YEREMIYA 13 - Bibliyeeda Ghaydit

Hang'da bumbun

¹ Gwayeeshiinean NG'UTAMIIDA, “Una ak gishaahi hang'da bumbuni, ak girasi manandaang'u, nea adiidu ging'udi beega.”

² Hean ghaashaayi hang'da mananda gawuurji gidanyaashta ng'asheanda NG'UTAMIIDA, ak gearasi manandeanyu.

³ Ng'ata ghwahidu heedeanyu ng'asheanda NG'UTAMIIDA deaba iyeenya,

⁴ “Geani hang'i bea manandaang'uun ghayi ishaahiin mida manandaang'uun, ak ging'eadi una ea hita eenda Furati, ak gifuysi jeeda gwaleeda.”

⁵ Hean geani, ak gifuysi jeeda eenda Furati gawuurji gidarukuteayda NG'UTAMIIDA.

⁶ Hean nea ning'ata eawoojiga saang'a gwayi NG'UTAMIIDA, “Ng'eada, ak guwi ea hita jeeda eenda Furati, ak gigeanu aba hoowa hang'dida bea manandeani, ghayi eanung' fuysiina hooweaniin.”

⁷ Hean geawi ea dahita eenda Furati, ng'ata ghaaghurghurji, ak geafagu hang'dida bea manandeani aba heeda ghayi eafuysi. Ak ging'ulayi, nidatasa; ak ea mudu gaba gil.

⁸ Ng'ata ghwahidu gicha ng'asheanda NG'UTAMIIDA heedeanyu:

⁹ “Gwayi NG'UTAMIIDA: Ak eara ghamneawa gaydahiing'u ghwarjeeda fuga Yuda ea ghwarjeeda haw bea fuga Yerusalemu.

¹⁰ Fiisu munyas, heawa gooleeysiit ng'asheegeasuun, ak ea niyam geat ak ghabeawa fughareenga nyaawa nea niyaat geeshta aseecheeka suuk ak gagadiiyeesa nea ghabwadiin, gajeanung' gawuurji hang'i bea mananda marachi giliin.

¹¹ Aba gidagiritiida hang'da mananda siida, gawuurji gealga sean bea Israeli ea Yuda aghadoawana geat aba heedeanyu, Ng'asheanji gwarugu NG'UTAMIIDA, ak gayghoah fugeasu aba gheawunga, ea aba duumsheesiinda, ea aba giigheambiita, ak ghaheawa gooleeysean iita.

Gikoombeeyda difaayi

¹² “Gwayi NG'UTAMIIDA, was ASEETA fuga Israeli, ‘Gayrukusiina saawa ng'asheesu, “Gilinyoo ea gikoombe gil gajeanyiit difaayi.”’

¹³ Ng'ata gajeeshiina, ‘Gwayi NG'UTAMIIDA: Ng'ula, gaydang'uda booktuumeeda fuga sean bea ng'eanyiini,’ sugoodiga abiita hoorgeeda gheambalmeeda bea Dawdi, ea ashoohoodiga, ea sibanga, ea fuga sean abiita Yerusalemu.

¹⁴ Gwayi NG'UTAMIIDA, gaydeang'uuchi saawa gaba siisi ng'uchi sea nuut, ghweaniga ea orjooga nyaawa, maygudu dabwayda, ghana dasiksa, ghana dasamsa, ea meahuydani goosha.’”

Yeremiya gwareekusa ghwarjeeda

¹⁵ Oaleaydiit, nea adiidu goosinyi ghwarjeeda aba gideaba niibalool NG'UTAMIIDA.

¹⁶ Oatawa giigheambiita NG'UTAMIIDA was ASEETEANG'WA heeda mii gwaruusa geeshangeagwa aba iheenga giijeega mideawa misaneeda damanda duu agaseewana weeshinda ghwayam ghoah duwunda ng'eanyiida ea misaneeda duu.

¹⁷ Ak inyas ea majaleaydiit, Abeeda gurooroodeanyu gaygooyeawda aba makcheameeda aba badayda weashweashtaang'u; Gaydeayeawda muuchi nea ghoareamna gheanyangeasu dabeakeasu, Aba gideaba gisilga NG'UTAMIIDA sighas.

¹⁸ Eeshiina sugoocheanda ea ghaamwat, “Ahiing'aanana hoorgajeegeagwa, Aba gideaba shiipkeagwa miyas niibituuna iheengeagwa.”

¹⁹ Mujiinajeega Negebu sirat, Nea ea manda siichea ghoamu gootin Fuga Yuda siyaat ghealooniga Aba giteena sean siyaat ghealooniga.

²⁰ “Gatgada gheanyangaagu ak gidaahi fuga leabu wiilooda ng'eanyiida ghayeawa. Gwanda yeenu hawanda siiteaganeeyi, gwanda yeenu hawandaang'u miyaas?

²¹ Gaysina naaha iijoarnyi fuga ghayi iinaali ginung' ghoah fuga iduupcheewi? Heapi mayghoang'waanyi lajooda uurji dea gatmooda weesa jeata?

²² Ama inyas giyeeni aba gurooroadaang'u, ‘Ghwasaan anda ghwanyasan habitkweeni?’ Hean gweagu hawunda munyindaang'u hean ghoah gisijaada eaghwadaang'u nea gisinayi ng'ooweata.

²³ Heapi siida duuw ghoamu ghwayam oormeadaanyi ghana mariirda ghoamu ghwayam ghuluumeadaanyi. Hean eara agooga ghoamuuschi asina gea miyas Agoogeeda noanalji sinita haleanjeeda munyas.

²⁴ Gaydaadaardaaydaneegwa looyda Gawuurji gidadeariideayda jeameeda aba ghuuta eeshtearajeanda.

²⁵ NG'UTAMIIDA gwayi, Nih gichea nyasa gil, heeda naaloach jea gahaguuwnyi Aba gideaba niheawanaan ak gighusi ng'uyeega.

²⁶ Gaydaamwaalda eaghwadaang'u ea ghwahita uhuudaang'u ak ghaanung' bwaspwas.

²⁷ Naadaayi munyindaang'u, hiseadayeanduumeadaang'u ea ghaleehoadaang'u, nea hiseadayeanduumeadaang'u naawda ea nigul iheenga heayeeniga ea madameega. Shageada, Ea Yerusalemu, Gajabiideatunu ea ghoah eeju nea meamiineey.”