YEREMIYA 8 - Bibliyeeda Ghaydit

¹ Gwayi NG'UTAMIIDA, “Aba damandida, geaka sugoodiga Yuda, ea gea fuga nyaawa hees, ea gea ashoohoodiga, ea gea sibanga, ea gea fuga abiita Yerusalemu gajeeruuna jeeda bung'eadinga nyaawa;

² ak gajeetearsa madeeda aseeta ea sheeda ea madeeda lugweega humng'eeda, ghayi bwariiy nea gagadiiydooscheesa, ghayi wadiini heanyaawa, ak gwarukwiida ng'asheega nea gabada; ak ea majeamughuush nea majeebuy, gaygawuurji fiyeega dugwa aba badayda ng'eanyiida.

³ Gwayi NG'UTAMIIDA bea lugweega, fiisu was easangean bea gealga munyasiin aba heeda eadearsi gaygwayi ghang'wana miyeeda mwasamwa giibinda.

Riing'eeda ea ghoorjooda

⁴ “Gajeeshina saawa, Gwayi NG'UTAMIIDA: Siida iyabeada, inyeesa ea mabiikta ghang'eati? Aba iiroat, inyeesa ea mabiikna?

⁵ Ghwasaan anda fiisu nisaja geat naweeda ak gagutguta sinooda ng'asheega munyas? Nea ghabwat aseecheeka nyaawa bea ng'uyeega, Nea ghaheawa ghwayam geat.

⁶ Aniini nealeeysiit muuchi ak ea marukuna ng'asheanda huumwa; nea manda siisi duukuuna munyindaanyi, nea gwayeena, ‘Neasinyi naaha?’ Gaba siisi yamsa geaw naweadaanyi, gawuurji faraaseeda aat ng'weega weah ng'ucheeda.

⁷ Eara mbeaghwajeega humng'eeda ghwanal damanyoojiga; nea eara ghariibajeega, ea udahabeascheeka, ea udoawanghajeega ghwanal damanyoojiga biiknooda nyaawa; nea fugeasu ea mwanala deaweedajeega NG'UTAMIIDA.

⁸ “Gajayeanaani, ‘Geewooschi bareahi iheeni, nea diigheanda NG'UTAMIIDA geendeawi’? Ng'ula galaamooda ng'uyeega bea ng'oorshoodiga ea niyam deaweeda ak ea nihuta diigheandeanyu.

⁹ Fuga bareahi iheeni gajeapwaaspwaas, gajeanung' gagiisan ak geaghas; ng'ula niheawa ng'asheanda NG'UTAMIIDA, ak gwanda yeenu bareaynata iheenga nyaawa?

¹⁰ Asi gaydaadaw gadeemga nyaawa fuga suurja, ea madameega nyaawa gaydaadaw fuga nijooriischi, aba gideaba gidang'eada dea mwanang' ea gagul dea haw, gaba nih nyas haleanjeeda gwaneadi; ea gidang'eada sibaneeda ea gagul ashoohoocheanda gaba nih Sini ng'asheega gwaneadi.

¹¹ Ghoahaap sawanaduutka fugeasu gil mwanang', nea gwayeena, ‘hoyyoo’ nea ea manda hoyyoo.

¹² Heapi iing'ulay ghabwaspwas iisin munyinda? Earahay, mabwaspwasa eara siyagi; Saawa mwanala eara baspaseega. Asi gaygoobeedeaysa heeda fuga niibeedeayi; gwayi NG'UTAMIIDA, iyeargweaksi saawa, abeeda gaygoosha.

¹³ Gwayi NG'UTAMIIDA, nea geagasayi daawaam gidamida heeda nyaawa, ging'ulayi heeda sabiibu manda haghweega, nea eara heeda shaboogheeta ea manda haghweega; nea eara seenga ea nigajeamiidi, nea eara gida aadawji saawa ea ning'amwa heeda nyaawa.”

¹⁴ Ghwasaan anda gudeepiidana hiji? Eemughuusha geat, ak geeweayi jeeda mujiinajeega mideawa hilooga ak geeshealsi hoowa, aba gideaba NG'UTAMIIDA was ASEETEANYA nimwas miyeedeanya, nea ea nigooneasa beega mideawa furooda, aba gideaba sisissi NG'UTAMIIDA riing'eeda.

¹⁵ Aseasa geemuuku hoyyoo, ak ea manda gida miy hidu heedeanya, geemuuku damanda giiheapta, ak ging'ulayi ghwaan haloota.

¹⁶ “Siyiiyi giijuureanda faraasajeega nyaawa aba Dani, gwanyeariida gea faraasajeega ng'ucheeda nea ghwanung' gwaduumduum ng'eanyiida sean. Ghapka ghwadatas ng'eanyiida sean ea gilinyoo gwanda jeeda, Gwanyarja mujiini ea fuga sean mida jeeda.

¹⁷ Gwayi NG'UTAMIIDA, ang'ula gaydajakneegwa ichipkeega, mideawa furgweega, nea mwoamu eeteal, ak gaygaganyeateegwa.”

Giiseaneega Yeremiya aba badayda fugaaschi

¹⁸ Giiseaneegeasu ghwanaawa heapta, nea gurooroodeanyu ea sawaneat.

¹⁹ Aleaydiit shooka hudeaba fugeasu, aba meatkwajeega sean bea ng'eanyiida, “Neada NG'UTAMIIDA ea manda Sayuni? Neada sugoocheandaanyi ea mudu gwanda hoowa?” “Ghwasaan anda ghoanyareasan aba sanaamajeega nyaawa sideasa geadi, ea sanaamajeega eemoojiga?”

²⁰ “Lajita booga ning'ata, nea eara geayda ea ning'ata, ak ea miyeelealneasa.”

²¹ Nea sawanadeeda hudeaba fugeasu ea niiw deaneadeeda aba heedeanyu, Geahirbabanyi nea geagiisanyi.

²² Neada ea manda meajooda aba Gileyadi? Neada ea manda meang'nyeanda hoowa? Ghwasaan saseeda hudeaba fugeasu miighahaap?