabu humng'eeda ghwaak.’”

³² Gwayeesha Yesu saawa, “Aba huumwa, aba huumwa, geayeeshiineegwa, mii Musa gil dea gooneegwa mukaateeyda leabu humng'eeda; Bwaabwa dea gooneegwa mukaateeyda huumwa leabu humng'eeda.

³³ Aba gideaba mukaateeyda ASEETA diita rarang'aana humng'eedean gil ak ghoadaw ng'eanyiida eaweega.”

³⁴ Geeyeesha niny, “Ng'utamiida, gooneasa mukaateehean galeagasean.”

³⁵ Gwayeesha Yesu saawa, “Aniini geawooschi mukaateeyda eaweega; siida wuh heedeanyu mayghwayeachih, nea siida mwasan ea mayghwaak muwoash earahay.

³⁶ Ak geayeeshiineegwa earapeadi noadaayaan moamwasaan.

³⁷ Fugiga sean goonan Ghweandean gayghapka heedeanyu; nea dea wuh heedeanyu ea mayghanyi dajaksa jarooda.

³⁸ Aba gideaba mwaararang'aanani humng'eeda doan dasin gideagasayi aniini, ghaawunyi dasin gidagasa dea ghayi ajeaknean;

³⁹ nea gidagasa dea ajeaknean ea nih gil, gideaba ea meahutani earagi aba jeeda geagoonan, geaghus deaduudu eaweeda huuydean.

⁴⁰ Aba gideaba gidagasa Bwaabwa nih gil, gideaba siida nyooh ghwadaah Orjeeda ak ghamwas abeeda ghwanyas eaweega manda muudeanooda, ak gaydeaduudu eaweeda huuydean.”

⁴¹ Hean gabiissa ghoaniikgh fuga Yahudi aba gideaba gwayi, “Aniini geawooschi mukaateeyda leabu humng'eeda.”

⁴² Gwayi saawa, “Neada siisi ea mii Yesuheeda was orjeeda Yosefu, anda geanali ghwaan ea ghaamwat? Abeeda ghoamuustaan gideaba gaygwayi, ‘Ghaararang'aani humng'eeda’?”

⁴³ Ghwasha Yesu nea gwayeesha saawa, “Adooniikiisi geat.

⁴⁴ Manda siida ammu ghwaan heedeanyu iimagisna Bwaabeeda ghayi ajeaknean ak abeeda geaduudu aba eaweeda huuydean.

⁴⁵ Geang'waar aba jeeda sibanga gideaba, ‘Gayghoanaal ASEETA sean.’ Siida wassean aleeysiit nea ghoanaal Bwaabwa, gayghoan heedeanyu.

⁴⁶ Aba seareani mii gideaba gwanda siida nidaah Bwaabwa gil geaghus diita leabu heeda ASEETEAN; nih siida nidaah Bwaabwa.

⁴⁷ Aba huumwa, aba huumwa, geayeeshiineegwa, siida mwas gwandeawa eaweega manda muudeanooda.

⁴⁸ Aniini geawooschi mukaateeyda eaweega.

⁴⁹ Ghweanigeagwa ghwaak hamita siguura maana aba dareapcheeda ak gameewa.

⁵⁰ Nih ea mukaateeyda rarang'aana humng'eeda, nea siida wassean iiyak ea mayghami.

⁵¹ Aniini geawooschi mukaateeyda eaweega rarang'aana humng'eeda; siida wassean iiyak mukaateeheeni, gayghwashng'u eaweega manda muudeanooda; nea mukaateeyda jea daadaw aba badayda eaweega ng'eanyiida ea saseedeanyu.”

⁵² Hean gabiissa gwasheang'nyi fuga Yahudi nea gaba geat, nea gwayi, “Gayghoamuustaan siisi gideaba gaygagooneasa saseadaanyi ak geayaaji?”

⁵³ Gwayeesha Yesu saawa, “Aba huumwa, aba huumwa, geayeeshiineegwa, iimoayaagi saseeda Orjeeda Siida, ak ghoaleayi foojeandaanyi, ea maygwanda jeesingeagwa eaweega;

⁵⁴ siida ak saseedeanyu nea ghwali foojeandeanyu gaygwandeawa eaweega manda muudeanooda, nea abeeda gaydeaduudu niny eaweeda huuydean.

⁵⁵ Aba gideaba saseedeanyu gichea eayaak bea huumwa, ak eara foojeandeanyu ea gichea eali bea huumwa.

⁵⁶ Siida iiyak saseedeanyu ak ghwali foojeandeanyu gaygoobiida jeedeanyu, nea eara aniini gaydeabiida jeadaanyi.

⁵⁷ Gida ajeakteaydanean Bwaabeeda mideawa eaweega, eara aniini geandeawi eaweega aba badayda Bwaabwa, gwasunu eara siida ak saseedeanyu gayghwanyas eaweega aba badaydeanyu.

⁵⁸ Asi nih mukaateeyda rarang'aana humng'eeda, mawuurji sea dea ak ghweaniga ak gameewa; siida iiyak mukaateeheeni gayghwanyas eaweega manda muudeanooda.”

⁵⁹ Gwarugu ng'asheesu nea goonealshi aba jeeda ghooriida siinealshacheewa aba ng'eanyiida Gapernaumu.

Ng'asheega eaweega manda muudeanooda

⁶⁰ Iing'shi gea saang'a aba jeeda ginealangaaschi gwayi, “Ng'asheesu suh eahang'oonyi; gayghoamu ng'eaha gooleeysiit?”

⁶¹ Gwajeeng'u Yesu aba jeadaanyi gideaba ghoaniikgh ginealangaaschi aba badaydeaba ng'asheanji, gwayeesha, “Ng'asheanji gwaruuseegwa?

⁶² Abeeda gaygawuurjiin iyoadaayi Orjeeda Siida nea ghwascheang'da gawa heeda ghayi mida bea aba mwadi?

⁶³ Guroorooda dea eatu eaweega gil, aba gideaba saseeda manda gidammu; ng'asheesu earukuneegwean guroorooda gil ea eaweega.

⁶⁴ Eara ghamneawa gwanda jeedeang'wa fuga mamwasa.” Ghang'eada mwadi Yesu ghayi gwarugu ng'asheesu nea gabean ghwanal gideaba geabeang'a gil fugiga mamwasaan, ak ea ng'eaha siida jea ghwala bwadaw niny.

⁶⁵ Hean ng'ata gwayi, “Nih gidearukuneegwa gideaba manda siida jea ghoamu ghwaan heedeanyu iimwanung' Bwaabwa ghwaan.”

⁶⁶ Ng'ata gabiikta bwadaw gea saang'a aba jeedeaba ginealangaaschi ak ea mudu ghwaat geeshta.

⁶⁷ Gwayeesha Yesu fugiga atamaniyeenyean, “Eara agooga googasayi aweayeena?”

⁶⁸ Ghwasha Simon Betaro ak gwayeesha, “Ng'utamiida, ak gajeeweaya heedeabeang'a? Ang'iing'i gindeawi ng'asheega eaweega manda muudeanooda;

⁶⁹ aseasa simwaschi, ak geanali gideaba ang'iing'i guwoosi dea Ghaydit bea ASEETA.”

⁷⁰ Ghwasha Yesu nea gwayeesha, “Aniini miidagwalneegwa nea goowooschi damaniyeenya, nea siyagi aba jeedeang'wa ea mii meang'nyeandeendea?”

⁷¹ Nea abeeda gabaloola badayda Yuda, orjeeda Simon Iskariyote, aba gideaba niny gaba jeedeaba giinealangiga atamaniyeenyean, ak ea dea jea ghwala bwadawi.