YEREMIYA 17 - Bibliyeeda Ghaydit

Riing'eeda ea ghoorjooda Yuda

¹ “Riing'eega fuga Yuda geang'oara galaamooda gharinyeanda; nea aba lagheaneeda hang'waay ea sing'oorsa gurooruunatka nyaawa, ea meadajeega sean bea heeda nyaawa wagiida,

² damanda gudu goopkeadi diibiga nyaawa heeda nyaawa wagiida ea aseeta nyaawa siguura Asherimu mida murdeeda geeta gilinyoo ea nyawiish gil, ea iheenga heayeeniga geawi,

³ ea iheenga giijeega mida mooheeda. Meanang'oocheanduumeedeang'wa ea gheaseedeang'wa gaydaadayda ghoah easanga ghwasha riing'eegeagwa aba jeeda moonghajeegeagwa sean.

⁴ Ak gajoang'aang'aara geatingeagwa aba heeda hearaniischooda ghayi eagoonyeegwa, ak gaydanung' agadiyeesiina weajoodigeagwa aba ng'eanyiida moanali, aba gideaba nyarasteanyu niyeata beasta nea ea maygamis damanda manda muudeanooda.”

Ng'asheega suuk siruku

⁵ Asi gwayi NG'UTAMIIDA: “Gagasa eamoashta siida bwata siinuut siida nung' ghoah uurda sih nuut igeamboadaanyi nea gurooroadaanyi ea ninung'usa heeda NG'UTAMIIDA.

⁶ Gawuurji seendooda mida eeshtearajeanda, nea ea mayghwanyas gil miy jea ghoan headaanyi. Gaygoobiida heeda ghajaam aba jeeda dareapcheeda jeeda ng'eanyiida mida balang'da meepiiteena jeeda.

⁷ “Ghang'wana siida ghus NG'UTAMIIDA, dea was ghusoadaanyi NG'UTAMIIDA.

⁸ Gawuurji geeta sing'eapsa ghuuta eenda inyeesa ghaftu hawungaaschi ak gagal jeeda eenda, nea eara gwadagu daknooda ea maduupa eara gil aba gideaba seengaaschi iissa ea shabeadi; nea maygwadeawiit gweayda manda roopta, ak ea mayghwashnya jeata.”

⁹ Guroorooda gaba ng'uya ea ghwanaawa haleanjeeda sean, nea ea nidatasa muuchi; gayghoamu ng'eaha ghwanal?

¹⁰ “Aniini NG'UTAMIIDA inyeesa geang'ulayi saseeda nea geagalgal guroorooda, ak gaba siisi aadawji gidahaguuw aba giduurji naweadingaaschi.”

¹¹ Siida nyas meanang'oocheanduumeeda aba naweeda ghwanaat, gawuurji udamughusheanda amughuush dayeega mooruuna niny; ak aba jeeda eawoojigaaschi gajeanung'wa heeda niny, ak muudeanooda eaweagaaschi gayghoah siitasha.

¹² Siyiin heetiyeada hoorgeeda ghaambiidaat ng'eada dea ghayi bea mwadi nea ea heedeanya ghaydit gil.

¹³ Ea NG'UTAMIIDA, was dea ghus fuga Israeli, nea gea sinyi gajeapwaaspwaas; nea gea nung'waneey heeda gaygwarootiisa badayda ng'eanyiida; Aba gideaba ninung'usa heeda NG'UTAMIIDA, was healadeeda beega mideawa eaweega.

Yeremiya gamus weeta aba heeda NG'UTAMIIDA

¹⁴ Ahaabwan, Ea NG'UTAMIIDA, ak abeeda gaydaahaap; lealnean, ak abeeda gaydalaalaan; aba gideaba ang'iing'i guwoosi dea aaghaambiichi.

¹⁵ Ng'ula, gwayeeshiinean, “Gwanda yeenu ng'asheanda NG'UTAMIIDA? nung'waada ghwaan!”

¹⁶ Aniini mii dayeeshiineey ajeakni munyinda, Nea ea meahoosasiini eaweeda nyariida, ang'iing'i ginali ng'asheega rinna ghuuteanyu gwanda madeeda gheanyangaagu.

¹⁷ Adiidu giibealan; ang'iing'i guwoosi heechea damng'awsa eaweeda munyinda.

¹⁸ Gagasa eapwaaspwaas gea ghabwasan; nea adiidu ginung' eapwaaspwaasan; nung' gwanyik saawa, nea adiidu ginung' danyik; nung' ghwahidu heanyaawa eaweeda munyinda; huuyda saawa goosha nea ginung' ghang'at niba iyeenya giishealda nyaawa!

Giing'ooyda Sabaato

¹⁹ Ng'ata gwayeeshiinean NG'UTAMIIDA: “Una ak gimiinaadi aba gidaghuuta gheeh Benjamini; was dea badiina gah nea gwaritiideawa sugoodiga, ea jeeda gidaghuudajeega sean bea Yerusalemu,

²⁰ ak giyeeshi: ‘Oaleaydiit ng'asheanda NG'UTAMIIDA, Ea sugoodiga Yuda, ea fuga sean bea Yuda, ea fuga sean abiita Yerusalemu, siga gidaghuudajeesu.

²¹ Gwayi NG'UTAMIIDA: Ashageada eaweegeagwa, adiidu goosareeshi eaweeda Sabaato ghana ayeani nea goosiigu gidaghuudajeega Yerusalemu;

²² Adiidu gooruuteawi sareenda jeesinga gealgeagwa eaweeda sabaato, ak ea adiidu googadiiyi, oakghaydiida eaweeda sabaato, gawuurji gida ghayi earukusiindi ghweanigeagwa.

²³ Ak hean ghweanigeagwa ea mooleeysiinean iit nea maduupa eara gil, hean ghoahaang'waay iheenga nyaawa ak ea mwayiinya girgweaguutkeasu.

²⁴ Gwayi NG'UTAMIIDA, ‘“Inyas gajooleeysean iit ak ea mooyeani sareenda jeedeaba gidaghuudajeesu eaweeda Sabaato, aba ng'ata ghoaghaydiichi eaweeda sabaato nea moogadiyeeni,

²⁵ aba gideaba gaygwasigu jeeda gidaghuudajeega bea mujiineani sugoodiga jea goopteadawa hoorgeeda Dawdi; ak gabadiina mutukwajeega ea faraasajeega, saawa sea fuga hees, sea fuga sean bea Yuda sea fuga sean abiita Yerusalemu; nea mujiineani gaygoobiita buuneeda damanda manda muudeanooda.

²⁶ Ak gayghapkaana buuneeda mujiinajeega Yuda ea ng'eanyoojiga neaweesa Yerusalemu, ea ng'eanyiida Yerusalemu, ea Shafela, ea ng'eanyiida heayeeniga, ea ng'eanyiida Negebu, nea gweadu haleanjeeda sisabwa geadi sigwariida ea lukghumajeega, ea haleanjeeda sisabwa geadi was booga, ea hideeda ng'andit, ak gweadu eara gea badiischooda jeeda gheeda NG'UTAMIIDA.

²⁷ Ama inyas ea mooleeysiinean iit, ak ea moakghaydiidi eaweeda sabaato, ama inyas ea moanung'waadani sareenda haleanjeeda ak goosikchi gidaghuudajeega Yerusalemu eaweeda sabaato, abeeda gaydang'uda beasta gidaghuudajeagaaschi ak gayghwaak gealga sean bea Yerusalemu nea maygamis.’”