YEREMIYA 3 - Bibliyeeda Ghaydit

Fuga Israeli miidoobiiweadi

¹ “Inyas gang'ada gatmooda sea siyeadaanyi, ak ghang'amwa headaanyi, ak ghoah gatmoomba sih nuut, abeeda gayghoamu gabiiksa gatmoadaanyi? abeeda ng'eanyiita majeang'uda ririnnyeanda muuchi? gwayi NG'UTAMIIDA Ang'iing'i niyaagi hiseadayeanduumeeda sea ng'wasanga saang'a; abeeda ghamneawa gaygudu biikni heedeanyu?

² Gatgada gheanyangaagu ea ghwahita heayeeniga geawi, ak gidaahi! Gwanda heeda miighang'udaneayi ririnnyeanda? Inyeesa gimiinaadi aba gheata naweeda nea giimuuku ng'wasangaagu guwuurjeewi ng'eanyoocheanda aba jeeda dareapcheeda. Ang'iing'i ning'udi ng'eanyiida ririnnyeanda aba hiseadayeanduumeadaang'u muy.

³ Ghamneawa shiishiiyda siiteal nea eara roopta girjeanda ea miighoan; gindeawi gheanyanga hang'oonyi uurji gea gatmooda hiseada nea eara baspaseega ea mindeawani.

⁴ Heapi ghamneawa miguurni nea giyeeni ‘Ang'iing'i giwoosi ghweandeanyu, nea guwoosi siida eaduupcheewi gidang'eada gheareemaneanduumeedeanyu

⁵ niny gayghwanyareas damanda manda muudeanooda, ak gagiisan ea ghwahita huuydeanda?’ Ng'ula, ang'iing'i nirugu ng'asheega, aba gideaba nisini ng'asheega sean munyas iimuusi.”

Israeli ea Yuda gagasa gwaduukuuna

⁶ Ak gwayeeshiinean NG'UTAMIIDA aba damanda sugoocheanda was Yosiya: “Neada ea mii nidaahi gida sin Israeleeda mandeawana masaweega, gidabeada ea gawa uhuuda heayeeda geaw ea guumba giliwas geeta shabwaat, ak gwahiseada aba hoowa.

⁷ Ak geateemshi, ‘Iing'ata nea nisin ng'asheesu seaniin ak gaygabiigu heedeanyu’; ak ea mabiikna nea ghwadaah huda ghaamwat bea ng'uyeega was Yuda.

⁸ Hean nea ghwadaah ng'asheega sean bea hiseadayeanduumeedeaba diita mandeawana masaweegean, Israeli neasiksi gawa sing'adayi; nea huda ghaamwat bea ng'uyeega ea mabeala, ak gawa ak gwahiseada eara niny.

⁹ Ng'ata ghang'uda ng'eanyiida ririnnyeanda ak gamealuul aba badita aseecheeka sisna lagheanga ea geediga.

¹⁰ Nea aba ng'asheesu seaniin huda ghaamwat was Yuda ea mabiiksean aba gurooroadaanyi sean, aba nyoota mureeda, gwarugu NG'UTAMIIDA.”

¹¹ Hean gwayeeshiinean NG'UTAMIIDA, “Israeleeda mandeawana masaweega niihiimu gideaba giidiinyeandaanyi aamwanang' madeeneawana dea ng'uyeega Yuda.

¹² Asi una, ak girukuti ng'asheesu nea gigali wiilooda ng'eanyiida ghayeawa nea giyeeshi ‘Biikni, Israeleeda mandeawana masaweega, gwarugu NG'UTAMIIDA. Maydang'uleeweey nyarasta, aba gideaba aniini geawooschi inya jih, gwarugu NG'UTAMIIDA, maydanyareas damanda manda muudeanooda.

¹³ Ang'iing'i mwasa giidiinyeandaang'u, bea gideaba ninung'usi heeda NG'UTAMIIDA was ASEETEANG'WA ak gookeali bariinyeegeagwa rabasta ea giliwas geeta nyawiish, ea gideaba miyooleeysiina iit ghuuteanyu, gwarugu NG'UTAMIIDA.

¹⁴ Abiikni, Ea diibiga mandeawana mureeda, gwarugu NG'UTAMIIDA; aba gideaba aniini geawooschi siidaang'u haw; gaydageandaneey, siyagi aba giliwas mujiini ea fih iyeenya aba giliwas ghoah, ak gaydeaneegwa ea ahiini Sayuni.

¹⁵ “‘Ak gaydagoonyi jeagiischoodiga gasa gurooroodeanyu, jea ghoahaaghwiidaneegwa fughareeda ea nalooda.

¹⁶ Nea iyoahaadi ea asaang'ayiida aba jeeda ng'eanyiida, aba askwearjoojigiga, gwarugu NG'UTAMIIDA, ak ea maygudu ayeena, “Sandakwajeanda neajeeda bea NG'UTAMIIDA.” Ak ea maygudu eapkaat, ghana eejeeng'u, ghana ghwaroat; ak ea maygudu eebiikta eesin.

¹⁷ Abeeda Yerusalemu gajeeguura hoorgeeda NG'UTAMIIDA, ak gaygabassa geat eemoojiga sean jeeda, aba madeeda NG'UTAMIIDA aba Yerusalemu, ak ea maygudugabiikta ghoahang'waay iheenga nea gamaseaw ng'asheega munyas bea gurooruunatka nyaawa.

¹⁸ Ak aba eawoojigiga fuga Yuda gaygaguuyi sea fuga Israeli, ak gaygoodeanyi duwaawi nea gwaleabu ng'eanyiida mida wiilooda ng'eanyiida ghayeawa ea ghwahidu ng'eanyiida aadawji ghweaniga nyaawa.

Fuga ASEETA ghabwat sanaamu

¹⁹ Gwayi NG'UTAMIIDA “‘Geagasayi gichea danung' ahuwda orjoogeasu ak geagoonyeegwa ng'eanyiida miy, was dea jea dagooneegwa ng'al darooraka sean. Ak abeeda gajaguureewean Bwaabwa, ak ea majanung'waada eanooga geeshteanyu.

²⁰ Aba huumwa gawuurji gidanung'usiinda heeda gatmooda siyeadaanyi gwasunu eara agooga moosinnean mureeda. Ng'asheanji gearugu aniini NG'UTAMIIDA.’”

²¹ Siyiiy ghuuta nyaasha iheenga heayeeniga, shooka ea gutuunooda heareega orjooga Israeli, aba gideaba niramwas naweeda nyaawa, ak ea niroosa NG'UTAMIIDA was ASEETA nyaawa.

²² “Abiikni, Ea orjooga manda mureeda, gaydageandeawaneegwa nyoota bea mureeda.” “Ng'ula, aseasa geapkaanyi headaang'u; aba gideaba ang'iing'i guwoosi NG'UTAMIIDA was ASEETEANYA.

²³ Aba huumwa heayeeniga gawuurji budeayda, badita sanaamajeega aba iheenga giijeega. Aba huumwa NG'UTAMIIDA was ASEETEANYA niny lealnoocheanda Israeli.

²⁴ “Nea gidang'eada gheareemaneanduumeedeanya nilas uhuudeanya baspaseega eesa sean was dea ghayi sin ghweanigaasa, was nooga nyaawa sea hawaniga nyaawa bea dugwa, ea orjooga nyaawa ea haweega nyaawa.

²⁵ Gagasa eabwadana jeesinga ng'eanyi aba baspaseegaasa, nea gwadukutaneasa nyooteanya bea mureeda; aba gideaba sisinyi riing'eeda aba badayda NG'UTAMIIDA was ASEETEANYA, aseasa ea ghweanigaasa, ghang'eada gheareemaneanduumeedeanya ak ea meesisiini mureeda asi eara aseasa ea miyeesisiina mureeda ghuuta NG'UTAMIIDA was ASEETEANYA.”