SAKARIYA 13 - Bibliyeeda Ghaydit

¹ “Eaweedida gajeajaat gheang'da eenda aba badayda gheeh Dawdi ea dea fuga mida Yerusalemu eamiidu saawa aba riing'eeda ea ririnnyeanda.

² “Ak eaweedida, gwarugu NG'UTAMIIDA bea lugweega gaydasach gheawunga aseecheeka aba jeeda ng'eanyiida. Ak ea majeapkaat ak gaydahoan sibanga ea gurooruunatka munyas bea ririnnyeanda, gwariteawa jeeda ng'eanyiida.

³ Ama inyas gwardu giliwas sih ak gwahinda geaw sibaneeda. Abeeda gaygwayeesha ghwaan ea ghaamwat niny, ‘Majabiidana badayda ng'eanyiida, aba gideaba girgu ng'asheega ng'uyeega aba gheawunga NG'UTAMIIDA.’ Ak aba damandida rukuna ramoorangean gayghang'ut ghwaan ea ghaamwat aba barda ak ghami.

⁴ Abeeda eaweedida gilinyoo ea sibaneeda gil. Gayghabwaspwas aba gili itaanyi siihiimsean iramoaran, ak ea maygookwa hang'da mideawa buudeega, aba gideaba gwareengani buuneeda.

⁵ Geaghus gwayi, ‘Aniini meawoosi sibaneeda earahay, aniini geawooschi siida bara ng'eanyi, nea gutawoos baleanda.’

⁶ Ama inyas geepearsa gideaba ‘deaneaduutsu gabwa naaha?’ Gaygwayi, ‘Deaneaduutsu ghaanyaschi aba gheeda siida eaduupcheewi.’”

Diigheanda jea eabwara jeagiischoocheanda ASEETA

⁷ gwayi NG'UTAMIIDA bea lugweega. “Ea ng'uta ng'eada, aba badayda jeagiischoocheandeanyu, ea siida was deanyu.” “Bwara jeagiischoocheanda ak gayghwadarda gisilga. Ak abeeda gaydeageal geatindeanyu heeda dayeega gisilga

⁸ Ak aba ng'eanyiisean gajeasach gharmucheew iyeenya, ak gaygameewa. Gwarugu NG'UTAMIIDA, nea gharmucheandeaba samwagu gaygoobiida jeeni.

⁹ Ak gaydeadu gharmucheandida bea samwaguun, ak ghaayiinyi jeeda beasta. Ak gaydadaay saawa ea gawuurji lapiya, iisisim, ak geasimnyi gawuurji gidasisimiida lagheanga dahaabu, ak abeeda gaygaguuriisa gheawungeasu, ak gaydealeeysa iit saawa. Ak gaydayi, ‘Suh fugeasu gil’, Ak gaygwayi niny, ‘NG'UTAMIIDA ASEETEANYU gil.’”