SARMEEDA SULEMANI 8 - Bibliyeeda Ghaydit

¹ Gidabal gwachi guwuurjeewi orjeediyya aba heedeanyu, reer gidinga iya! Nyas geeroonyeesi jarooda abeeda gaydasam gheataang'u, aba gideaba adagafoolan sih.

² Gwachi gaydaadoabiiwnyi ak geayeaneey jeeda gheeda iya, jeeda ghooriida ghayi sijiilsean. Ak ghaanung' leaha difaayeeda heasaat, was difaayeeda heasaat bea geeteanyu siguura goomamaanga.

³ Geatindaanyi ghaadaam gwadiiwa uhuudeanyu, nea geatindaanyi bea dugwa ghwadeaptanaan.

⁴ Geamuscheegwa ea haweega Yerusalemu, ghwasaan anda gajoaluuja bariinyeega ghana aheada, anung'waada ea ghwahita damandaanyi.

Duumdeaba lah Gadeemga

⁵ Siisi siyeeng'na dareapcheedean ng'eaha gil, ghaghus siidaanyi bwariiyi? Ghaaheacheeyi aba guumda geeta siguura mapeera, aba hooweani nyasa geamaduun lajooda jeata, ak gwajiilnyi.

Gatmooda

⁶ Iinaan jeeda gurooroadaang'u gawuurji giirooraneeda, ak gawuurji giirooraneeda aba badayda geatindaang'u, aba gideaba bariinyeega gwandeawa uurda gawuurji miyeeda, lachng'eanyiida aang'waan ea gawuurji bung'eeda. Gidayeata bariinyeega ghwayeata beasta ak ghwayeat ea gawuurji ng'ushapta beasta.

⁷ Beega saang'a maygwanuus bariinyeega, ghana eeniga mayghoamu ghwaak, siida nyas ghoadayda haleanjeedeaba gheanyi sean aba badayda bariinyeega abeeda gajeefool muuchi.

Orjooga geenyea gatmooda

⁸ Gwanda hutpa giyeanya mwanang' ak ea miigwardu gidinga, ghamneawa gajeesna naaha aba badayda huda giyeanya iisufka eenyeari?

⁹ Inyeesa huda ea ghamarda gil, abeeda gajeedeeksiina madalooda lapiya, ama inyeesa ea gidaghuuta gil abeeda gajeediiw aba beehajeega gubooyeanda.

Gatmooda

¹⁰ Aniini ghayi geawooschi ghamarda, ak gidingeasu gawuurji madalajeega, aba madeadaanyi geawuurjeewi siida nyas hoyyoo.

Ng'eedeeda

¹¹ Sulemani abeeda gwandeawa madamnyeanda sabiibu aba Baal-hamoni, ak ghoadaw madamnyeanda furiischoodiga jea gooragan, ak gaygaba nih adayda lapiyaji sagalam aba badayda haghweega.

¹² Madamnyeandeanyu bea sabiibu, was deanyu gwanda madeedeanyu; asi ang'iing'i ea Sulemani beaha sagalamnyoojigaagu, ak furiischoodiga fur haghweegean, gajeataw bughalaji iyeenya.

¹³ Ea ang'iing'eeda iibiiti jeeda boostaaniin, buweadeegeasu niyiiy ghuutaang'u ea aniini naayiinyi.

Gatmooda

¹⁴ Lamwajaana ng'wasaneedeanyu aabwariinyi, ak gajuurjeewana mayeanda ghana ndoopkeeda aba badayda giijeega mida geediga ng'andidi.