YEREMIYA 34 - Bibliyeeda Ghaydit

Giijasta weah heeda Sedekiya

¹ Ng'asheanji dea weesa Yeremiya gil leabu heeda NG'UTAMIIDA, damanda waseewa Nebukadinesa sugoocheanda Babeli, ea lugoadaanyi sean, ea sugoodiga sean bea ng'eanyiida mida hing'eadayda gheambalmeadaanyi, ea eemoojiga sean ng'uchi sea Yerusalemu, ea mujiinajeega sean.

² “Gwayi NG'UTAMIIDA was ASEETA Israeli, ‘Una ak giibalooli Sedekiya, sugoocheanda Yuda, ak giyeeshi niny gwayi NG'UTAMIIDA, Ng'ula, gaydayiin mujiineani geatinda sugoocheanda Babeli ak gayghaghwarda aba beasta.

³ Ak ang'iing'i ea mayghuha aba geatindaanyi nea aba huumwa gajeang'waanyi ak geayiinyi geatingaaschi, ak gheanyangaagu gaygang'ula gheanyanga sugoocheanda Babeli, ak gaygoobaloolnyi nea ang'iing'i gajuna Babeli.’

⁴ Nea eara gwasunu aleaydiit ng'asheanda NG'UTAMIIDA, Ea Sedekiya sugoocheanda Yuda, gwayi NG'UTAMIIDA aba badayda ng'asheagaagu ‘mayghabwarnyi ng'uta.

⁵ Gaymeawa nea gibea hoyyoo. Gaygawuurji geediga ng'andidi ghwarda ghweanigeagwa was sugoodiga ghayi mida madeadaang'u gaygwajooyseey nea gooyeawuseey, ak gwayi “nimi ng'utamiideanya!”’ Gearugu aniini NG'UTAMIIDA.”

⁶ Hean gwarukusa Yeremiya was sibaneeda, Sedekiya sugoocheanda Yuda, ng'asheesu seaniin aba Yerusalemu.

⁷ Damandida ghayi ng'ucheewa lugooda Babeli ea Yerusalemu ea mujiinajeega sean bea Yuda abit ea Lakishi, ea Aseka, aba gideaba mujiinajeega abit suh gil gabeachi, aba mujiinajeega Yuda mideawa hilooga majeekcheewi.

Giibaldeaba geaw bea soomjooga bea reengaweega

⁸ Ng'asheanji dea weah heeda Yeremiya gil, leabu heeda NG'UTAMIIDA, iing'ata damanda ghayi neajeewa sugoocheanda was Sedekiya, sea fuga sean mida Yerusalemu, ak gwarukusa iita giibaldeaba geat.

⁹ Daba siisi siksa soomjeandaanyi bea eemeeda Ebraniya ng'eedeeda ea gatmooda, asi siida wassean ada ghwanung' ghoah soomjeanda siida eemeeda Yahudi was orjeeda ghaamwat.

¹⁰ Ak fuga hees sean, ea buuneesean sin neajeeni hean ghamwas sean gideaba gaygwasiksa soomjooga nyaawa headiga ea gadeemga, nea maygudu gwanda siida jea ghwanung' ghoah soomjooga, hean geeneaji ak geesiksa saawa goobal geat.

¹¹ Hean iidu ghwayamwa fughareenga nyaawa, ak geebiikta eang'waay soomjoogiga ghayi sisiksean headiga ea gadeemga ak geanung' gabiikta soomjeanduumeeda.

¹² Hean ghwahidu ng'asheanda NG'UTAMIIDA heeda Yeremiya leabu heeda NG'UTAMIIDA ak gwayeesha,

¹³ “Gwayi NG'UTAMIIDA was ASEETA Israeli, ghayi geasinyi neajeeda sea ghweanigeagwa, damanda ghayi earuuni saawa ng'eanyiida Misri abeeda gwanda jeeda soomjeanduumeeda nea geayeenyi.

¹⁴ ‘Nea huuydeanda gweaydeaba lah gaygaba siisi siksa orjeeda ghaamwat was siida Ebraniya goobal geaw was dea ghayi ishaahi aba gideaba gagadiyeeseey gweanyeew lah, gaysiksiina goobal geaw.’ Ak ghweanigeagwa ea mooleeysean iit nea mwayiinya iiteanyu.

¹⁵ Ak agooga ghayi ghoayamnyi geat ak goosinyi gea doobiiweadi aba madeedeanyu, aba gideaba gaba siisi nung' goobal geaw orjeeda ghaamwat abeeda agooga ghayi noosinyi neajeeda aba madeedeanyu, aba gheedida sing'assa gheawungeasuun.

¹⁶ Ak iidu ghoayamnyi geat ak ghoang'udi gheawungeasu ririnnyeanda, aba gideaba gaba siisi nung' gabiigu soomjeandaanyi ea hudaanyi bea gadiyeeda, ghayi siksa goobal geat aba gidabwariiyda saawa, ak goonung' gabiikta gicha soomjeanduumeeda ghoah soomjoogeagwa ea haweegeagwa bea gadiyeeda.

¹⁷ Asi gwayi NG'UTAMIIDA, miyooleeysean iit, ak gaba siisi nung' goobal geaw orjeeda ghaamwat, ea giischeewoocheandaanyi, ng'ula, gaydanung' oopalageat, gwarugu NG'UTAMIIDA; gajooshealana aba ng'uta, ea jalooda, ea dawni, ak gaydanung' eekealeegwa hoowa ea hoowa aba jeeda sugoodiga sean bea ng'eanyiida.

¹⁸ Ak fugiga datas neajeedeanyuun nea ghaheawa ghoang'waay gidamiisa neajeeda ghayi sin aba madeedeanyuun, asi gaydanung' gawuurji meaydida ghayi lach saawa niba iyeenyean ak gwasik bugustaanyi–

¹⁹ Fuga hees bea Yuda, ea fuga hees bea Yerusalemu, ea fuga sigul, ea ashoohoodiga, ea fuga sean bea ng'eanyiida, suh fuga sik bugusteaba meaydida ghayi silach bugusta niba iyeenyean gil.

²⁰ Ak gaydayiin saawa geatinga weajoodiga nyaawa ea geatinga fuga gasa eaweega nyaawa. Ak muscheeka nyaawa gayghoah hamita dariidaka humng'eeda, ea diyeanga ng'weani bea badayda ng'eanyiida.

²¹ Sedekiya sugoocheanda Yuda ea fugaaschi hees, gaydayiin geatinga weajoodigaaschi ea geatinga fuga gasa eaweega nyaawa, ea geatinga lugooda sugoocheanda Babeli ghayi weay nea ghwanung'wa heeda ng'ucheeda.

²² Ng'ula, gaydaadaw diigheandeanyu gwarugu NG'UTAMIIDA, ak gaydanung' gabiigu saawa jeedeaba mujiineani ak gang'uchi saawa, ak gajeajoar ak gajeang'uda beasta. Nea mujiinajeega Yuda gaydanung' ghoah raghoonyeanda manda sih.”