YEREMIYA 32 - Bibliyeeda Ghaydit

Yeremiya ghwasha madamnyeanda

¹ Ng'asheanji ghwahidu heeda Yeremiya nea gwaleabu heeda NG'UTAMIIDA, gweaydeaba damanamughuush bea Sedekiya was sugoocheanda Yuda, nea abeeda ea gweaydeaba damasis gil bea sugoocheanduumeeda Nebukadinesa.

² Hean gwaneaweesa Yerusalemu lugooda sugoocheanda Babeli, nea Yeremiya was sibaneeda abeeda ea sirasa jeeda seamooda furiischoodiga mida jeeda ghooriida sugoocheanda Yuda.

³ Abeeda Sedekiya was sugoocheanda Yuda gwajaksa ghealooniga Yeremiya nea gwayi, “Ghwasaan anda giramoarani nea giyeeni, ‘Gwayi NG'UTAMIIDA, Ng'ula, gaydayiin mujiineani geatinda sugoocheanda Babeli ak gayghoang'waay.

⁴ Nea Sedekiya was sugoocheanda Yuda ea mayghaghu aba geatinga fuga Galdayo, ak aba huumwa gajeayiin geatinda sugoocheanda Babeli, ak gabalool nea gwadeaschi ak gaygwaroonyi ak gabalool sea niny nea gang'ula geat gheanyaga nyaawa.

⁵ Ak gayghwaat Sedekiya ea ghwahita Babeli, ak gaygoobiida hoowa ea dawa danyasa niny hoowa, gwarugu NG'UTAMIIDA eara ang'ucheewana fuga Galdayo, mayghwajoar.’”

⁶ Hean gwayi Yeremiya, “Goobaloolan NG'UTAMIIDA nea gwayi:

⁷ Ng'ula, Hanameli orjeeda Shalumu was orjeeda ghamageamadu gayghwahidu headaang'u ak gwayi, ‘Shaaha madamnyeandeanyu mida Anatoti aba gideaba giitinooda gwadoobiiwseey asi shaaha.’

⁸ Hean ghwahidu heedeanyu Hanameli was orjeeda dea ghamiiyya aba jeeda doodooda furiischoodiga gawuurji gidanyaashta ng'asheanda NG'UTAMIIDA ak gwayeeshiinean, ‘Eaniyean shaaha madamnyeandeanyu mida Anatoti mida ng'eanyiida Benjamini, atina ak gigeandi ghoah daang'u, nea eara giitinooda gwadoobiiwseey asi shaaha.’ Ak geajeeng'u gideaba ng'asheanji nih ng'asheanda NG'UTAMIIDA gil.

⁹ “Hean ghaashaayi madamnyeandida mida Anatotiin, aba heeda Hanameli orjeeda dea ghamiiyya, ak ghaadawji lapiyeadaanyi shekeelaji damanispwa bea lapiya.

¹⁰ Ak ghaang'udi mooneeda barawajeandida bea sheayeedean nea gearoorji nea geaguursi mushoodiga ak geadeanyi lapiyeadaanyi aba gidida siiteeniidean.

¹¹ Hean geageandi barawajeandida bea sheayeedean ghayi mideawa deaweedean ea barawajeanda nuut dea ghayi sibasiinyi niirja nea ea mii radaat.

¹² Ak ghaadawji barawajeandida bea sheayeedean Baruku was orjeeda Neriya bea orjeeda Maaseya aba madeeda Hanameli orjeeda dea ghamiiya, ea madeeda muushoodigiga ghayi ng'uda mooneeda barawajeandida bea sheayeedean, aba madeeda fuga Yahudi sean abiitpiit aba doodooda furiischoodiga.

¹³ Hean gwayeesha Baruku aba madeanyaawa:

¹⁴ ‘Gwayi NG'UTAMIIDA bea lugweega was ASEETA Israeli, geani barawajeesu bea sheayeedean barawajeanji ghayi siirooriin ea nih mii radaadiini, ak giyiini jeeda dabicheanda sisna sheang'weeda ak goobiida hoowa eawoojiga saang'a.

¹⁵ Aba gideaba gwayi NG'UTAMIIDA lugweega was ASEETA Israeli, gealga ea madameega, ea madameega sabiibu gajeasha gicha aba jeedeaba ng'eanyiini.’

Mooshta Yeremiya

¹⁶ “Iidu nea naadawji Baruku was orjeeda Neri barawajeandida bea sheayeedean, hean geamuschi NG'UTAMIIDA nea geayeeshi.

¹⁷ ‘Ea NG'UTAMIIDA was ASEETA, ng'ula ang'iing'i gibwadi humng'eeda ea ng'eanyiida aba uurdaang'u haw ea aba geatindaang'u doabiiwaat manda ng'asheanda hang'waay miimuusi.

¹⁸ Ang'iing'eeda inyeesa gibwaydi fuga as sagalamnyoojiga saang'a nea inyeesa giirgweaksi buuneeda aba riing'eega ghweaniga nyaawa guwoosi ASEETA haw nea guwoosi haw uur, NG'UTAMIIDA bea lugweega gheawungaagu gil.

¹⁹ Dea haw aba girgweaksiinda buuneeda, ak ghoamu sinooda, nea gheanyangaaschi ea nijaada aba naweadinga sean bea buuneeda, ak ghoadaw giliwas sih aba giteena naweadingaaschi ea giteena haghweega sinaweagaaschi.

²⁰ Ang'iing'eeda iyiini gwadeagooda ea ng'asheega deamdeameadi jeeda ng'eanyiida Misri ea ghoah ghamneawa, jeeda fuga Israeli ea bugusta eemoojiga sean, nea gwasissa geaw gheawunga gawuurji gideaba ghamneawa.

²¹ Nea giiruuni fugaagu was Israeli ng'eanyiida Misri aba gwadeagooda ea aba ng'asheega deamdeameadi ea aba geatinda haw uur ea geatinda doabiiwaat ea aba gharbeeda haw.

²² Ak giidawi saawa ng'eanyiini ghayi iyeaksi habeawooda ghweaniga nyaawa gideaba gajadawa ng'eanyiida nyiit eanooga ea maleeda.

²³ Hean gaweay jeedeaba ng'eanyiita ak goombal, ak ea mooleeyseey iit nea mwaang'waanya deaweedeadaang'u, nea manda ng'asheanda nisin aba jeedeaba giika ghayi iyeeshi sinnean, nea aba badaydeaba nih ea ninung' ghoang'waay ng'asheesu munyas seaniin.

²⁴ Ng'ula ng'asheesu gaweesa mujiineani ghoang'waay, ak mujiineani ea siyiin geatinga fuga Galdayo ng'uchi sea saawa, ak ng'uta, ea geejeeda, ea dawni, suh irguuni nisa, asi ng'ula ang'iing'i nidaah.

²⁵ Ea NG'UTAMIIDA was ASEETA, giyeeshiinean “shaaha madamnyeandida aba lapiya nea giguursi muuwshoodiga”– ak earapeadi mujiineani gajeayiin geatinga fuga Galdayo.’”

²⁶ Hean ghwahidu ng'asheanda NG'UTAMIIDA heeda Yeremiya ak gwayeesha.

²⁷ “Ng'ula, aniini geawooschi NG'UTAMIIDA was ASEETA, fuga sean heapi gwanda ng'asheanda hang'waay was sean mwaamuusi?

²⁸ Asi gwayi NG'UTAMIIDA, ng'ula, gaydayiin mujiineani geatinga fuga Galdayo ea geatinda Nebukadinesa sugoocheanda Babeli, ak ghoang'waay.

²⁹ Ak fuga Galdayo ng'uchi sea mujiineani gayghapka ak ghang'uda beasta mujiineani ea goosha, sea gealgaaschi nea uhuuda ghoorajeagaaschi ea sijooysa Baali haleanjeeda sisapa geadi siing'andiita, nea geataw aseecheeka haleanjeeda sisabwa geadi sileeha, siihiida aba gideaba niinyareasan.

³⁰ Aba gideaba orjooga Israeli ea orjooga Yuda nisinnean gea munyas aba madeedeanyu, ghang'eada gheareemaneanduumeeda nyaawa, aba gideaba orjooga Israeli niisaajan aba sinaweega geatinga nyaawa, gwarugu NG'UTAMIIDA.

³¹ Aba gideaba mujiineani ning'udanaan nyarasta ak ea goola goonyareesean ghang'eada damanda ghayi deasa ea ghoah ghamneawa, ak gaydageandeawa madeedeanyu.

³² Nea aba ng'asheega munyas bea orjooga Israeli ea orjooga Yuda, ghayi sin ak ghoanyareasan saawa ea sugoodiga nyaawa, ea fuga nyaawa hees ea ashoohoodiga nyaawa ea sibanga nyaawa, ea fuga Yuda, ea fuga Yerusalemu.

³³ Ak ea ninung'usean heeda nea mabiiksean, earapeadi aanalji saawa, inyeesa geabean dawa deanealshi, ak ea mooleeysiiniit giinealshooda.

³⁴ Nea ghwayiin ng'asheega nyaawa munyas jeeda gheeda sing'assa gheawungeasu ak ghang'uda ririnnyeanda.

³⁵ Nea gwadeeksa Baali heeda wagiida, mida jeeda moangoachiyda orjeeda Hinomu ak goosiik orjooga nyaawa ea haweega nyaawa jeeda beasta aba badayda Moleki ng'asheanda miidarukusa nea miigawa eara jeeda gurooroodeanyu gideaba gwasin ng'asheesu munyasiin aba gideaba ghwanung' goodiiy fuga Yuda.

Heeleeda rarooda

³⁶ “Asi gwayi NG'UTAMIIDA was ASEETA, bea Israeli, aba badayda mujiineani oobalooli agooga badaydaanyi ng'asheesu nea gooyeenyi, ‘Siyiinyi geatinda sugoocheanda Babeli aba ng'uta, ea geejeeda ea dawni’.

³⁷ Ng'ata gaydabwada geat saawa ghang'eada mujiinajeega sean ghayi eadearsi saawa aba nyarasteanyu ea sawanadeedeanyu ea aba nyarasteanyu haw, ak gaydeadu gicha hiji ak gaydanung' goobiitpiit nea gaba seayu.

³⁸ Ak gayghoah fugeasu nea geawooschi ASEETA nyaawa.

³⁹ Ak gaydaadaw saawa gurooroanagi, ea naweanagi, ak gayghoawal gheang'daang'u damanda manda muudeanooda aba miyeasnacheeka nyaawa ea miyeasnacheeka diibiga nyaawa iing'ata saawa.

⁴⁰ Nea gaydasin neajeeda manda muudeanooda sea saawa, gideaba maydayam geaw nea maydanung'wa heeda, ak gaydasima gea miyaas, ak gaydasin gheawalmeedeanyu jeeda gurooruunatka nyaawa aba gideaba ea mwayamwa geat ghwanung'wanaan heeda.

⁴¹ Ak gaydahoosan dasisa saawa gea miyaas, nea gaydanung' goobiida saawa jeedeaba ng'eanyiini, aba doobiiwnata, aba gurooroodeanyu sean ea jeedeanyu sean.

⁴² “Aba gideaba gwayi NG'UTAMIIDA aba gideayeateaydi ng'asheega munyas sean hees badaydeaba fiisu, asi gaydeadu ng'asheega miyaasiin sean badahuuka nyaawa ghayi eaheeleesi.

⁴³ Ak gajeasha madameega aba jeedeaba ng'eanyiini oobalooli nea gooyeenyi nih raghoonyeanda gil manda siida nea manda eara diyeayda siyiin geatinga fuga Galdayo.

⁴⁴ Madameega gajeashaaha lapiya nea barawajeanda sishaaha gajeang'waar ak geayiin mooneeda nea geeguursa muushoodiga aba jeeda ng'eanyiida Benjamini ea meadajeega sean bea Yerusalemu ea jeeda mujiinajeega Yuda ea mujiinajeega ng'eanyiida heayeeniga, ea mujiinajeega Shefela, ea jeeda mujiinajeega Negebu; aba gideaba gaydeadeelu fuga nyaawa bea ghealooniga gwarugu NG'UTAMIIDA.”