SAKARIYA 9 - Bibliyeeda Ghaydit

Girgweaksiinda giischeewda eemoojiga

¹ Nih ng'asheanda NG'UTAMIIDA gil ghayi rugu aba badayda ng'eanyiida Hadaraki, ak gaygawa Dameski heeda jea gafuufa; aba gideaba gheang'da siida NG'UTAMIIDA gaba mujiinajeega Arama, ea eemoojiga sean bea Israeli;

² Ea Hamati mida moonghooda Hadaraki, ea Diro ea Sidoni, earapeadi mideawa weaghuumeeda muuchi.

³ Fuga Diro gwadeeksa geat museasooda, ak geawaam lapiya ea gwadeena iseaskweanda, ea dahaabu siguura dahaabu, ea gawuurji ghwashaayda mida ghuuta naweeda bareanda.

⁴ Asi ng'ula Ng'utamiida gaygageanda meanang'oocheanduumeadaanyi, ea gwajaksa uurda nyaawa mideawa jeeda basooda, nea niny gayghwaak beasta.

⁵ Fuga mujiineeda Ashkeloni gayghabwaspwas nea ghang'ut muuwda; eara fuga mujiineeda Gaasa gaygwahirbaban muuchi, eara fuga Ekroni, aba gideaba gidida rarsean niroat, ak sugoocheanda gajealas uhuuda ghang'eada Gaasa, ak Ashkeloni gajea mutgwandeawa buuneeda.

⁶ Ak gaygoobiida fuga was beashkealeeda ng'eanyiida Ashdodi, ak gaydanung' goosha ghwarjeeda fuga Filisti.

⁷ Ak gaydageandeawa ghuutaanyi foojeanda, ea hamichoojiga siheawaan gaydageandeawa dageascheeda geeshatkaaschi; niny gayghoah boostaaneeda aba heeda ASEETEANYA; ak niny gaygawuurji dooshta aba jeeda fuga Yuda, nea Ekroni gawuurji fuga Yebusi.

⁸ Nea aniini gaydamiinda maheemajeegeasu aba meadajeega sean bea gheenyu, aba gideaba gaydang'uchi weajoodiga, ak ea mwang'ata eara siyagi, ghana gabiikta ghana siida ghabwas niirja maygwasik bugusta nyaawa aba gideaba naadaayi aniini aba gheanyangeasu.

Sugoocheanda jea ghwahidu

⁹ Ang'weela muuchi ea fuga Sayuni, Ajuura muuchi ea fuga Yerusalemu, Ng'ula sugoocheandaang'u ghwahidu headaang'u Ea doabiiwaat, nea gwandeawa lealeanooda Gweada geaw ng'eanyi nea gwading'da badayda digeeda, gureenda digeeda dayeenda digeeda

¹⁰ Ak gaydageandeawa mutukwajeanda ng'ucheeda heeda Efraimu, nea eara faraasi geasheagiidi Yerusalemu, nea ghuweang'da ng'ucheeda gajeegeanda gwasheagiit, ak niny gaygwarukwiisa eemoojiga sean ng'asheega hoyyoo, ak gaygoombal gidang'eada basooda ea ghwahita basooda, ghang'eada eenda ea gagul muudeanooda ng'eanyiida.

Giighuumnooda fuga ASEETA

¹¹ Aba badayda ng'asheagaagu, ea aba badayda foojeanda neajeadaang'u, nearuudu fugaagu mida ghealooniga aba jeeda shoomandida manda beegean.

¹² Abiiksiina museasoodeang'wa ea fuga ghealooniga mideawa rariida, ak eara ghamneawa geayeenyi gaydanung' amiyeasiita nibiyeenya.

¹³ Aba gideaba naanung' ghaghuumwa Yuda, neasinyi ghuweang'deanyu aba badayda Efraimu nea ghaanung' ghang'eat diibigaagu Ea Sayuni gang'uchi sea diibigaagu, Ea Yunani, aniini gaydanung' uurjeewana ng'uta muraneeda.

¹⁴ Ak gayghwahidu NG'UTAMIIDA badahuuka nyaawa, nea geacheadaanyi gayghwahitaayda dadamandeeda, Ak gayghaghuut NG'UTAMIIDA was ASEETA durumbeati, ak gayghwahitaayda shaarareeda leabu wiilooda ng'eanyiida biyeara.

¹⁵ NG'UTAMIIDA bea lugweega gayghaweat saawa, ak gayghwalas uhuuda weajoodiga nyaawa. Nea ghwali foojeanda nyaawa gawuurji difaayi, ak gajeanyiit gawuurji gweeriida, nea gawuurji gujaka heeda wagiida.

¹⁶ Eaweedida NG'UTAMIIDA was ASEETA nyaawa gayghaweat saawa aba gideaba fugaaschi bwatgeat gil, aba gideaba gawuurji lagheanga miyaasiin bea shiipka ak gayghoabwaay badayda ng'eanyiidaanyi.

¹⁷ Aba gideaba alooheadaanyi aahaw! Nea eara miyindaanyi aahaw! Booga gayghoarear gheareemanga, nea difaayeeda eashish gayghoarear haweega.