YEREMIYA 47 - Bibliyeeda Ghaydit

Giijasta NG'UTAMIIDA aba badayda Filisti

¹ Ng'asheanda NG'UTAMIIDA weah heeda Yeremiya was sibaneeda aba badayda fuga Filisti, gheata mii ghabwara Farao Gaasa.

² “Asi gwayi NG'UTAMIIDA: Ng'ula, beega gwaleabu wiilooda ng'eanyiida ghayeawa, ak gayghoah eenda gulda; ak gaygwadukuta ng'eanyiida ea gilinyoo gwanda jeeda, mujiini ea fugiga mida jeedean.

³ Aba ginyaashta budilga faraasajeagaaschi, ea aba gidasaldeayda mutukwajeagaaschi bea ng'ucheeda, ea aba nyeashta geeshanga nyaawa, nea ghweaniga ea mang'ula bwadaw ghwadaah diibiga nyaawa, aba gideaba geatinga nyaawa ea ng'arng'ari,

⁴ aba badayda eaweeda jea ghwahidu ghwalas uhuuda fuga Filisti sean nea ghwasach giliwas sih weat Diro ea Sidoni ghayi abit. Aba gideaba NG'UTAMIIDA gayghwalas uhuuda fuga Filisti, was boosteanga mida ghuuta basooda aba Gaftori.

⁵ Fuga Gaasa nireakghu iheenga gamearniidi nea gooyeawda, mujiineeda Ashkeloni sinyarja. Fuga Anakimu, oaghuyi, gajalajaada geat ea ghoah eeju aba giiseaneega?

⁶ Ea ng'uta ASEETA! Gajeeyi bwak ea ghoah eeju iijea siinda? Biikta garnoacheanda, hawda nea gifuufi!

⁷ Ak gayghoamuustaan ghwasiinda, nea niidaw NG'UTAMIIDA gadiyeeda? Gwayi bwara mujiineeda Ashkeloni sea fuga abiita ghuuta basooda.”