Yohaana 5 - Bibliyeeda Ghaydit

Giiheapta siida aba ghuuta dabascheanda

¹ Ng'ata damandida ghwahidu ghweelmeeda fuga Yahudi, nea abeeda ghwascheang'da Yesu gawa Yerusalemu.

² Aba hoowa bea Yerusalemu neekeewa gidaghuuta gisilgean gwanda dabascheanda siguura aba iita Ebraniya Betsata, nea gwandeawa doodoonung'weaka muut.

^3-4 Gwanda jeeni fuga saang'a miyeani nea gwalil, fuga ng'oowi, ea fuga badoojiga, ea fuga abitu damealga.

⁵ Abeeda gwanda hoowa siyagi ghayi miyaan gweanyeew diktam ea damasis.

⁶ Hean dea Yesu siidida nea gwalil aba hoowa ak ghwanal gideaba niibiida hoowa gili geaw, ghoanyaash nea gwayeesha, “Gigasayi haabwa?”

⁷ Ghwasha siidida miyaaniin nea gwayeesha, “Siida mureeda, aniini meandeawani siichea ghoabuutanaan jeeda dabascheanda iing'ata giing'oolda beega, iissa iyeagasayi daabita jeeda goosheeda siinuut ghoabita.”

⁸ Gwayeesha Yesu niny, “Ng'eada, geanda muundaang'u ak guwi.”

⁹ Miighoah gil ghahaap siidida ak gageanda muundaanyi ak ghang'eat gawa. Nea abeeda eaweedida ea Sabaatohi.

¹⁰ Iidu gwayeesha fuga Yahudi siidida siihaabiin, “Askweareani eaweeda Sabaato gil, ak ea mamiiseey gideaba gaysareana muundaang'u.”

¹¹ Ghwasha niny nea gwayeesha, “Siida ghwanyawa ahaabwan dea eeshiinean, ‘Sareana muundaang'u ak guwi.’”

¹² Geanyaash niny, “Siida eeshiineey, ‘Sareana muundaang'u ak guwi ng'eaha’?”

¹³ Ea mwanala niny siida ghwanyawa ahaap, aba gideaba Yesu aba damandida ning'amwa hoowa aba gideaba nibassa geat hoowa eemeeda.

¹⁴ Iidu ghwanyasa Yesu niny jeeda gheeda sibata ASEETA ak gwayeesha, “Asi daaha nihaabi! Adagudubiikta sina riing'eeda, adiidu gabiikta ghwanyasnyi ng'asheanda muy naawa nih.”

¹⁵ Gawa Siidida ak gwarukusa fuga Yahudi gideaba siida ahaabwan Yesu gil.

¹⁶ Hean ghoah gidasawassa fuga Yahudi Yesu, aba gideaba gwasin ng'asheanji eaweeda Sabaato.

¹⁷ Ng'ata gwayeesha Yesu saawa, “Bwaabwa gudugagadiyi eara ghamneawa, ak eara aniini geagadiiyi.”

¹⁸ Iidu aba badaydeaba ng'asheesu gagasa fuga Yahudi naweeda jea gwanuusa; nea meakna gideaba gwanuus deaweedeeda Sabaato ak ghwahit, ghabwada gideaba gwayi ASEETA ghwaan gil, aba sareani hean ea niideenyi geaw sea ASEETA.

Gheambalmeeda Orjeeda

¹⁹ Gwayeesha Yesu saawa, “Aba huumwa, aba huumwa, geayeeshiineegwa, Orjeeda moamu gwasin gida nea gaba geaw ghoamu gwasin gidida dea nea gwasin Ghwaaniin; aba gideaba gidida sin Ghweandean, eara Orjeeda abeeda gaygwasin.

²⁰ Aba gideaba Bwaabwa ghabwariiy Orjeeda, ak iissa goohiimsa haleanjeeda sean sin niny, ak abeeda gaygoohiimsa ng'asheega hees madeenacheewana suh, ak abeeda gajahamwa ng'eanyi.

²¹ Gawuurji gidida aduutiideayda Bwaabwa fuga meewa ak gabiikta ghoadaw eaweegean, eara Orjeeda iissa ghoadaw eaweega fugiga gassean.

²² Bwaabwa maygoorgweaksa eara siida, ng'asheega sean bea girgweaksinda buuneeda niyiin geatinga Orjeeda,

²³ abeeda gwasissa buuneesean mureeda Orjeeda gawuurji gidasiniisiinda mureeda Bwaabwa. Siida masisiina Orjeeda mureeda masisiina mureeda Bwaabeeda ghayi ajeagu niny.

²⁴ Aba huumwa, aba huumwa, geayeeshiineegwa, siida iiy ng'asheanji iteanyuun, ak ghamwas siida ghayi ajeaknean, gwandeawa eaweega manda muudeanooda; nea majeergweaksa earahay aba gideaba ninaawa miyeeda ak gawa jeeda eaweega.

²⁵ “Aba huumwa, aba huumwa, geayeeshiineegwa, ghwaan damanda ak ghamneawa gwanda, ak gaygabiisa ghwayiiy fuga nimeewa ghuuta Orjeeda ASEETA, amadu fugiga jea gwayiing'shiin gayghwanyas eaweega.

²⁶ Gawuurji gidida mideeyeata Bwaabwa eaweega aba jeadaanyiin, gwasunu niidaw Orjeeda eaweega aba jeadaanyi,

²⁷ ak gabiissa ghoadaw gheambalmeeda jea goorgweaksiina buuneeda, aba gideaba niny Orjeeda Siida gil.

²⁸ Adaghahameagwa ng'eanyi aba badaydeaba ng'asheesu; aba gideaba ghwaan damanda jea ghwayiinya buuneesean mida jeesinga bung'eadinga ghuutaanyi

²⁹ abeeda gaygwaduutu fuga ghayi sina ng'asheega miyaasiin ak ghwanyas eaweega, ak gaygwaduutu fuga ghayi sina ng'asheega munyas ak geergweaksa.

Muushoodiga Yesu

³⁰ “Aniini mwammuusi dasin gil aba gheambalmeedeanyu nea geabwaageaw; aniini geargweakiisi buuneeda aba gidayiinyi, nea girgweageedeanyu ea doabiiwaat, aba gideaba meagassi dasin gideagasayi aniini geaghus dasin gidagasa siidida ghayi ajeakneaniin.

³¹ Iyeamuuwu ng'asheegeasu, aniini abeeda muuwuunoodeanyu ea maba huumwa;

³² ak gwanda siinuut muuwu ng'asheega badaydeanyu, ak ghaanali gideaba ng'asheega sean muuwu aba badaydeanyu gaba huumwa.

³³ Agooga ghayi goocheakti Yohana, ak gamuuwu ng'asheega huumwa.

³⁴ Aniini mwaakghusi muuwuunooda buuneeda; gearugu ng'asheesu aba gideaba geagasayi anyasa lealeanooda.

³⁵ Niny ghayi gheaboong'nyeanda yeat ak ghoabwaay gil, amadu ghoabwariinyi agooga weeshindaanyi gil nuwaas.

³⁶ Amadu muuwuunooda eandeawi eahaweewa dea Yohana; aba gideaba gadiyoojiga easinyi gea ghayi goonan Bwaabwa dasin, ak ea gadiyoojiga ghamneawa easinyiin gil, ak gamuuwu gideaba ghayi goojeaknean Bwaabwa.

³⁷ Ak eara Bwaabwa ghayi ajeaknean gamuuwu ng'asheega badaydeanyu. Ak ea moang'wa ayiinya ghuutaanyi nea niny ea moang'wa adaaha;

³⁸ nea eara ng'asheandaanyi ghanyea manda jeesingeagwa, aba gideaba moamwasi siida ghayi ajeagu.

³⁹ Agooga goosikiideawi ng'ooruutka nea ghoaghanyi gili aba jeenyaawa goondeawi eaweega manda muudeanooda; ak ea dea muuwu ng'asheega badaydeanyu;

⁴⁰ eara agooga ghanyea moogassi apkaani heedeanyu ak ghoanyaschi eaweega.

⁴¹ Aniini mwaanyasi giigheambiita aba heeda buuneeda.

⁴² Ak ghaanali gideaba agooga manda jeesingeagwa bariinyeega ASEETA.

⁴³ Aniini ghaawuni gheawunga Bwaabwa, ak ea moadeaptanaan; ama wuh siinuut aba gheawungaaschi niny gajadeapta.

⁴⁴ Abeeda gajamwastaan, siida nyasa giigheambiita hichpa siinuut ak ea magassa giigheambiita leabu heeda ASEETA?

⁴⁵ Adiidu gooyeeshi geat aniini gaydaahaaktaneagwa aba heeda Bwaabwa; Musa siida jea ghoahaaktaneegwa gil, nea siida ghayi oararji.

⁴⁶ Inyeeda ghayi ghoamwaschi Musa ghwanyawa gajamwasaan eara aniini, aba gideaba ghang'oar ng'asheega badaydeanyu.

⁴⁷ Amadu iimoamwasi ng'asheega ghayi ng'oar, abeeda gajamwastaan ng'asheegeasu?”