SEFANIYA 3 - Bibliyeeda Ghaydit

Riing'eeda Yerusalemu ea baydeayda

¹ Dashageada daaheawa ak ghang'uda ririnnyeanda, mujiineeda sina ng'asheega munyas!

² Mooleeysiiniit ghuuta, mamwasa giiwoowsiinda, ak ea mamwasa NG'UTAMIIDA, nea maneekiisiina ASEATAANYI.

³ Fugaaschi hees mida jeadaanyi ng'anyeeka amuumi; nea fugaaschi aheeldooschi buuneeda ea gudeeda jarooda bea shing'ada gil mayghoabuut gil ea ghoah shing'ada.

⁴ Sibangaaschi fuga ng'arng'ari gil, nea gaba ng'uya; nea ashoohoodigaaschi ea ning'uda ririnnyeanda heeda ghaydit, ak ea niyam deaweeda gamunyiit.

⁵ NG'UTAMIIDA mida jeadaanyi ea doabiiwaat, nea maygwasin gidamuy; gilinyoo ea sakteayda gil inyeesa ghoahiimu doobiiwnataanyi, giliwas giirearnooda aseeta moang'wa gabur; nea siida miidoabiiwaat ea mandeawana baspaseega.

⁶ “Aniini naasaji eemoojiga; nea madalajeega nyaawa ea ning'ut salgheang'da; neanyarji naweadinga nyaawa hees ea manda siida sik eara akaleala; mujiinajeega nyaawa ning'ut salgheang'da, ak ea manda sih, ea manda siida mida jeeda.

⁷ Ak geayeenyi, ‘Aba huumwa gayghoawalan, nea ghamwas gileapooda; ak ea maygwaroosa, ak ea manda lasooda naalachi saawa jea ghwanung' ghwayamwa.’ Nea eara aba gida nyareesiida hean gwasin ng'asheega munyas raanya,”

⁸ “Asi oomukghunaan,” nih ginyah NG'UTAMIIDA, “aba eaweedida jea dahitaayda muushoocheandean. Aba gideaba neagasayi gideaba gaydabwada geat eemoojiga, ak ghaabwadi geat sugoocheanduumajeega, ak geasaksi badahuuka nyaawa nyarasteanyu, ea ng'weaninda sean bea nyarasteanyu; aba gideaba ng'eanyiisean gaygwaduulu beasta ea nyarasteanyu ea ng'weanjuumeedeanyu.

⁹ “Aba gideaba damandida gaydayam baloolda buuneeda eemoojiga ak ghamiidu, ak gaguursa sean aba jeenyaawa gheawunga NG'UTAMIIDA nea geegadiyeesa niny aba naweanagi.

¹⁰ Ghang'eada giigheawda eeniga Gushi, inyas ghamwaashan ghawooda haweega fugeasu dardaawaat, gaygweanean lukghumeedeanyu.

¹¹ “Aba eaweedida majeapwaaspwaasnyi aba ng'asheega iisini aba badaydeanyu; aba gideaba gaydang'amwa bugustaang'u fuga ghwarjeeda, ak ea maygut gwandaneey ghwarjeeda aba jeeda giijeedeanyu ghaydit.

¹² Ak gaydeabiida bugusteang'wa fuga garbapi ea gea barbari. Ak saawa gaygagasa heeda jea gamng'awsa aba gheawunga NG'UTAMIIDA,

¹³ nih giika sinung'usa Israeliin; ea maygwasin ng'asheega munyas nea maygwanaba ng'uyeega, ak ea majeanyasa ghuusiga nyaawa ng'ushapta ng'uyeega. Aba gideaba gajeeyeagiischi ak geeweay eelil, ak ea manda siida jea ghang'uda saawa muuwda.”

Duumda hooseaneega

¹⁴ Sarmana aba ghuuta haw, Ea hudeaba Sayuni; ajuura, Ea Israeli! Ng'weela nea gihoosani aba gurooroadaang'u sean, Ea hudeaba Yerusalemu!

¹⁵ NG'UTAMIIDA nigeanda girgweaguutka aba badaydaang'u, ak gwajaksa jarooda weajoodigaagu. Sugoocheanda Israeli, NG'UTAMIIDA gwanda bugusteang'wa; maygudu awala gidamuy.

¹⁶ Nea askweardida gajeeyeesha Yerusalemu: “Adibeali, Ea Sayuni; ada gaygang'arng'ariidi geatingaagu.

¹⁷ NG'UTAMIIDA was ASEATAANG'U gwanda jeedeang'wa, niny aamwaay nea ghoamu gwalealneegwa; gaygahoosasseey aba ng'weelooda haw, gayghwasiinda aba bariinyeagaaschi; gaygang'weela aba badaydaang'u nea gwasarman aba ghuuta haw

¹⁸ gawuurji eaweeda ghweelmeeda. “Gaydageanda sawanadeeda aba headaang'u, ak abeeda ea meeyeateeweey ghuut.

¹⁹ Ng'ula, aba damandida gaydalas fuga sean sawanyi. Ak gaydalealu siida badeeda ak gaydabwada geat gea sihoan, ak gaydanung' ghoah baspaseega nyaawa giigheambiita ak gageawiit iita aba jeeda ng'eanyiisean.

²⁰ Ak aba damandida gaydeaneey ghoah, aba damandida iyaabwadaneegwa geat; gaydanung' gageawiit iita ea giigheambiita aba badayda buuneesean mida badayda ng'eanyiida, damanda jea daaghuumna fugeagwa mida ghealooniga madeeda gheanyangeagwa,” nih gwarugu NG'UTAMIIDA.