SAKARIYA 4 - Bibliyeeda Ghaydit

Giihiimnooda hoorgeeda siyiina gheaboong'nyeanda

¹ Ak ghwahidu deabiyeenya malaykajeandida gwachi abaloolaniin ak ghwaheadan gawuurji siida siheat aba jeeda ruweanga.

² Ak gwayeeshiinean, “Gidaahi naaha?” Ak geayeeshi, “Ghaadaayi ng'ula hoorgeeda siyiina gheaboong'nyeanda, nea geesina dahaabu, nea uhuudaanyi gwanda gweeriida, ea gheaboonyan ispwa mida uhuudaanyi ak gwanda seawuut ispwa aat nagheeda jeedeaba gheaboonyangiga;

³ Ea saytuunaji iyeenya mida murdeadaanyi agi gwanda geatinda dugwa bea gweeriidida, nuut gwanda geatinda ghaadaam.”

⁴ Hean geayeeshi malaykajeandida abaloolaniin, “Ea Ng'utamiideanyu suh naaha gil?”

⁵ Ng'ata ghwasha ghuuteanyu malaykajeandida abaloolaniin ak gwayi, “Gideabeadaanyi naaha ng'asheesu?” Geayeeshi “Manda Ng'utamiideanyu.”

Neajeeda ASEETA aba heeda Serubabeli.

⁶ Hean gwayeeshiinean “Nih ng'asheanda NG'UTAMIIDA gil aba heeda Serubabeli nea mii aba giimuusta gil nea mii aba uurda gil gwasin guroorooda gwarugu NG'UTAMIIDA bea lugweega.

⁷ Giijeeni hawiin gilba naaha gil aba heeda, Serubabeli? Gayhuuwa ng'eanyiida awiida, ak gaygweadu lagheaneeda jea eayiin uhuuda ak goojuur buuneeda nea gwayi, ‘Aamiy, aamiy muuchi.’”

⁸ Ghwahidu gicha ng'asheanda NG'UTAMIIDA heedeanyu ak gwayi,

⁹ “Sindeeteaba gheawi ghwayiin Serubabeli, ak siichea ghoahiit ea niny gil. Hean abeeda gaynala gideaba goojeaknean heedeang'wa NG'UTAMIIDA bea lugweega.

¹⁰ Aba gideaba neada gafool ng'eaha eaweecheanji bea ng'asheega manang'iin? Aba gideaba gajeehoosan, iisidaah Serubabeli nea ghwadeas gheeda sibata ASEETA. “Nea suh asispwaan ea gheanyanga NG'UTAMIIDA gil, gang'ula meadajeega sean bea ng'eanyiida.”

¹¹ Ak gwayeesha niny, “Nih gideabeadaanyi naaha gil saytuunajeesu asiyeenyean mida meatkweeda geatinda dugwa bea hoorgeeda heeda siyiina gheaboong'nyeandean ea dea mida meatkweeda ghaadaamiin?”

¹² Hean ghaanyaashchi niny deabiyeenya nea geayeeshi, “Gideabeadaanyi naaha damealsu asiyeenya bea saytuunajeega mida murdeeda boombaji iyeenye bea dahaabu rinna nagheedean?”

¹³ Ak ghwasha ghuuteanyu nea gwayi, “Minali suh gidawasi?” Ak geayeeshi, “Manda Ng'utamiideanyu.”

¹⁴ Hean gwayi, “Suh fih iyeenya gil loat ASEETA ak ghoamwaar gagadiiyeesa ninyeeda was NG'UTAMIIDA ng'eanyiisean.”