YEREMIYA 11 - Bibliyeeda Ghaydit

Yeremiya ea neajeeda

¹ Ng'asheanda hidu heeda Yeremiya nea gwaleabu heeda NG'UTAMIIDA:

² “Ooleeysiina iit ng'asheegeaba neajeeni, ak girukusi fuga Yakobo ea gea abiita Yerusalemu.

³ Hean gajeeshiina, Gwayi NG'UTAMIIDA, was ASEETA Israeli: Gagasa eamoashta siida moang'waanya ng'asheegeaba neajeeni

⁴ ghayi earukusi ghweanigeagwa damanda ghayi earuuni ng'eanyiida Misri, jeeda beasta gharinyeanda, nea geayeeshi, Ooleeysiiniit ng'asheegeasu, nea goosinyi gichea darukuneegwa. Ak abeeda gajahuuwa fugeasu, ak aniini ghaahuuyi ASEETEANG'WA,

⁵ ak hean gaydaahiit habeawooda ghayi eayeaksi ghweanigeagwa gideaba gaydaadaw ng'eanyiida guldeawa eanooga ea maleeda, gawuurji giduurji ng'eanyiida ghamneawa.” Hean geayeenyi, “Ea NG'UTAMIIDA gideabali gwasunu.”

⁶ Ng'ata gwayeeshiinean NG'UTAMIIDA, “Rukwiida ng'asheesu seaniin aba jeeda mujiinajeega Yuda ea jeeda naweadinga Yerusalemu, gideaba: Oaleaydiit ng'asheegeaba neajeeni ak ghoang'waanyi.

⁷ Aba gideaba ghayi ghaamiinyi muuchi gheanyanga ghweanigeagwa damanda earuuni gwascheeng'na ng'eanyiida Misri, ak geemajeekchi miinda gheanyanga nyaawa, ea ghoah ghamneawa, nea geayeeniisi, Asisiina mureeda ng'asheegeasu.

⁸ Ak hean ea masinneani mureeda ghana gooleeysinean iidiga nyaawa, gaba nih ahang'waay gurooroadaanyi muy. Hean geargweaksi sean aba ng'asheega sean bea neajeeni, ghayi aadawji saawa ghoang'waay, ak ea moang'waanya.”

⁹ Gabiikta gicha gwayeeshiinean NG'UTAMIIDA, “Gwanda heeheeweega jeeda fuga Yuda ea gea abiita Yerusalemu.

¹⁰ Niyam geat gabiiksa ramaseanyeeka ghweaniga nyaawa, ghayi heawa gooleeysiit ng'asheegeasu; ak ghwaat geeshta aseecheeka suuk ak ghabwat; gheeh Israeli ea gheeh Yuda nidatas neajeedeanyu ghayi easinyi ea ghweaniga nyaawa.

¹¹ Asi, gwayi NG'UTAMIIDA, Ng'ula gaydajaksa jeeda nyaawa munyinda mayghoamu gamulsa; ak eara gooyeawusean, ea may dealeeysiit saawa.

¹² Ak abeeda eara mujiinajeega Yuda ea fuga abiita Yerusalemu gaygaweay gooyeawusa aseecheeka ghayi gwariideaysa geediga ng'andidi, ak ea mayghoamu ghaweat aba damanda sawanaduutka nyaawa.

¹³ Aba gideaba aseecheekeagwa nisaang'ayiit ea gwadeena mujiinajeegeagwa, Ea fuga Yuda, ak ea saang'a ea gwadeena naweadinga Yerusalemu heeda wagiida oadeaschi bea baspaseega, was heeda wagiida sigwariideaysa geediga ng'andidi jea goohoosan Baali.

¹⁴ “Asi Yeremiya, adiidu gimusiischeesi fiisu, ghana ayeawusean nea gimusiischi aba badahuuka nyaawa, aba gideaba maydealeeysiit ii guurnean damanda sawanadeeda nyaawa.

¹⁵ Fuga aabwariinyi neada ea gudu gwadoobiiwsa giibinda jeedeaba gheenyu aba gideaba nisin ng'asheega munyasi? Neada radita haleanjeeda ea lukghumajeega gayghoamu goohuun giidiinyeandeang'wa? Ak abeeda gajanyasa hooseaneega?

¹⁶ Ghayi aba mwadi gaguurneegwa NG'UTAMIIDA ‘geeta nyawiish was saytuunajeanda, geeta miy bea haghweega miyaas’; ak ghamneawa aba giighweendandeeda ea siilakghta haw gaygoojoon beasta ak gaygwaduulu beasta damealgaaschi.

¹⁷ NG'UTAMIIDA bea lugweega, ghayi ng'aaptaneeyi nibada gea munyas aba badaydaang'u, aba munyinda nisin gheeh Israeli ea gheeh Yuda, niinyareasan aba gideaba gagwardeaysa Baali geediga ng'andidi.”

Geebada bayiiga Yeremiya

¹⁸ NG'UTAMIIDA ghoahiimnaan ak ghwanung' dajeeng'u hean giihiimnaani sinaweega nyaawa munyas.

¹⁹ Aniini geanung' dawuurji dayeenda gisilleanda ng'eeni siyaat heeda fuga jeeng'shachi. Meajeeng'ni gideaba saawa gagasa gwasinnean munyinda nea gwayeena, “Anung' eebwara geeta ea haghweagaaschi anung' ealaja ak geang'ami jeeda ng'eanyiida fuga mideawa eaweega, ea mudu eapkaat gheawungaaschi earahay.”

²⁰ Ak ang'iing'i ea NG'UTAMIIDA bea lugweega, iirgweakiisi buuneeda aba doobiiwnata, ang'iing'eeda isimayi gurooruunatka ea fughareenga, nung' dadaah waldeaydaang'u bea mureandooda, aba gideaba naayiinyi headaang'u mureandoodeanyu.

²¹ Ng'ata gwayi NG'UTAMIIDA aba badayda fuga Anatoti, gasa gageanda eaweagaagu, nea gwayeena, “Adiidu giramoarani aba gheawunga NG'UTAMIIDA, ea meenuuseeyi”–

²² asi gwayi NG'UTAMIIDA bea lugweega: “Ng'ula, gaydaaga ghoorjooda fiisu, gheareemanga gaygoosha aba ng'uta; nea orjooga nyaawa ea haweega nyaawa gaygahuuyda jalooda;

²³ nea ea manda siichea gaboos. Aba gideaba gaydajaksa munyinda fuga Anatoti, gweayda lasooda nyaawa.”