YEREMIYA 44 - Bibliyeeda Ghaydit

Giijasta NG'UTAMIIDA weah heeda fuga Israeli aba Misri

¹ Ng'asheanda weah heeda Yeremiya aba badahuuka fuga sean bea Yahudi mida ng'eanyiida Misri, ea aba Migdoli, ea Dahpanesi, ea Memfisi, ea gea mida ng'eanyiida Batirosi,

² “Asi gwayi NG'UTAMIIDA bea lugweega, was ASEETA Israeli: Agooga noadaayi ng'asheega sean munyas easisi Yerusalemu ea badahuuka mujiinajeega sean bea Yuda. Ng'ula, askweareani niiw eemeega, ak ea manda siida abiita jeeda,

³ aba badayda munyasnacheeka sin, ak ghoanyareasan, ak aba ng'asheanji gaweay ghaghwarda hideeda nea gagadiiyeesa aseecheeka suuk ghayi mwanala saawa, ghana agooga, ghana ghweanigeagwa.

⁴ Ak geajeagu heedeang'wa fugeasu sean bea gadiyeeda was sibanga, ak iissa geabay dang'eat sakteayda ak geajeagu nea geayeenyi, ‘Asi agooga adoosinyi ng'asheanji muy aasichiin!’

⁵ Hean ea mooleeysiina iit ea mwaghamwada iidiga nyaawa ak abeeda ghwayam geat ak gwanung'usa heeda munyasnacheeka nyaawa ea majooysiina aroosta aseecheeka suuk.

⁶ Ak aba ng'asheanji ghwayeat nyarasteanyu ea jaliideanyu ak ghwayeat aba badayda mujiinajeega Yuda ea aba naweadinga hees bea Yerusalemu; ak mujiinajeesu ea sinung'usa heeda nea gagiisan nea gwanyara, ea gawuurji gidoong'uliidi ghamneawa.

⁷ Asi ghameawa gwayi NG'UTAMIIDA was ASEETA bea lugweega, was ASEETA Israeli: Ghwasaan inyas goosinyi giidiinyeanji hawiin aba badahuukeagwa agooga, ak ghoasaji geat ng'eedeeda ea gatmooda, ea baleanda mur ea dea reer, aba jeeda fuga Yuda, ak ea moopuusiiini geat boostaaneeda?

⁸ Aba gideaba ghoanung' danyareas aba gadiyoojiga geatingeagwa, aba gideaba goojooysi aroosta aseecheew suuk aba jeeda ng'eanyiida Misri damanda oobeawi ak goopiidi, nea goowooschi rabasta ak abeeda geesajeegwa ak ghoah mooshteayda ea baspaseega aba jeeda eemoojiga sean bea ng'eanyiida?

⁹ Neada ea nirooseegwa riing'eega ghweanigeagwa, ea riing'eega sugoodiga Yuda, ea riing'eega gadeemga nyaawa, ea riing'eegeagwa agooga, ea riing'eega gadeemgeagwa, ghayi sin aba jeeda ng'eanyiida Yuda ea aba jeeda naweadinga hees bea Yerusalemu?

¹⁰ Ak ea mii ghwaat geat ng'eanyi ea ghoah ghamneawa, ak ghanyea mabeala, ak ghanyea moang'waanya deaweedeedeanyu ea diigheanyeekeasu ghayi aayiinyi madeedeang'wa ea madeeda ghweanigeagwa.

¹¹ “Asi aba ng'asheanji gwayi NG'UTAMIIDA bea lugweega, was ASEETA Israeli: Ng'ula, gaydeagealu gheanyangeasu heedeang'wa ak geayeaneegwa ng'asheega munyas, bwak ea easach Yudayda sean.

¹² Ak gaydageanda boosteanga Yuda ghayi ageal gheanyanga nyaawa beata ng'eanyiida Misri ak goobiida hoowa, ak gaygoosha sean eara saawa; ak gaygoobeedeayi aba jeeda ng'eanyiida Misri ak gaygoosha aba ng'uta ea aba jalooda; ghang'eada dea mwanang' ea gagul dea haw; gay gameewa aba ng'uta ea jalooda, ak ghoah fiyeega, ea hamoodeaba ng'eanyi, ea mooshteayda, ea baspaseega.

¹³ Aba gideaba gaydalas fuga abiita ng'eanyiida Misri, gawuurji gida aalasti Yerusalemu, aba ng'uta, ea aba jalooda, ea aba dawni,

¹⁴ ak ea manda earagi aba jeeda fuga boos bea Yuda ghayi weay goobiida jeeda ng'eanyiida Misri jea ghawaapta ghana ghaghu gabiikta ng'eanyiida Yuda, was gea gasa gabiikta ak goobiida hoowa; aba gideaba maygabiikta, geaghus gea jea ghaghu.”

¹⁵ Nea headiga sean nal gideaba gadeemga nyaawa niidaw geediga ng'andidi aseecheew suuk, sea gadeemga sean miinaada nea gang'ula, was eemeeda saang'a, abiita Batirosi mida Misri, ak ghwasha ghuuta Yeremiya nea gwayeesha:

¹⁶ “Ng'asheandida ghayi irugu aba gheawunga NG'UTAMIIDEAN, majeeleeyseey iit.

¹⁷ Ak gajeesna gida wasean ghayi siyeaksi habeawooda, ak geaghwardi geediga ng'andidi aba badayda gatmooda was sugoocheanda aba humng'eeda ak geetalealsi niny haleanjeeda ghadooweeda sileeha, gawuurji gidasisindi aseasa, sea ghweanigaasa, sea sugoodigaasa ea fugaasa hees, aba mujiinajeega Yuda ea aba jeesinga naweadinga Yerusalemu; aba gideaba abeeda geendeawi hamita deayeat, nea geanyagaadi, nea miyeadaaha ng'asheega munyas.

¹⁸ Iimuchu nea geanung'waadi ea mudu eejooysiina aroosta ng'andit sugoocheanda was gatmooda humng'eeda nea geetalealsi niny haleanjeeda sileeha bea ghadooweeda ea niishoadeaweasa haleanjeeda saang'a ak gealas uhuudeanya aba ng'uta ea jalooda.”

¹⁹ Ghwalamda gadeemga ak gwayeesha, “Nea iisijooysi aroosta ng'andit sugoocheanda was gatmooda humng'eeda nea geetalealsi niny haleanjeeda sileeha bea ghadooweeda, neada abeeda meesini mukaate aba gidarukuteayda siyeenatkaasa ak geesinyi mukaatajeega nea geesindi giduurji ratoadaanyi ak geetalealsi niny haleanjeeda sileeha bea ghadooweeda?”

²⁰ Ng'ata ghwalamda Yeremiya ak gwayeesha buuneesean, headiga ea gadeemga, was fuga shaah ng'asheandida:

²¹ “Aba iita geediga ng'andidi oaghwardi aba jeesinga mujiinajeega Yuda ea aba jeesinga naweadinga mujiineeda Yerusalemu, agooga ea ghweanigeagwa, neada ea moapkaada NG'UTAMIIDA saawa? Ak ng'asheanji ea mawa jeeda fughareadaanyi?

²² NG'UTAMIIDA mudughoamu ghamilikghta ng'asheegeagwa munyas oosinayi ea aba badayda riing'eega oosinyi; asi ghamneawa ng'eanyiideang'wa niiw raghoonyeanda ea eeshtearajeanda ea mooshteayda ak ea manda buuneeda, ea gawuurji giduurji bea ghamneawa.

²³ Ama noojooysi aroosta ng'andit, ak ea noosisi riing'eeda NG'UTAMIIDA nea mooleeysiini iit ghuut NG'UTAMIIDA nea moayaadi geeshta deaweedajeega ea hamurajeagaaschi ea diigheanyeekaaschi ghana ng'asheagaaschi muuwu, ni gidanyastaneegwa ng'asheesu munyasiin gil, ea ghoah ghamneawa.”

²⁴ Ng'ata gwayeesha Yeremiya buuneesean, “Ayiinya ng'asheanda NG'UTAMIIDA, oogasean bea Yuda oondi jeeda ng'eanyiida Misri;

²⁵ Asi gwayi NG'UTAMIIDA bea lugweega, was ASEETA Israeli: Agooga ea gadeemgeagwa goorugu aba ghuusigeagwa, ak ea noahiichi aba geatingeagwa nea gooyeenyi, ‘Aba huumwa gajeatayda haleanjeeda sirachi, nea geejooysi aroosta ng'andit gatmooda was sugoocheanda abiita humng'eeda nea geetalealsi niny haleanjeeda sileeha bea ghadooweeda,’ asi oomajeega haleanjeeda oarachi ak ghoataydi haleanjeeda oarachi.

²⁶ Asi ooleeysiina iit ng'asheanda NG'UTAMIIDA, oogasean oobeayi Yuda was gea abiita ng'eanyiida Misri: Ng'ula, aniini naayaaji habeawooda aba gheawungeasu haw, gwarugu NG'UTAMIIDA, maygudu gabiikta gwarugu ghuuta siida wassean bea Yuda aba jeeda ng'eanyiida sean bea Misri nea gwayi, ‘Aba gidabiideata Ng'utamiida was ASEETA.’

²⁷ Ng'ula, aniini geang'ulayi saawa deasa ng'asheega munyas nea mii gea miyaasiin ea fuga sean bea Yuda mida jeeda ng'eanyiida Misri gajealas uhuuda aba ng'uta, ea geejeeda, ak ea moapta eara siyagi.

²⁸ Nea giika ghuha ng'utean gaygwariteawa ng'eanyiida Misri ak gaweay jeeda ng'eanyiida Yuda, nea ng'ay moana; sea boosteanga sean bea Yuda, hidu goobiida ng'eanyiida Misri, gayghwanal ng'asheanda jea ghamiinaada deabeang'a, deanyu ghana dea nyaawa.

²⁹ Ak gili gayghoah gwadeagooda aba heedeang'wa, gwarugu NG'UTAMIIDA, gideaba aniini gaydalaseagwa aba jeedeaba ng'eanyiini, ak abeeda ghoanali gideaba ng'asheegeasu aba huumwa gayghamiinaada aba badahuukeagwa aba ng'asheega munyas:

³⁰ Ak gwayi NG'UTAMIIDA, Ng'ula, gaydaadaw Farao siguura Hofra was sugoocheanda Misri gaydayiin geatinga weajoodiga nyaawa ea geatingeaba fugiga gaseadayi eaweagaaschiin, gawuurji gida aayiindi Sedekiya was sugoocheanda Yuda geatinga Nebukadreesa was sugoocheanda Babeli, was weajoocheandaanyi gaseadayi eaweagaaschi.”