YEREMIYA 14 - Bibliyeeda Ghaydit

Geejeeda ng'waan

¹ Ng'asheanda NG'UTAMIIDA ghwahidu heeda Yeremiya aba nyoota roopta.

² “Fuga Yuda gagutu heareega Nea eara gidaghuudajeagaaschi ghwaleakghleakgh; Fugaaschi gagutu heareega aba badayda ng'eanyiida Nea shooka Yerusalemu ea nigal humng'eeda.

³ Fugaaschi hees niijeakta fuga nyaawa nea gadiyeeda gwaramu beega, ghwahita heeda healadeeda ak ea mwanyasa beega, hean gabiigu nea gweana geadi moongoojiga; hean gaba baspaseega nea gwadukuta iheenga nyaawa.

⁴ Aba ghajeamnata ng'eanyiida aba nyoota roopta, hean ghang'ut baspaseega fuga bara ng'eanyi ak gwadukuta iheenga nyaawa.

⁵ Eara sheashooda inyeesa ghwanung'wa heeda dayeandaanyi gudugwaji aba nyoota nyeega.

⁶ Digeeniga jarooda ghamiinaada aba iheenga heayeeniga gajeami. Inyeesa ghoawata fureayoonga aba gheawoocheanda ak gamis gheanyanga nyaawa aba nyoota gichea ghwaak.

⁷ “Earapeadi ramaseanyeeka muuwu aba badahuukaasa, Yamni geaw, Ea NG'UTAMIIDA, aba bariinyeagaagu aba gideaba ramaseanyeekaasa aasaang'a muuchi, Nea ea sisinneey riing'eeda.

⁸ Ang'iing'i guwoosi hoyyooyda fuga Israeli ea lealnoocheandaanyi damanda sawanadeeda, ghwasaan anda geenung' uurjeewana rabascheanda aba badayda ng'eanyiida gawuurji bareanoocheanda yamgeaw gagasa ruweanga jeeda eaweeda?

⁹ Ghwasaan anda guwuurjeewi siida niroat uhuuda guwuurjeewi siida daruus moamu gwalagu gheeda? Nea ang'iing'i, Ea NG'UTAMIIDA, gindi bugusteanya nea geeguuruuneasa aba gheawungaagu; adinung'useasa heeda.”

¹⁰ Girugu NG'UTAMIIDA aba badaydeaba fiisu: “Aba huumwa fiisu ghabwariiy neayeeda ghwaraay ghwaadeal geeshanga nyaawa ea maneayi; ak aba ng'asheesu NG'UTAMIIDA ea maygudu ghoang'waayi saawa, hean gayghoapkaat ramaseanyeeka nyaawa, ak ghwaaga ghoorjooda riing'eega nyaawa.”

¹¹ Ng'ata gwayeeshiinean NG'UTAMIIDA: “Adiidu gimooriisi fiisu gea miyaas.

¹² Eara gooluulda geat, ea maydealeeysa iita shooka nyaawa, eara gagu haleanjeeda sisabwa geadi sigwariida, ea gea booga, ea maydaang'waay; hean gaydahuuyda saawa aba ng'uta, ea geejeeda, ea aba dawni.”

¹³ Ng'ata geayeeshi, “Ea NG'UTAMIIDA was ASEETA, ng'ula, ashoohoodiga gwayeesha saawa, ‘Agooga mwajadaaha ng'uta ea geejeeda, gaydagooneegwa hoyyooyda huumwa aba hiji.’”

¹⁴ Hean gwayeeshiinean NG'UTAMIIDA: “Sibanga gwarukwiida ng'asheega ng'uyeega aba gheawungeasu; Aniini miideajeakta saawa, ghana darukusa gil, ghana deabalool. Inyeesa ghwaramoar giirgweatka ng'uyeega aba heedeang'wa, ea giirgweatka marachi gil, nea inyeesa gang'asa geat ng'uyeega.

¹⁵ Asi gwayi NG'UTAMIIDA aba badayda sibanga ramoorani aba gheawungeasu nea meajeaktani nea gwayeena, ‘Ng'uta ea geejeeda mayghoani badayda ng'eanyiida’: Nea sibang'su gajeehuuyda aba ng'uta ea geejeeda.

¹⁶ Nea fuga ramoorasa gajeejaksa jarooda jeeda naweadinga Yerusalemu, was gea nihuuyda geejeeda ea ng'uta, nea manda siichea gabuy saawa, ea gadeemga nyaawa, ea orjooga nyaawa ea haweega nyaawa. Aba gideaba gaydahisa munyasnacheeka nyaawa badahuuka nyaawa.

¹⁷ “Ak gayrukusiina saawa ng'asheanji: ‘Gagasa ghoareamna gheanyangeasu dabeaka askweari ea eawa, nea adiidu gwajeama, aba gideaba fugeasu aabwariinyi ninyas deaneaduutka hees ninyas bayiiga hees.

¹⁸ Iyeariti dawa jeeda madameega, Ging'ulayi, gea sibwar aba ng'uta! Nea iyeawi jeeda mujiini, Ging'ulayi, gea nihuuyda geejeeda! Nea sibaneeda ea ashoohoocheanda gang'uchi gadiyoojiga nyaawa, Nea ea manda gil nal.’”

Buuneeda gamearmearani NG'UTAMIIDA

¹⁹ Ghamneawa nijakti Yudahi? Ghamneawa gurooroadaang'u niinyareas Sayuni? Ghwasaan anda nihuuydaneasa Bwak ea mudu gwanda gichea ghoahaabeasa? Geemuuku hoyyoo, ak ea manda gida miy hidu heedeanya; Aba damanda giiheapta, ging'ulayi geanyaschi muuwda.

²⁰ Ea NG'UTAMIIDA, geamwaschi munyasnacheakaasa ea ramaseanyeeka ghweanigaasa, aba gideaba sisinneey riing'eeda.

²¹ Adiidu gijaktaneasa, aba mureeda gheawungaagu adiidu gifooli hoorgeadaang'u bea gheambalmeeda mideawa gharbeeda; apkaada neajeadaang'u ghayi iheeleesi sea aseasa nea adiidu ginyarji.

²² Aba jeeda aseecheeka ng'uyeega bea eemoojiga, gwanda gea jea ghoamu gweadu roopta? Nea eara humng'eeda ghoamu ghwahiing'u shishiyda? Heapi ang'iing'i, Ea NG'UTAMIIDA ea muwoosi ASEETEANYA? Aseasa geedukuseeyi aba gideaba ang'iing'i gisinayi haleanjeeni seaniini.