SAKARIYA 2 - Bibliyeeda Ghaydit

Giihiimnooda ghealooda siiteeniida

¹ Ng'ata geagatkachi gheanyangeasu ak ghaadaayi siida mideawa ghealooda siiteeniida aba geatindaanyi.

² Hean geayeeshi, “Gigali yeenu?” Ak gwayeeshiinean, “Geawi deadeen Yerusalemu, dadaah gidayang'da murdajeega ea geawundaanyi.”

³ Ak ghamiinaada malaykajeanda abaloolaniin aba madeedeanyu, ak ghwahidu malaykajeanda nuut madeedeanyu gwaroonyi niny,

⁴ Ak gwayeesha dea gwachi bea madeeda “Fwaja, ak giyeeshi orjeedida, ‘Yerusalemu gaygoobiida buuneeda gawuurji gharang'weaka manda ghamarda, aba seang'ayda buuneeda ea dugwa mida jeedida.

⁵ Aba gideaba aniini gaydoaw ghamarda beasta, daneaweesa meadajeega sean gwarugu NG'UTAMIIDA, ak gaydoaw giigheambiita aba jeadaanyi.’”

Fuga siipaleak geeguursa gabiigu ghoah

⁶ Asi! gwayi NG'UTAMIIDA ang'amwana wiilooda ng'eanyiida ghayeawa aba gideaba gaydeadearseegwa meadajeega sean bea ng'eanyiida gwarugu NG'UTAMIIDA.

⁷ Asi! Amng'awsiina Sayuni agoogeeni oondi ng'eanyiida Babeliin.

⁸ Gwarugu NG'UTAMIIDA bea lugweega gideaba iijeadagasa giigheambiitaanyi goojeaktanean eemoojiga ghayi abaleageegwa aba gideaba siida jea ghwasadeagwa ghwasat lagheaneeda gheang'daanyi.

⁹ “Aba gideaba ng'ula gaydalas saawa ak gayghoah saawa fugeagwa bea gadiyeeda ak gajanala gideaba goojeaknean NG'UTAMIIDA bea lugweega.

¹⁰ Sarmana nea gihoosani, Ea hudeaba Sayuni, aba gideaba gaydahidu ak geabiidi jeedeang'wa, gwarugu NG'UTAMIIDA.

¹¹ Ak gaygaguuyi eemoojiga saang'a aba heeda NG'UTAMIIDA eaweedida, ak fugiga gajea saang'a; ak gaydeabiida jeenyaawa, ak gajanala gideaba goojeaknean NG'UTAMIIDA bea lugweega doan heedeang'wa.

¹² Ak gaygwahearan NG'UTAMIIDA ng'eanyiida Yuda gawuurji saruutaanyi bea ng'eanyiida ghaydit, ak gaydaloat gicha Yerusalemu.”

¹³ Dasiinda giliwas sih aba madeeda NG'UTAMIIDA, aba gideaba ghwahidu nea gwaleabu heeda ghaydit abiita.